ମୋରଡ଼ା,୫ା୧୧(ସ୍ମାରକ ମାଜୀ): ମୟୂରଭଞ୍ଜ ଜିଲା ମୋରଡ଼ା ବ୍ଲକରେ ଦୁର୍ନୀତିର ସୀମା ଶୀର୍ଷରେ ପହଞ୍ଚିଥିବାର ଅଭିଯୋଗ ହୋଇଛି l ଏନେଇ ପଞ୍ଚାୟତ ପ୍ରତିନିଧି ତଥା ଜନସାଧାରଣ ମୋରଡା ବିଡିଓ ଜୟକୃଷ୍ଣ ପାତ୍ରଙ୍କ ପାଖରେ ଫେରାଦ ହୋଇଛନ୍ତି। ଅଭିଯୋଗ ମୁତାବକ, ବ୍ଲକର କନିଷ୍ଠ ଯନ୍ତ୍ରୀ ଅଶୋକ ଦାସ ମୁଖ୍ୟମନ୍ତ୍ରୀ ସହାୟତା ଉନ୍ନୟନ କାର୍ଯ୍ୟ ପାଇଁ ୩୨ଟି ସୂଚନାଫଳକ କିଣାରେ ଅନିୟମିତତା କରିଥିବା ଅଭିଯୋଗ ହେଉଛି। ପ୍ରତ୍ୟେକ ଫଳକର ମୂଲ୍ୟ ୪୫୦୦ ଟଙ୍କା ହୋଇଥିବା ବେଳେ ୧୦,୬୦୦ଟଙ୍କା ଲେଖାଏ ଠିକାଦାରଙ୍କଠାରୁ ଆଦାୟ କରାଯାଇଥିବା ଅମୂଲ୍ୟ ଦାସ,କେଶବ ବାରିକ, ସତ୍ୟକାନ୍ତ ବେହେରା ଏବଂ ଅନ୍ୟମାନେ ଅଭିଯୋଗ ଆଣିଛନ୍ତି। ସେହିପରି ସରକାରୀ ଜିନିଷପତ୍ର କିଣାରେ ଦୁର୍ନୀତି କରିବା ସହିତ କନିଷ୍ଠ ଯନ୍ତ୍ରୀ ନିଜେ ଠିକାଦାର ସାଜିଥିବାର ଅଭିଯୋଗ କରିଛନ୍ତି। ତେବେ ଏନେଇ ଶ୍ରୀ ଦାସଙ୍କୁ ଉତ୍ତ୍ୟକ୍ତ ଠିକାଦାରମାନେ ଘେରିଥିବା ବେଳେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। ତେବେ ଅଭିଯୋଗକୁ ଶ୍ରୀ ଦାସ ଖଣ୍ଡନ କରିଥିବା ବେଳେ ଠିକାଦାରମାନେ ମୋରଡା ବିଡିଓ ଜୟକୃଷ୍ଣ ପାତ୍ରଙ୍କ ପାଖରେ ଫେରାଦ ହୋଇଥିଲେ। ତେବେ ୭ ଦିନ ମଧ୍ୟରେ ଘଟଣାର ଉପଯୁକ୍ତ ତଦନ୍ତ କରି ପଦକ୍ଷେପ ନିଆଯିବ ବୋଲି ବିଡିଓ ପ୍ରତିଶ୍ରୁତି ଦେଇଛନ୍ତି।
