ବଲାଙ୍ଗୀର, ୧୧।୧୧ (ବୀରେନ୍ଦ୍ର କୁମାର ଝାଙ୍କର)-ବଲାଙ୍ଗୀର ଜିଲାର ପୁଣି ଜଣେ ନକଲି ଶିକ୍ଷକ ପୋଲିସ ହାବୁଡରେ ପଡିଛନ୍ତି। ଆଗଲପୁର ବ୍ଲକ ଡୁଡୁକା ପଲ୍ଲୀଶ୍ରୀ ନୋଡାଲ ହାଇସ୍କୁଲ ଶିକ୍ଷକ ଭକ୍ତ କୁମାର ସେଠ୍ଙ୍କୁ ବଲାଙ୍ଗୀର ଟାଉନ୍ ଥାନା ପୋଲିସ ଶୁକ୍ରବାର ଗିରଫ କରି କୋର୍ଟଚାଲାଣ କରିଛି। ଜାଲ ବିଇଡି ସାର୍ଟିଫିକେଟ ଦାଖଲ କରି ସେ ଶିକ୍ଷକ ଚାକିରୀ କରୁଥିବା ସ୍ପଷ୍ଟ ହେବା ପରେ ତାଙ୍କୁ ଗିରଫ କରାଯାଇଥିବା ଜଣାପଡିଛି। ଗିରଫ ଶିକ୍ଷକ ଭକ୍ତ କୁମାର ସେଠଙ୍କ ଘର ଲୋଇସିଂହା ବୋଲି ଜଣାପଡିଛି। ବଲାଙ୍ଗୀର ଜିଲା ଶିକ୍ଷା ଅଧିକାରୀ ଧ୍ରୁବ ଚରଣ ବେହେରା ଗୁରୁବାର ଅଭିଯୁକ୍ତ ଶିକ୍ଷକ ସେଠ୍ଙ୍କ ବିରୋଧରେ ବଲାଙ୍ଗୀର ଟାଉନ୍ ଥାନାରେ ଅଭିଯୋଗ କରିଥିଲେ। ସେ ଦାଖଲ କରିଥିବା ବିଇଡି ସାର୍ଟିଫିକେଟ ସମ୍ପୂର୍ଣ୍ଣ ଜାଲ ବୋଲି ଜଣାପଡିଥିବା ଜଣାଇଥିଲେ। ଉତ୍ତରପ୍ରଦେଶର ଏକ ବିଶ୍ୱବିଦ୍ୟାଳୟରୁ ଏହି ବିଇଡି ସାର୍ଟିଫିକେଟ ଅଣାଯାଇଥିବା ନେଇ ସ୍ପଷ୍ଟ ହେବା ପରେ ତାଙ୍କ ବିରୋଧରେ ଥାନରେ ଅଭିଯୋଗ କରାଯାଇଥିଲା। ଅଭିଯୋଗକୁ ଭିତ୍ତିକରି ପୋଲିସ ଥାନାରେ ଏକ ମାମଲା (ନଂ. ୬୩୦/୨୩) ରୁଜୁ କରି ଅଭିଯୁକ୍ତ ଶିକ୍ଷକ ସେଠଙ୍କୁ ଗିରଫ କରିଥିଲା। ବୁଧବାର ନକଲି ବିଇଡି ସାର୍ଟିଫିକେଟ ମାମଲାରେ ଗୁଡଭେଲା ବ୍ଲକ ଡଙ୍ଗାପଦର ପ୍ରାଥମିକ ବିଦ୍ୟାଳୟର ବହିଷ୍କୃତ ପ୍ରଧାନ ଶିକ୍ଷକ ଶ୍ୟାମସୁନ୍ଦର ପଧାନଙ୍କୁ ଟାଉନ୍ ଥାନା ପୋଲିସ ଗିରଫ କରି କୋର୍ଟଚାଲାଣ କରିଥିଲା। ପୂର୍ବରୁ ରଣ୍ଡା ହାଇସ୍କୁଲ ହିନ୍ଦୀ ଶିକ୍ଷୟିତ୍ରୀ ମିନ୍ମୟୀ ପଣ୍ଡା ମଧ୍ୟ ଜାଲ ସାର୍ଟିଫିକେଟ ମାମଲାରେ ଗିରଫ ହୋଇ ଜେଲ ଯାଇଥିଲେ। ଜିଲା ଶିକ୍ଷା ଅଧିକାରୀଙ୍କ ଅଭିଯୋଗ କ୍ରମେ ଆଉ କେତେଜଣ ଶିକ୍ଷକ ଏବଂ ବଲାଙ୍ଗୀର ଏବିଇଓ ଶ୍ୟାମବନ୍ଧୁ ମେଣ୍ଡୁଳିଙ୍କ ବିରୋଧରେ ମାମଲା ରୁଜୁ ହୋଇଥିଲେ ମଧ୍ୟ ସେମାନେ ଫେରାର ହୋଇଯାଇଛନ୍ତି।
