ଛତ୍ରପୁର,୮ା୧୦(ସନ୍ତୋଷ ପାଢ଼ୀ): ସ୍ପଷ୍ଟ ଦିବାଲୋକରେ ଜଣେ ଯୁବକଙ୍କୁ ଅପହରଣ କରି ଦୁର୍ବୃତ୍ତମାନେ ନେଇଯାଇଛନ୍ତି । ଗଞ୍ଜାମ ଜିଲା କୋଦଳା ଥାନା ଅନ୍ତର୍ଗତ ଜେ ଛଚିନାଠାରେ ଏଭଳି ଏକ ଅଭାବନୀୟ ଘଟଣା ଘଟିଥିବା ବେଳେ ପୋଲିସ ପାଇଁ ଏହି ଘଟଣା ଏବେ ଚ୍ୟାଲେଞ୍ଜ ସୃଷ୍ଟି କରିଛି।
ସୂଚନାନୁସାରେ, ଗଞ୍ଜାମ ଜିଲା କବିସୂର୍ଯ୍ୟନଗର ଥାନା ଅନ୍ତର୍ଗତ କେ ଖରିଡ଼ା ଗ୍ରାମର ୩୨ ବର୍ଷୀୟ ଦୀପୁ ପାତ୍ର ଆସିକା ଅଞ୍ଚଳର ସତ୍ୟ ପାତ୍ର ନାମକ ଯୁବକଙ୍କ ସହ କୌଣସି ଏକ ମାମଲାରେ କୋଦଳା କୋର୍ଟକୁ ଯାଇଥିଲେ। କୋର୍ଟରୁ ଫେରି ନିଜ ଗ୍ରାମକୁ ଫେରୁଥିଲା ବେଳେ ଜେ ଛଚିନାଠାରେ ୪ରୁ ୫ ଜଣ ଦୁର୍ବୃତ୍ତ ଦୀପଙ୍କୁ ବଳପୂର୍ବକ ଉଠାଇ ନେଇ ଚାଲିଗଲେ। ଶୁକ୍ରବାର ଅପରାହ୍ନରେ ଦୀପୁଙ୍କୁ ଅପହରଣ କରାଯାଇଥିବା ବେଳେ ସତ୍ୟଙ୍କୁ ମାଡ ମାରି ଘଟଣାସ୍ଥଳରୁ ଚାଲିଯିବାକୁ କୁଆଡ଼େ ବାଧ୍ୟ କରିଥିଲେ ଦୁର୍ବୃତ୍ତ।
ଖାଲି ସେତିକି ନୁହେଁ, ଦୁର୍ବୃତ୍ତମାନେ ଅପହରଣ କରି ଦୀପୁଙ୍କୁ ଏକ ଜଙ୍ଗଲକୁ ନେଇ ପ୍ରବଳ ମାଡ଼ ମାରିବା ସହ ଭିଡିଓ କଲ୍ ଜରିଆରେ ଦୀପୁଙ୍କ ସମ୍ପର୍କୀୟଙ୍କୁ ଘଟଣାସ୍ଥଳର ଦୃଶ୍ୟ ବି ଦେଖାଉଥିଲେ। ଆଉ ଭିଡିଓ କଲ୍ ବେଳେ ମାଡ଼ ମାରିବା ଦୃଶ୍ୟ ଦେଖାଇ ବାହାବା ନେଉଥିଲେ ଦୁର୍ବୃତ୍ତ। ବର୍ତ୍ତମାନ ସୁଦ୍ଧା ଦୁର୍ବୃତ୍ତମାନଙ୍କ ଠୋସ୍ ପାଇ ପାରିନି ପୋଲିସ। ଏନେଇ କୋଦଳା ଥାନାରେ ପରିବାର ଲୋକେ ଏତଲା ଦେଇଥିବା ବେଳେ ଅପହରଣକାରୀ କେଉଁଠି ନେଇ ରଖିଛନ୍ତି ତାହା ବି ଜଣାପଡ଼ିନି। ସେପଟେ ଦୀପୁଙ୍କ ମା’ ଛତ୍ରପୁର ଆସି ଗଞ୍ଜାମ ଏସ୍ପିଙ୍କ ଦ୍ୱାରସ୍ଥ ହୋଇଛନ୍ତି।
