ନୂଆଦିଲ୍ଲୀ,୧୧।୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ତୃତୀୟ ପାଳି ସରକାର ଶପଥ ନେବାର ଦିନକ ପରେ ମନ୍ତ୍ରୀମାନଙ୍କୁ ବିଭାଗ ବଣ୍ଟନ କରାଯାଇଛି। ଗୁରୁତ୍ୱପୂର୍ଣ୍ଣ ବିଭାଗଗୁଡ଼ିକ ଭାଜପା ମନ୍ତ୍ରୀମାନଙ୍କ ହାତରେ ନ୍ୟସ୍ତ କରାଯାଇଛି। ଅଧିକାଂଶ ଭାଜପା ମନ୍ତ୍ରୀ ସେମାନଙ୍କ ପୂର୍ବ ମନ୍ତ୍ରଣାଳୟ ବଜାୟ ରଖିବାରେ ସକ୍ଷମ ହୋଇଛନ୍ତି।
ପ୍ରଧାନମନ୍ତ୍ରୀ ନିଜ ପାଖରେ କାର୍ମିକ, ସାଧାରଣ ଅଭିଯୋଗ ଓ ପେନ୍ସନ, ଆଣବିକ ଶକ୍ତି ଓ ମହାକାଶ ବିଭାଗ ରଖିଛନ୍ତି। ଗାନ୍ଧୀନଗର ଏମ୍ପି ଅମିତ୍ ଶାହା ସ୍ବରାଷ୍ଟ୍ର ମନ୍ତ୍ରଣାଳୟ ବଜାୟ ରଖିଥିବାବେଳେ ଲକ୍ଷ୍ନୌ ଏମ୍ପି ରାଜନାଥ ସିଂଙ୍କ ହାତରେ ପୂର୍ବଭଳି ପ୍ରତିରକ୍ଷା ରହିଛି। ବରିଷ୍ଠ ଭାଜପା ନେତା ତଥା ନାଗପୁର ଏମ୍ପି ନୀତିନ ଗଡ଼କରୀ ପୂର୍ବଭଳି ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟ ପାଇଥିବାବେଳେ ଏସ୍. ଜୟଶଙ୍କରଙ୍କ ହାତରେ ଦ୍ୱିତୀୟ ଥର ପାଇଁ ବହିର୍ବ୍ୟାପାର ମନ୍ତ୍ରଣାଳୟ ରହିଛି। କିନ୍ତୁ ଏମିତି କିଛି ମନ୍ତନ୍ତ୍ରୀ ଅଛନ୍ତି, ଯାହା ଉପରେ ମୋଦ ଅଧିକ ବିଶ୍ୱାସ କରିଛନ୍ତି ଏବଂ ସେମାନଙ୍କୁ ଅଧିକ ଦାୟିତ୍ୱ ଦେଇଛନ୍ତି?
ଯେଉଁମାନେ ମୋଦି କ୍ୟାବିନେଟରେ ଅଧିକ ଦାୟିତ୍ୱ ପାଇଛନ୍ତି। ଏଥିମଧ୍ୟରେ ଅନେକ ନାମ ସାମିଲ ଅଛନ୍ତି। ପ୍ରଥମେ ହେଉଛନ୍ତି ଶିବରାଜ ସିଂ ଚୌହାନ, ଯିଏ କୃଷି ମନ୍ତ୍ରଣାଳୟ ତଥା ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟ ପାଇଛନ୍ତି। ପୂର୍ବତନ ହରିୟାଣା ସିଏମ ମନୋହର ଲାଲ ଖଟ୍ଟାରଙ୍କୁ ଶକ୍ତି ଏବଂ ନଗର ଉନ୍ନୟନ ମନ୍ତ୍ରଣାଳୟ ମିଳିଛି। ଉଭୟ ପ୍ରଥମ ଥର ପାଇଁ କେନ୍ଦ୍ରରେ ମନ୍ତ୍ରୀ ହୋଇଛନ୍ତି। ତୃତୀୟ ବୃହତ୍ତମ ମନ୍ତ୍ରଣାଳୟ ବିଷୟରେ କହିବାକୁ ଗଲେ, ଜିତନ ରାମ ମାନ୍ଝୀଙ୍କୁ ଏକ ସ୍ବତନ୍ତ୍ର ଏବଂ ବଡ଼ ମନ୍ତ୍ରଣାଳୟ ଦିଆଯାଇଛି ଏବଂ ତାହା ହେଉଛି MSME, ଅର୍ଥାତ୍ କ୍ଷୁଦ୍ର ସ୍କେଲ ଇଣ୍ଡଷ୍ଟ୍ରିଜ ମନ୍ତ୍ରଣାଳୟ।
ରେଳ ମନ୍ତ୍ରଣାଳୟ ନୀତୀଶ କୁମାର ଦଳକୁ ଯିବ ବୋଲି କଳ୍ପନାଜଳ୍ପନା କରାଯାଇଥିଲା, କିନ୍ତୁ ମୋଦିକ୍ୟାବିନେଟରେ ଏହି ମନ୍ତ୍ରଣାଳୟ ଅଶ୍ୱିନୀ ବୈଷ୍ଣବଙ୍କ ନିକଟକୁ ଯାଇଛି। ଅଶ୍ୱିନୀ ବୈଷ୍ଣବଙ୍କର କେବଳ ରେଳ ମନ୍ତ୍ରଣାଳୟ ନୁହେଁ, ସୂଚନା ଓ ପ୍ରସାରଣ ମନ୍ତ୍ରଣାଳୟ ଏବଂ ଆଇଟି ମନ୍ତ୍ରଣାଳୟ ମଧ୍ୟ ଅଛି।
୨୦୨୪ରେ ଏନଡିଏ ସରକାର ଗଠନ ହୋଇଥିବାବେଳେ ମନ୍ତ୍ରଣାଳୟ ବଣ୍ଟନ କରିବାକୁ ୧୭ ଘଣ୍ଟା ସମୟ ଲାଗିଥିଲା। ୨୦୧୯ରେ, ସରକାର ଗଠନ ଏବଂ ମନ୍ତ୍ରଣାଳୟର ବଣ୍ଟନ ମଧ୍ୟରେ ବ୍ୟବଧାନ ମାତ୍ର ୧୫ ଘଣ୍ଟା ଥିଲା। ୨୦୨୪ରେ ଏହି ପାର୍ଥକ୍ୟ ୧୬ ଘଣ୍ଟା ୨୦ ମିନିଟ ଥିଲା। ମୋଟ ଉପରେ, ପୂର୍ବ ପାଞ୍ଚଟି ସରକାର ତୁଳନାରେ ମନ୍ତ୍ରଣାଳୟ ବଣ୍ଟନ ପାଇଁ ଏହି ସରକାର ଦୀର୍ଘ ସମୟ ନେଇଛନ୍ତି।
