ମୁମ୍ବାଇ: କରୋନା ଭାଇରସ ସଂକ୍ରମଣକୁ ନେଇ ବଲିଉଡ୍ରେ ସବୁ ଯେମିତି ଏକ ପ୍ରକାର ବନ୍ଦ ହୋଇ ଯାଇଥିଲା କହିଲେ ଚଳେ। ହେଲେ ମହାରାଷ୍ଟ୍ର ସରକାରଙ୍କ ନିର୍ଦ୍ଦେଶ ପରେ କିଛି କିଛି ଫିଲ୍ମର ଶୁଟିଂ ଆରମ୍ଭ କରାଯାଇଛି। କେବଳ ସିନେମା ନୁହେଁ କିଛି ଧାରାବାହିକ ନିର୍ମାତା ମଧ୍ୟ ସେମାନଙ୍କର ଶୁଟିଂ ଆରମ୍ଭ କରି ଦେଇଛନ୍ତି। ଇତିମଧ୍ୟରେ ଚର୍ଚ୍ଚାକୁ ଆସିଛି କରୋନା ପୂର୍ବରୁ ରିଲିଜ୍ ନ ହୋଇ ପଡି ରହିଥିବା ଫିଲ୍ମ ଗୁଡିକର କଥା। ଅଂଗ୍ରେଜି ମିଡିୟମ ପରେ ଆଉ ସିନେମା ହଲରେ ଫିଲ୍ମ ରିଲିଜ୍ କରାଯାଇ ନାହିଁ। କିଛି ଫିଲ୍ମ ଓଟିଟି ପ୍ଲାଟଫର୍ମରେ ରିଲିଜ କରାଯାଇଥିବା ବେଳେ ଏବେ କିନ୍ତୁ ଚର୍ଚ୍ଚାକୁ ଆସିଛି ଅକ୍ଷୟ କୁମାରଙ୍କ ଅଭିନୀତ ସୂର୍ଯ୍ୟବଂଶୀ ଓ ରଣବୀର ସିଂଙ୍କ ଅଭିନୀତ ଫିଲ୍ମ ୮୩। ଓଟିଟି ପ୍ଲାଟଫର୍ମରେ ଫିଲ୍ମ ରିଲିଜକୁ ନେଇ ଥିଏଟର ମାଲିକ ବିରୋଧ କରୁଥିବା ବେଳେ ଏବେ ସୂର୍ଯ୍ୟବଂଶୀ ଓ ୮୩ ଥିଏଟରରେ ରିଲିଜ୍ ହେବ ବୋଲି ଶୁଣିବାକୁ ମିଳିଛି। ଫିଲ୍ମ କ୍ରିଟିକ ତରଣ ଆଦର୍ଶ ସୋସିଆଲ ମିଡିଆ ମାଧ୍ୟମରେ ଏହି ସୂଚନା ଦେଇଛନ୍ତି। ଏହି ୨ଟି ଫିଲ୍ମର ପୋଷ୍ଟର ଶେୟାର କରି ସେ ଏହି ସୂଚନା ଦେଇଛନ୍ତି।
