ନାଉଗାଁ,୨୮।୪(ସ୍ବ.ପ୍ର.): ଭତ୍ତା ଟଙ୍କା ପ୍ରଦାନରେ ସ୍ବଚ୍ଛତା ଆଣିବା ପାଇଁ ସରକାରଙ୍କ ପକ୍ଷରୁ ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟକୁ ଭତ୍ତା ଟଙ୍କା ପଠାଯିବା ପାଇଁ ବ୍ୟବସ୍ଥା କରାଯାଇଛି। ଫଳରେ ହିତାଧିକାରୀମାନେ ଭତ୍ତା ଟଙ୍କା ପାଇବା ପାଇଁ ବ୍ୟାଙ୍କ ଆକାଉଣ୍ଟ ଦେବା ବାଧ୍ୟତାମୂଳକ କରାଯାଇଛି। ଏଥିସହ ସରକାରଙ୍କ ତରଫରୁ ସିଧାସଳଖ ଅନଲାଇନ ମାଧ୍ୟମରେ ଟଙ୍କା ପଠାଯିବା ପାଇଁ ବ୍ୟବସ୍ଥା କରାଯାଇଛି। ମାତ୍ର ଅନେକ ହିତାଧିକାରୀ ଉକ୍ତ ଭତ୍ତା ଟଙ୍କା ପାଇବାରୁ ବଞ୍ଚତ୍ତ ହେଉଥିବା ଅଭିଯୋଗ ହେଉଛି।
ନାଉଗାଁ ବ୍ଲକର ୧୬ ପଞ୍ଚାୟତରେ ୫,୮୦୫ ହିତାଧିକାରୀ ମଧୁବାବୁ ପେନ୍ସନ ଯୋଜନାରେ ସାମିଲ ହୋଇଥିବାବେଳେ ୪,୪୬୦ ଜଣ ଜାତୀୟ ସୁରକ୍ଷା ପେନ୍ସନ ଯୋଜନାରେ ସାମିଲ ହୋଇଛନ୍ତି। ବ୍ଲକ କାର୍ଯ୍ୟାଳୟରୁ ମିଳିଥିବା ସୂଚନାନୁଯାୟୀ ସରକାରଙ୍କ ତରଫରୁ ହିତାଧିକାରୀମାନଙ୍କ ଆଧାରକୁ ଭିତ୍ତି କରି ସିଧାସଳଖ ବ୍ୟାଙ୍କ ଆକାଉଣ୍ଟକୁ ଭତ୍ତା ଟଙ୍କା ପ୍ରଦାନ କରାଯାଉଛି। ଏପରିକି ଜଣେ ହିତାଧିଙ୍କ ଏକାଧିକ ଆକାଉଣ୍ଟ ନମ୍ବର ରହିଥିବାବେଳେ ପୋଷ୍ଟାଲରେ ମଧ୍ୟ ଏକାଉଣ୍ଟ ରହିଛି। ତେଣୁ ହିତାଧିକାରୀଙ୍କ ଯେଉଁ ଜମା ଖାତା ଆଧାରରେ ଲିଙ୍କ ରହିଛି, ସେହି ଜମା ଖାତାକୁ ଭତ୍ତା ଟଙ୍କା ପ୍ରଦାନ କରାଯାଉଛି। ସେହିପରି ଗତ ମାର୍ଚ୍ଚରେ ଜାତୀୟ ସୁରକ୍ଷା ଭତ୍ତା ପେନ୍ସନ ଯୋଜନାରେ ଶତପ୍ରତିଶତ ହିତାଧିକାରୀ ଭତ୍ତା ପାଇଥିବାବେଳେ ମଧୁବାବୁ ପେନ୍ସନ ଯୋଜନାରେ ୫,୮୦୫ରୁ ଏଯାବତ୍ ମାତ୍ର ୨୯୯୦ ଜଣଙ୍କ ଖାତାକୁ ଭତ୍ତା ଟଙ୍କା ପ୍ରଦାନ କରାଯାଇଛି। ଅପରପକ୍ଷେ ହିତାଧିକାରୀଙ୍କ ଅଭିଯୋଗ ମୁତାବକ କେଉଁଠି ସେମାନେ ଦୀର୍ଘ ୧୦ ମାସ ହେବ ଭତ୍ତା ପାଇ ନ ଥିବା ବେଳେ ଆଉ କେଉଁଠି ୭୦୦ ଟଙ୍କା ପରିବର୍ତ୍ତେ କେବଳ ୫୦୦ ପ୍ରଦାନ କରାଯାଇଛି। ଫଳରେ ହିତାଧିକାରୀଙ୍କ ମନରେ ଅସନ୍ତୋଷ ପ୍ରକାଶ ପାଇଛି। ଗଳଦାରୀ ପଞ୍ଚାୟତର ପ୍ରମିଳା ସ୍ବାଇଁ ଦୀର୍ଘଦିନ ହେବ ଭତ୍ତା ପାଇ ନ ଥିବାରୁ ବାରମ୍ବାର ବ୍ଲକ କାର୍ଯ୍ୟାଳୟକୁ ଆସୁଥିବା ପ୍ରକାଶ କରିଛନ୍ତି।
ସେହିପରି ଶିଖର ପଞ୍ଚାୟତର ଲତିକା ବିଶ୍ୱାଳ ୭୦୦ ଟଙ୍କା ଭତ୍ତା ପାଉଥିବାବେଳେ ଜମାଖାତାକୁ ୫୦୦ ଟଙ୍କା ଆସୁଥିବା କହିିଛନ୍ତି। ଏନେଇ ସେ ଅଭିଯୋଗ କରିବା ପରେ ୨ ମାସର ବଳକା ୪୦୦ ଟଙ୍କା ବ୍ଲକ କାର୍ଯ୍ୟାଳୟକୁ ଆସି ହାତରେ ନେଇଥିବା କହିଛନ୍ତି। ସେହିପରି ରୋହିଆ ପଞ୍ଚାୟତର ଅର୍ଜୁନ ସ୍ବାଇଁ ଓ ସୀତା ସ୍ବାଇଁ ଉଭୟଙ୍କୁ ୮୦ ବର୍ଷରୁ ଊର୍ଦ୍ଧ୍ୱ ହୋଇଥିବା ବେଳେ ୫ ଶହ ଟଙ୍କା ଭତ୍ତା ପାଉଥିବା ପ୍ରକାଶ କରିଛନ୍ତି। ତିରୁଣ ପଞ୍ଚାୟତ ତେଣ୍ଟୋଇ ଗ୍ରାମର ପୂର୍ଣ୍ଣଚନ୍ଦ୍ର ବିଶ୍ୱାଳ ଭତ୍ତା ପାଇ ନ ଥିବା ଅଭିଯୋଗ କରିଛନ୍ତି। ଝରି ଦାସ ଜଣେ ପକ୍ଷାଘାତ ରୋଗୀ ହୋଇଥିବା ବେଳେ ଦୀର୍ଘ ୧୦ ମାସ ହେବ ଭତ୍ତା ପାଇନାହାନ୍ତି ବୋଲି କହିଛନ୍ତି। ଏନେଇ ଜିଲାପାଳଙ୍କ ଜନଶୁଣାଣିରେ ଅଭିଯୋଗ କରାଯାଇଥିଲେ ମଧ୍ୟ କୌଣସି ସୁଫଳ ମିଳୁ ନ ଥିବା ସେମାନେ କହିଛନ୍ତି। କିନ୍ତୁ ବ୍ଲକ କାର୍ଯ୍ୟାଳୟରେ ଉଭୟଙ୍କ ଜମାଖାତାକୁ ପ୍ରତି ମାସରେ ଭତ୍ତା ଅର୍ଥ ପ୍ରଦାନ କରାଯାଉଥିବା ଦର୍ଶାଯାଇଛି। ଏନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଏହାର ସ୍ଥାୟୀ ସମାଧାନ କରିବା ପାଇଁ ଭତ୍ତା ହିତାଧିକାରୀମାନେ ପ୍ରଶାସନ ନିକଟରେ ଦାବି କରିଛନ୍ତି।
ଏ ବିଷୟରେ ବ୍ଲକ ବିଏସ୍ଏସ୍ଓ ଜୟକୃଷ୍ଣ ସ୍ବାଇଁ କହିଛନ୍ତି, ଅନଲାଇନ ମାଧ୍ୟମରେ ଭତ୍ତା ଟଙ୍କା ସିଧାସଳଖ ରାଜ୍ୟ ସରକାର ପ୍ରଦାନ କରୁଛନ୍ତି। ବହୁ ହିତାଧିକାରୀ ଶୂନ୍ ବାଲାନ୍ସରେ ବିଭିନ୍ନ ବ୍ୟାଙ୍କରେ ଜମାଖାତା ଖୋଲିଛନ୍ତି। ଖାତାରେ ଟ୍ରାଞ୍ଜାକ୍ସନ ନ ଥିବାରୁ ଏହା ବନ୍ଦ ହୋଇଗଲାଣି। କିନ୍ତୁ ହିତାଧିକାରୀଙ୍କ ଆଧାର ନମ୍ବର ଉକ୍ତ ଖାତାରେ ରହିଥିବାରୁ ଏହାକୁ ବେଶ କରି ଭତ୍ତା ପ୍ରଦାନ କରାଯାଉଛି। ତାହା ସେମାନଙ୍କ ଜମାଖାତାକୁ ଯାଉଛି। ଅନେକ ହିତାଧିକାରୀଙ୍କ ଏକାଧିକ ଖାତା ରହିଛି। ତେଣୁ କେଉଁ ଖାତାକୁ ଭତ୍ତା ଯାଉଛି ସେମାନେ ଆଧାର ଆଣି ବ୍ଲକ କାର୍ଯ୍ୟାଳୟରେ ଦେଖିପାରିବେ। ଯଦି ଭତ୍ତା ଆସି ନ ଥିବ ପୁନର୍ବାର ଆବଶ୍ୟକ କାଗଜପତ୍ର ପ୍ରଦାନ କରି ଏହାକୁ ଦିଆଯିବା ପାଇଁ ବ୍ୟବସ୍ଥା କରାଯିବ। ଯେହେତୁ ଅନଲାଇନ ମାଧ୍ୟମରେ ପ୍ରଥମ କରି ଭତ୍ତା ପ୍ରଦାନ କରାଯାଉଛି ପ୍ରଥମେ ଅନେକ ଭୁଲ୍ ରହୁଛି । ତେଣୁ ହିତାଧିକାରୀମାନେ ବ୍ୟସ୍ତ ନ ହୋଇ କାର୍ଯ୍ୟାଳୟକୁ ଆସି ସଂଶୋଧନ କରିପାରିବେ ବୋଲ ସ୍ବାଇଁ ମତବ୍ୟକ୍ତ କରିଛନ୍ତି।
