ନୂଆଦିଲ୍ଲୀ,୧୩।୬: ଅହମଦାବାଦରେ ଏୟାର ଇଣ୍ଡିଆ ବୋଇଂ ୭୮୭ ଡ୍ରିମଲାଇନର ଦୁର୍ଘଟଣା ପରେ, ବୀମା ଦାବି ପରିମାଣ ୧୦୦୦ କୋଟି ଟଙ୍କା ଅତିକ୍ରମ କରିଛି। ଏହା ଏପର୍ଯ୍ୟନ୍ତ ବିମାନ କ୍ଷେତ୍ରର ସବୁଠାରୁ ମହଙ୍ଗା ବୀମା ଦାବି। ଏହି ପରିମାଣ ସମଗ୍ର ଦେଶର ବିମାନ କ୍ଷେତ୍ରର ମୋଟ ବାର୍ଷିକ ପ୍ରିମିୟମଠାରୁ ଅଧିକ।
ସୂଚନାଯୋଗ୍ୟ, ଏୟାର ଇଣ୍ଡିଆର ମାଲିକ ଟାଟା ଗ୍ରୁପ ଏହି ବିମାନ ଦୁର୍ଘଟଣାରେ ପ୍ରାଣ ହରାଇଥିବା ପ୍ରତ୍ୟେକ ବ୍ୟକ୍ତିଙ୍କ ପରିବାରକୁ ୧ କୋଟି ଟଙ୍କା ସହାୟତା ରାଶି ଦେବାକୁ ଘୋଷଣା କରିଛି। ଦୁର୍ଘଟଣାରେ ୨୪୧ ଜଣଙ୍କର ମୃତ୍ୟୁ ହୋଇଛି। ଏବେ ଆକଳନ କରାଯାଉଛି ଯେ ବୀମା ଦାବି ୧୦୦୦ କୋଟି ଟଙ୍କାରେ ପହଞ୍ଚିପାରେ, ଯାହା ବିମାନ ବୀମା ଶିଳ୍ପ ଉପରେ ବଡ଼ ପ୍ରଭାବ ପକାଇପାରେ।
ବିଶେଷଜ୍ଞମାନେ କହିଛନ୍ତି ଯେ ଦୁର୍ଘଟଣାଗ୍ରସ୍ତ ଏୟାର ଇଣ୍ଡିଆ ବିମାନର ଯାତ୍ରୀଙ୍କ ପରିବାରକୁ ମଣ୍ଟ୍ରିଆଲ କନଭେନସନ ୧୯୯୯ ଅନୁଯାୟୀ କ୍ଷତିପୂରଣ ଦିଆଯିବା ଉଚିତ। ଅର୍ଥାତ ମୃତକଙ୍କ ଆଶ୍ରିତମାନଙ୍କୁ ୧,୨୮,୮୨୧ SDR (ସ୍ପେଶାଲ ଡ୍ରଇଂ ରାଇଟ୍ସ) ଦେବାକୁ ପଡିବ, ଯାହା ବର୍ତ୍ତମାନର ହାର ଅନୁସାରେ ପ୍ରତି ଯାତ୍ରୀଙ୍କ ପାଇଁ ୧.୪ କୋଟି ଟଙ୍କା।
ବର୍ତ୍ତମାନ, ଗୋଟିଏ SDRର ମୂଲ୍ୟ ୧୨୦ ଟଙ୍କା, ଯାହା ପାଞ୍ଚଟି ମୁଦ୍ରା ଉପରେ ଆଧାରିତ: ଆମେରିକୀୟ ଡଲାର, ୟୁରୋ, ଚାଇନା ରେନମିନ୍ବି, ଜାପାନୀ ୟେନ ଏବଂ ବ୍ରିଟିଶ ପାଉଣ୍ଡ ଷ୍ଟର୍ଲିଂ। ତଥାପି, ଶେଷ ଦେୟ ଏୟାର ଇଣ୍ଡିଆ ତାର ଯାତ୍ରୀମାନଙ୍କ ପାଇଁ କେତେ ବୀମା ପଲିସି ନେଇଛି ତାହା ଉପରେ ନିର୍ଭର କରିବ।
