ରାଉରକେଲା ଅଫିସ୍,୨୫ା୫: ଷ୍ଟିଲସିଟି ରାଉରକେଲାରେ ତାପମାତ୍ରା ପାରଦ ୪୨ ଡିଗ୍ରୀ ପାର୍ କରିଛି। ପୂର୍ବାହ୍ନ ୧୧ଟାରୁ ରାସ୍ତାଘାଟ ଶୂନ୍ଶାନ୍ ହୋଇଯାଉଛି। ଲୋକେ ତାତିରୁ ରକ୍ଷା ପାଇବା ପାଇଁ ଘର ଭିତରେ ରହୁଥିବା ବେଳେ ଶକ୍ତି ନଗର ଅଞ୍ଚଳର କିଛି ମହିଳା ବରିଷ୍ଠ ନାଗରିକ ତୃଷାତୁରମାନଙ୍କୁ ଜଳଦାନ କରିବାକୁ ଆଗେଇ ଆସିଛନ୍ତି। ଏଭଳି ସେବା ମନୋଭାବ ଦେଖି ଅଞ୍ଚଳବାସୀ ସେମାନଙ୍କୁ ପ୍ରଶଂସା କରିବା ସହ ଉତ୍ସାହିତ କରିଛନ୍ତି।
ଶକ୍ତି ନଗର ଅଞ୍ଚଳର ସାରାଣୀ ପଟ୍ଟନାୟକ(୭୬), ଶ୍ରୀମତୀ ନାୟକ(୭୪) ଏବଂ ଆଶାଲତା ଦାସ(୭୬)। ୨୦୧୫ ମସିହାରୁ ସେମାନେ ଉଦୁଉଦିଆ ଖରା ସମୟରେ ପ୍ରବଳ ତାତିକୁ ଖାତିର ନ କରି ଶକ୍ତି ନଗର ଓ କୋଏଲ ନଗର ସି ବ୍ଲକ ମଧ୍ୟବର୍ତ୍ତୀ ସ୍ଥାନରେ ଜଳଛତ୍ର ଖୋଲି ତୃଷାତୁର ପଥିକମାନଙ୍କୁ ଜଳଦାନ କରିଆସୁଛନ୍ତି। ୮ ବର୍ଷ ତଳେ ସେମାନେ ପ୍ରାତଃ ଭ୍ରମଣ କରିବାକୁ ଯାଉଥିଲେ। ଖରାଦିନେ ରାସ୍ତାରେ ପାଣି ବ୍ୟବସ୍ଥା ନ ଥିବା ଦେଖି ସମସ୍ତ ବରିଷ୍ଠ ମହିଳା ନାଗରିକ ଏକ ଜଳଛତ୍ର ଖୋଲିବାକୁ ନିଷ୍ପତ୍ତି ନେଲେ। ସେମାନେ ସମସ୍ତ ଆୟୋଜନ କରିପାରିବେ ନାହିଁ ବୋଲି ଉପଲବ୍ଧି କରି ସ୍ଥାନୀୟ ଯୁବକଙ୍କ ସହଯୋଗ ଲୋଡିଥିଲେ। ଏହି ୩ଜଣଙ୍କ ସହ ସ୍ବର୍ଣ୍ଣପ୍ରଭା ପଣ୍ଡା ନାମକ ଅନ୍ୟ ଜଣେ ମହିଳା ସହଯୋଗ କରିଥିଲେ। କୋଭିଡ ଯୋଗୁ ୨ ବର୍ଷ ଜଲଛତ୍ର ବନ୍ଦ ରହିଥିଲା। ସ୍ବର୍ଣ୍ଣପ୍ରଭା କର୍କଟ ରୋଗରେ ପୀଡ଼ିତ ହୋଇ ଆରପାରିକୁ ଚାଲିଯାଇଥିଲେ ମଧ୍ୟ ଏହି ୩ ବୃଦ୍ଧାଙ୍କ ସମାଜସେବା ନିଶା ତୁଟି ନ ଥିଲା ବୋଲି ସନ୍ଧ୍ୟାରାଣୀ କୁହନ୍ତି। ଜଳଛତ୍ରରେ ଶୁଦ୍ଧ ପେୟ ଜଳ ବ୍ୟତୀତ ବିଭିନ୍ନ ଦିନମାନଙ୍କରେ ବେଲ, ସ୍କ୍ବାଶ, ଆଖୁ ରସ, ପଣା ଓ ଅନ୍ୟ ସର୍ବତ ମଧ୍ୟ ବଣ୍ଟନ କରାଯାଇଥାଏ। ଏଥିପାଇଁ ସମସ୍ତ ସାମଗ୍ରୀ ସେମାନଙ୍କୁ ଯୋଗାଡ କରିବାକୁ ପଡିଥାଏ ବୋଲି ଶ୍ରୀମତୀ କହିଛନ୍ତି। ସେହିପରି ଆଶାଲତା କୁହନ୍ତି, ପରିଣତ ବୟସରେ ଅଧିକ ସ୍ବାସ୍ଥ୍ୟ ସମସ୍ୟା ଥିଲେ ମଧ୍ୟ ପଣା ସଂକ୍ରାନ୍ତିରୁ ୨ ମାସ ପର୍ଯ୍ୟନ୍ତ ନିରନ୍ତର ଜଳଛତ୍ର ଚାଲିଥାଏ। ପାଳି କରି ଖରା ସମୟରେ ସେବା ଯୋଗାଇଥାଉ। ଏଥିରେ ଶାନ୍ତି ମିଳୁଛି। ଯେତେ ଦିନ ପର୍ଯ୍ୟନ୍ତ ପିଣ୍ଡରେ ପ୍ରାଣ ଅଛି ସେବା ଜାରି ରହିବ ବୋଲି ସେ କହିଥିଲେ।
