ସୁନାବେଡ଼ା/ସେମିଳିଗୁଡା, ୧୫।୧(ସ୍ବ.ପ୍ର.): ସୁନାବେଡା ପୌରାଧ୍ୟକ୍ଷ ଡ. ରାଜେନ୍ଦ୍ର କୁମାର ପାତ୍ରଙ୍କ ବିରୋଧରେ ଶନିବାର ଜଣେ ମହିଳା ଯୌନ ନିର୍ଯାତନା ଅଭିଯୋଗ ଆଣିଛନ୍ତି। ସୁନାବେଡ଼ା ଥାନା ଅଧୀନ ସେମିଳିଗୁଡା ସରସ୍ବତୀ ନଗର ଅଞ୍ଚଳରେ ରହୁଥିବା ଏହି ମହିଳା ଜଣକ ପ୍ରଥମେ ସୁନାବେଡ଼ା ଥାନା ଓ ପରେ କୋରାପୁଟ ଏସ୍ପିଙ୍କ ଦ୍ବାରସ୍ଥ ହୋଇଛନ୍ତି।
ମିଳିଥିବା ଖବରରୁ ଜଣାପଡିଛି, ମହିଳା ଜଣକ ତାଙ୍କ ପରିବାର ସହ ଦୀର୍ଘ ଦିନ ହେବ ସରସ୍ବତୀ ନଗର ଅଞ୍ଚଳରେ ରହି ଆସୁଛନ୍ତି। ତାଙ୍କ ସ୍ବାମୀ ସରସ୍ବତୀ ଶିଶୁ ବିଦ୍ୟା ମନ୍ଦିରରେ କାର୍ଯ୍ୟ କରନ୍ତି। କିଛି ଦିନ ହେବ ପୌରାଧ୍ୟକ୍ଷ ଡ. ପାତ୍ର ଓ ସରସ୍ବତୀ ଶିଶୁ ବିଦ୍ୟା ମନ୍ଦିରରେ ସମ୍ପାଦକ ଥିବା ତାଙ୍କ ବାପା ପ୍ରକାଶ ପାତ୍ର ତାଙ୍କୁ ଯୌନ ନିର୍ଯାତନା ଦେଉଛନ୍ତି। ସ୍ଥାନୀୟ ଅଞ୍ଚଳର କେତେ ଜଣ ଲୋକଙ୍କୁ ଲଗାଇ ତାଙ୍କ ଉପରେ ଅତ୍ୟାଚାର କରୁଛନ୍ତି। ରାତି ଅଧରେ ଘରେ ପଶି ଗାଳିଗୁଲଜ କରିବା ସହ ମାରଧର କରୁଥିବା ମହିଳା ଜଣକ ଲିଖିତ ଅଭିଯୋଗରେ ଉଲ୍ଲେଖ କରିଛନ୍ତି। ଏନେଇ ସେ କିଛି ଦିନ ତଳେ ସୁନାବେଡ଼ା ଥାନାରେ ଅଭିଯୋଗ କରିଥିଲେ ମଧ୍ୟ ଥାନା ଅଧିକାରୀ କୌଣସି ପଦକ୍ଷେପ ଗ୍ରହଣ କରି ନ ଥିଲେ। ଏ ସମ୍ପର୍କରେ ସେ ବ୍ରହ୍ମପୁରର ସାମାଜିକ କର୍ମୀ ପ୍ରମିଳା ତ୍ରିପାଠୀଙ୍କ ଦୃଷ୍ଟି ଆକର୍ଷଣ କରିଥିଲେ। ଶୁକ୍ରବାର ପ୍ରମିଳା ସେମିଳିଗୁଡାରେ ପହଞ୍ଚତ୍ଥିଲେ। ସେ ସେମିଳିଗୁଡାରେ ଏକ ହୋଟେଲରେ ଥିବା ଖବର ପାଇ ସରସ୍ବତୀ ଶିଶୁ ବିଦ୍ୟା ମନ୍ଦିରର କିଛି ଗୁରୁମାଗୁରୁଜୀଙ୍କ ସହ କେତେକ ଯୁବକ ହୋଟେଲରେ ପହଞ୍ଚତ୍ ପ୍ରମିଳାଙ୍କୁ ବିରୋଧ କରିଥିଲେ। ତେବେ ଏହା ସତ୍ତ୍ୱେ ପ୍ରମିଳା ତାଙ୍କୁ ଧରି ସୁନାବେଡା ଥାନା ଅଧିକାରୀଙ୍କୁ ସାକ୍ଷାତ କରିଥିଲେ। କୋରାପୁଟ ଏସ୍ପିଙ୍କ ନିକଟକୁ ଉଭୟେ ଯାଇଥିଲେ ବୋଲି ମହିଳା ଜଣକ କହିଛନ୍ତି। ଏନେଇ ପୌରାଧ୍ୟକ୍ଷ ଡ.ପାତ୍ରଙ୍କୁ ପଚାରିବାରୁ ସେ କହିଥିଲେ ଯେ, ମୋ ନାମରେ ହୋଇଥିବା ଅଭିଯୋଗ ଭିତ୍ତିହୀନ। ମୁଁ ନାରୀମାନଙ୍କୁ ଯଥେଷ୍ଟ ସମ୍ମାନ ଦିଏ। ଏପରି ମିଥ୍ୟା ଅଭିଯୋଗ ପଛରେ କି ଉଦ୍ଦେଶ୍ୟ ରହିଛି ତାହା ସମୟ ଆସିଲେ ସବୁ ସ୍ପଷ୍ଟ ହୋଇଯିବ। ସମ୍ପୃକ୍ତା ମହିଳାଙ୍କ ସମ୍ପର୍କରେ ସେ ଅବଗତ ଅଛନ୍ତି। ତାଙ୍କୁ କେହି ଦୁର୍ବ୍ୟବହାର କରିନାହାନ୍ତି ବୋଲି ଡ.ପାତ୍ର କହିଛନ୍ତି।
