କୋରାପୁଟ/ତେନ୍ତୁଳିଖୁଣ୍ଟି,୨୧।୮(ସ୍ବ.ପ୍ର./ଡି.ଏନ୍.ଏ.): କଛିଦିନରେ ବ୍ୟବଧାନରେ ପୁଣି ଦେଖାଦେଲାଣି ଝାଡ଼ାବାନ୍ତି ଆତଙ୍କ। ଦକ୍ଷିଣ ଓଡ଼ିଶାର କୋରାପୁଟ ଓ ନବରଙ୍ଗପୁର ଜିଲାରେ ଏବେ ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। କୋରାପୁଟ ସଦର ବ୍ଲକରେ ୧୬ଜଣ ଓ ନବରଙ୍ଗପୁର ଜିଲା ତେନ୍ତୁଳିଖୁଣ୍ଟିରେ ୬ଜଣ ଝାଡ଼ାବାନ୍ତିରେ ଆକ୍ରାନ୍ତ ହେବାର ଖବର ମିଳିଛି। ଏଥିସହ ତେନ୍ତୁଳିଖୁଣ୍ଟିରେ ଶୁକ୍ରବାର ଜଣେ ଆକ୍ରାନ୍ତଙ୍କ ମୃତ୍ୟୁ ହୋଇଥିବାବେଳେ କୋରାପୁଟରେ ୬ଜଣଙ୍କ ସ୍ବାସ୍ଥ୍ୟାବସ୍ଥା ଗୁରୁତର ରହିଛି।
ସୂଚନାନୁଯାୟୀ, କୋରାପୁଟ ବ୍ଲକ ମସ୍ତିପୁଟ ଗ୍ରାମରେ ଝାଡ଼ାବାନ୍ତି ବ୍ୟାପି ୧୬ ଜଣ ଆକ୍ରାନନ୍ତ ହୋଇଛନ୍ତି। ସେମାନଙ୍କ ମଧ୍ୟରୁ ଗୁରୁତର ଥିବା ୬ ଜଣଙ୍କୁ କୋରାପୁଟସ୍ଥିତ ଶହୀଦ ଲକ୍ଷ୍ମଣ ନାୟକ ମେଡିକାଲରେ ଭର୍ତ୍ତି କରାଯାଇଛି। ତଳ ଜାନିଗୁଡା ମେଡିକାଲ ଅଧିକାରୀ ଡାକ୍ତର ଶାଶ୍ୱତୀ ମହାନ୍ତି ପ୍ରଭାବିତ ଗ୍ରାମ ପରିଦର୍ଶନ କରି ପରିବେଶ ସୁସ୍ଥ ନ ଥିବା କହିଛନ୍ତି। ମସ୍ତିପୁଟ ଗ୍ରାମର ଆଦିବାସୀ ସାହିରେ ପାଇପ ଯୋଗେ ପାଣି ଆସୁ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ପାନୀୟ ଜଳ ଓ ପରିମଳ ସମସ୍ୟା ସମାଧାନ କରିବା ନିମନ୍ତେ ଶନିବାର ମସ୍ତିପୁଟ ପଞ୍ଚାୟତ କାର୍ଯ୍ୟାଳୟରେ କୋରାପୁଟ ବିଡିଓ ନରେନ୍ଦ୍ର ନାୟକ ସମୀକ୍ଷା କରିଛନ୍ତି। ଗ୍ରାମକୁ ଯାଇ ସ୍ଥିତ ଅନୁଧ୍ୟାନ କରିବା ପରେ ହିଁ ସେଠାକାର ଅବସ୍ଥା ସମ୍ପର୍କରେ କହିହେବ ବୋଲି ବିଡିଓ ପ୍ରକାଶ କରିଛନ୍ତି।
ଝାଡ଼ାବାନ୍ତିରେ ଆକ୍ରାନ୍ତ ହୋଇ ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ଡାକ୍ତରଖାନାର ଚିକିତ୍ସିତ ହେଉଥିବା ପଡ଼ାଆଉଁଳି ଗ୍ରାମର କାଲିମଣି ହରିଜନଙ୍କ ଶୁକ୍ରବାର ମୃତ୍ୟୁ ହୋଇଛି। ଝାଡ଼ାବାନ୍ତରେ ତାଙ୍କର ମୃତ୍ୟୁ ହୋଇଥିବା ଡାକ୍ତରଖାନା କର୍ତ୍ତୃପକ୍ଷ କିନ୍ତୁ ସ୍ପଷ୍ଟ କରୁନାହାନ୍ତି। କାଲିମଣି ଝାଡ଼ାବନ୍ତିରେ ଆକ୍ରାନ୍ତ ହୋଇ ଚିକିତ୍ସିତ ହେବାକୁ ଡାକ୍ତରଖାନା ଯାଇଥିଲେ ବୋଲି ତାଙ୍କ ପରିବାର ଓ ଗ୍ରାମବାସୀ କହୁଛନ୍ତି। ଶନିବାର ପୋଡ଼ାଆଉଁଳି ଗ୍ରାମର ଦେବ ସାନ୍ତା, ତୁରଞ୍ଜି ସାନ୍ତା ଓ ମାଙ୍ଗନୀ ମୁଦୁଲି, ଖୁଣ୍ଟିପଦର ରଜନ୍ତୀ ସାନ୍ତା, ଖାତିଗୁଡ଼ାର କାଞ୍ଚନ ବେହେରା ଓ ପୂଜାରିଗୁଡ଼ାର ବିମଳା ନାୟକ ଝାଡ଼ାବାନ୍ତି ର ଶିକାର ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଜିଲା କଂଗ୍ରେସ ଆଦିବାସୀ ସେଲ୍ର ସଭାପତି ଦିଲୀପ ପ୍ରଧାନୀ, ଜିଲା କଂଗ୍ରେସ ସାଧାରଣ ସମ୍ପାଦକ ଭୀମସେନ ପାଣିଗ୍ରାହୀ, ବ୍ଲକ କଂଗ୍ରେସ ସଭାପତି ପ୍ରହ୍ଲାଦ ହିଆଲ, ସାମାଜିକ ସଂଗଠକ ଜାନକୀକାନ୍ତ ବିଷୋୟୀ, ହିନ୍ଦୁ ସଂଗଠନର ମୁନା ଦଳେଇ ଅନ୍ୟ ସଂଗଠନର ଦିଲୀପ ସୁନା ପ୍ରମୁଖ ପୋଡ଼ାଆଉଁଳି ଯାଇ ଗ୍ରାମବାସୀଙ୍କ ଆଲୋଚନା କରିଛନ୍ତି। ଦୂଷିତ ପରିବେଶ ଯୋଗୁ ଏଭଳି ଝାଡ଼ାବାନ୍ତି ବ୍ୟାପୁଛି, ସ୍ଥିତ ବିଗିଡ଼ିବା ପୂର୍ବରୁ ପ୍ରଶାସନ ଜାଗ୍ରତ ହେବାକୁ କଂଗ୍ରେସ ଦଳ ଦାବି କରିଛି।
