ୱାଶିଂଟନ,୧୭ା୭: ଆମେରିକାର ରାଷ୍ଟ୍ରପତି ପ୍ରାର୍ଥୀ ଡୋନାଲ୍ଡ ଟ୍ରମ୍ପଙ୍କ ଉପରେ ବିପଦ ବଢ଼ିବାରେ ଲାଗିଛି । ନିକଟରେ ତାଙ୍କ ଉପରକୁ ଗୁଳିମାଡ଼ ହୋଇଥିବା ବେଳେ ରିପବ୍ଲିକାନ ନ୍ୟାଶନାଲ କନଭେନସନ (ଆରଏନ୍ସି) ପାଖାପାଖି ଛୁରୀ ଧରି ବୁଲୁଥିବା ଜଣେ ଯୁବକକୁ ପୋଲିସ ଗୁଳି କରିଛି । ଅନ୍ୟ ଜଣେ ସନ୍ଦିଗ୍ଧ ଯୁବକଙ୍କୁ ସୋମବାର ଏକେ ୪୭ ବନ୍ଧୁକ ସହ ଗିରଫ କରାଯାଇଥିବା ଜଣାପଡ଼ିଛି ।
ୱିସ୍କୋସିନ୍ରେ ଥିବା ଆରଏନ୍ସିଠାରୁ କିଛି ଦୂରରେ ପୋଲିସ ଜଣେ ବ୍ୟକ୍ତିଙ୍କୁ ଗୁଳି କରିଥିଲା । ପରେ ବ୍ୟକ୍ତିଙ୍କ ନିକଟରୁ ଦୁଇଟି ଛୁରୀ ଉଦ୍ଧାର କରିଥିଲା। ମିଲୱାକ ମୁଖ୍ୟ ଜେଫ୍ରି ନରମାନ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ କଲମ୍ବସ, ଓହିଓ ପୋଲିସ ବିଭାଗର ପାଞ୍ଚଜଣ ଅଧିକାରୀ ଦୁଇ ହାତରେ ଛୁରୀ ଧରିଥିବା ଏହି ବ୍ୟକ୍ତିଙ୍କ ଉପରକୁ ଗୁଳି ଚଳାଇଥିଲେ । ଉକ୍ତ ବ୍ୟକ୍ତି ଜଣକ ପୋଲିସର ନିର୍ଦ୍ଦେଶ ପାଳନ କରିବାକୁ ମନା କରିଦେଇଥିଲା ଏବଂ ପୋଲିସ ଗୁଳି ଚଳାଇବା ପୂର୍ବରୁ ଜଣେ ସାଧାରଣ ବ୍ୟକ୍ତିଙ୍କୁ ଆକ୍ରମଣ କରିଥିଲା।
ସୂଚନା ଥାଉକି, ଗତ ୧୪ ତାରିଖରେ ପେନ୍ସ୍ଲେଭାନିଆରେ ଆୟୋଜିତ ଏକ ରାଲିରେ ଟ୍ରମ୍ପଙ୍କ ଉପରକୁ ଗୁଳିମାଡ଼ ହୋଇଥିଲା । ଗୁଳି ଶବ୍ଦ ଶୁଣି ତାଙ୍କର ଅଙ୍ଗରାଖୀମାନେ ତାଙ୍କୁ ମଞ୍ଚ ଉପରୁ ଓହ୍ଲାଇ ଦେଇଥିଲେ । ଏହି ସମୟରେ ତାଙ୍କର ଡାହାଣ କାନରୁ ରକ୍ତ ବାହାରୁଥିବା ଦେଖିବାକୁ ମିଳିଥିଲା । ହେଲେ ସେ ବିପଦ ମୁକ୍ତ ରହିଥିଲେ । ଅନ୍ୟପଟେ ଏହି ଗୁଳିମାଡ଼ରେ ଅଭିଯୁକ୍ତର ମୃତ୍ୟୁ ହୋଇଥିଲା । ଆମେରିକାରେ ନଭେମ଼୍ବର ମାସରେ ରାଷ୍ଟ୍ରପତି ର୍ନିବାଚନ ହେବାକୁ ଯାଉଛି । ଏହି ସମୟରେ ପୂର୍ବତନ ରାଷ୍ଟ୍ରପତିଙ୍କ ଉପରକୁ ଗୁଳିମାଡ଼ ସହ ତାଙ୍କ ଉପରକୁ ଥରକୁ ଥର ଆସୁଥିବା ବିପଦ ଆମେରିକା ନାଗରିକଙ୍କ ଚିନ୍ତା ବଢ଼ାଇଛି।
