ମାଲକାନଗିରି,୨ା୬(ଡି.ଏନ୍.ଏ.): ମାଲକାନଗିରି ଜିଲା ସଦର ମହକୁମାରେ ଗୁରୁବାର ଅପରାହ୍ନ ପ୍ରାୟ ୪ଟାରେ କାଳବୈଶାଖୀ ଯୋଗୁ ୨୦ମିନିଟ୍ ଧରି ପ୍ରବଳ ବେଗରେ ପବନ ବହିବା ସହ ବଜ୍ରପାତ ହୋଇଥିଲା। ଫଳରେ ରାସ୍ତା ଉପରେ ବଡ଼ ବଡ ଗଛ ଉପୁଡି ପଡିବା ସହ ବିଦ୍ୟୁତ୍ ଖୁଣ୍ଟ ଭାଙ୍ଗି ପଡିଥିଲା ା କାଳବୈଶାଖୀ ଯୋଗୁ କଟେଲିଗୁଡା ଗ୍ରାମ ନିକଟରେ ନିର୍ମାଣାଧୀନ ଏୟାରଷ୍ଟ୍ରିପ୍ ପାଚେରି ଭୁଶୁଡିବା ଫଳରେ ସେଠାରେ କାର୍ଯ୍ୟରତ ଥିବା ୬ଜଣ ଶ୍ରମିକଙ୍କ ଉପରେ ପଡିଯାଇଥିଲା। ଫଳରେ ସେମାନେ କାନ୍ଥ ତଳେ ଚାପିହୋଇ ଯାଇଥିଲେ।
ଏହା ଦେଖି ଅନ୍ୟ ଶ୍ରମିକ ଓ ସ୍ଥାନୀୟ ଲୋକେ ତୁରନ୍ତ ସେମାନଙ୍କୁ ଉଦ୍ଧାରକରି ଆମ୍ବୁଲାନ୍ସକୁ ଖବର ଦେଇଥିଲେ। କିନ୍ତୁ ଆମ୍ବଲାନ୍ସ ପହଞ୍ଚିବାରେ ବିଳମ୍ବ ହେବାରୁ ସ୍ଥାନୀୟ ଲୋକେ ଅଟୋ ଓ ଟ୍ରାକ୍ଟର ଦ୍ୱାରା ଆହତମାନଙ୍କୁ ମାଲକାନଗିରି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ସେମାନଙ୍କ ମଧ୍ୟରୁ ୨ଜଣଙ୍କର ମୃତ୍ୟୁ ହୋଇଛି। ମୃତକ ହେଲେ ଏମ୍ଭି- ୩ ଗ୍ରାମର ଅନିଲ ହେମ୍ରମଙ୍କ ପୁଅ ମନ ହେମ୍ରମ୍ ଓ ତେନ୍ତଳିଗୁଡା ଗ୍ରାମର ଅର୍ଜୁନ ପେନିଆଙ୍କ ସ୍ତ୍ରୀ ତିଳୋତ୍ତମା।
ସେହିପରି ମାଲକାନଗିରି, ବାଲିମେଳା, ମାଥିଲ ଓ ପାଣ୍ଡ୍ରିପାଣି ଆଦି ଅଞ୍ଚଳରେ ବିଦ୍ୟୁତ୍ ସରବରାହ ସମ୍ପୂର୍ଣ୍ଣ ବନ୍ଦ ରହିଛି ା ପବନରେ ୧୦୦ରୁ ଊର୍ଦ୍ଧ୍ୱ ଘରର ଟିଣ ଉଡ଼ିଯିବା ସହ ଉଠାଦୋକାନୀମାନଙ୍କ ତମ୍ବୁ ନଷ୍ଟ ହୋଇଯାଇଥିବା ଦେଖିବାକୁ ମିଳିଛି। ପବନ ହେବା ଫଳରେ ମାଲକାନଗିରି-ଜୟପୁର, ମାଲକାନଗିରି-ବାଲିମେଳା, ଚିତ୍ରକୋଣ୍ଡା-ବାଲିମେଳା ଓ ଗୋବିନ୍ଦପାଲ୍ଲୀ ଜାତୀୟ ରାଜପଥରେ ରାସ୍ତାରେ ବଡ ବଡ ଗଛ ପଡିବାରୁ ଶହ ଶହ ଯାନବାହନ ଅଟକି ରହିଛି ା ଅଗ୍ନିଶମ ବିଭାଗ କର୍ମଚାରୀ ଏବଂ କୋରାପୁଟରୁ ଓଡ୍ରାଫ୍ ଟିମ୍ ଆସି ରାସ୍ତାରେ ପଡିଥିବା ଗଛ କଟା ଜାରି ରଖିଛନ୍ତି। ଜିଲା ପ୍ରଶାସନ ତରଫରୁ ବିଭିନ୍ନ ଅଞ୍ଚଳରେ କ୍ଷୟକ୍ଷତି ଏବଂ ତୁରନ୍ତ ରାସ୍ତା ସଫା ଏବଂ ବିଜୁଳି ସଂଯୋଗ ପାଇଁ ପଦକ୍ଷେପ ନିଆଯାଉଥିବା ଉପଜିଲାପାଳ ଅକ୍ଷୟ କୁମାର ଖେମୁଣ୍ଡୁ କହିଛନ୍ତି। ତେବେ ଆଭ୍ୟନ୍ତରୀଣ ଅଞ୍ଚଳରେ କାଳ ବୈଶାଖୀରେ ଘଟିଥିବା କ୍ଷୟକ୍ଷତି ବିଷୟରେ ରିପୋର୍ଟ ଲେଖା ହେବା ସୁଦ୍ଧା ଜଣାପଡିନାହିଁ।
