ଢେଙ୍କାନାଳ ଅଫିସ,୨୪ା୧୧: ଢେଙ୍କାନାଳ ଜିଲାରେ ଥିବା ବିଶ୍ୱ ପ୍ରସିଦ୍ଧ ମହିମା ଧର୍ମର ପୀଠ ମହିମାଗାଦି ଯୋରନ୍ଦାରେ ମଙ୍ଗଳବାର ରାଜ୍ୟ ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶରେ ଗାଦି ମନ୍ଦିର ତୃତୀୟ ବେଢା ମଧ୍ୟରୁ ଚିହ୍ନଟ ଜବରଦଖଲ ଜମିରେ ନିର୍ମିତ ବତୀ ମନ୍ଦିର, ଧୂନୀମନ୍ଦିର ଓ ଟୁଙ୍ଗିକୁ ଉଚ୍ଛେଦ କରାଯାଇଛି। ୪ ପ୍ଲାଟୁନ ସଶସ୍ତ୍ର ପୋଲିସ ଫୋର୍ସ ଓ ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ ୩ଟି ଜେସିବି ସାହାଯ୍ୟରେ ଉଚ୍ଛେଦ କରାଯାଇଛି। ଆଇନଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ଉକ୍ତ ଅଞ୍ଚଳରେ ୧୪୪ଧାରା ଜାରି ରହିଛି। ଏହି ଘଟଣାରେ ସମ୍ପୂର୍ଣ୍ଣ ଭାବେ ଭାଙ୍ଗି ପଡିଛନ୍ତି କୌପୀନଧାରୀ ମହିମା ସମାଜ। ବୁଧବାର ଘଟଣାସ୍ଥଳରେ ବତୀ ମନ୍ଦିର ଓ ଧୂନୀ ମନ୍ଦିରର ଭଙ୍ଗାରୁଜା ପଥରଗୁଡିକ ପଡିିଥିବା ଦେଖାଯାଇଛି। ଏ ସମ୍ପର୍କରେ ଜାଣିବା ପରେ କେନ୍ଦ୍ର ସରକାରଙ୍କ ଶିକ୍ଷା, ଦକ୍ଷତା ବିକାଶ ଓ ଉଦ୍ୟମତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଟୁଇଟ୍ ଯୋଗେ ବୁଧବାର ଦୁଃଖ ପ୍ରକାଶ କରିଛନ୍ତି। କୋର୍ଟଙ୍କ ନିର୍ଦ୍ଦେଶ ପରେ ରାଜ୍ୟ ସରକାର ପ୍ରଥମେ ସାଧୁସନ୍ଥମାନଙ୍କ ସହିତ ଆଲୋଚନା କରି ଥଇଥାନ କରିବା ପରେ ପଦକ୍ଷେପ ନେଇଥିଲେ ଉଚିତ ହୋଇଥାନ୍ତା ବୋଲି କେନ୍ଦ୍ରମନ୍ତ୍ରୀ ଟୁଇଟ୍ରେ ଉଲ୍ଲେଖ କରିଛନ୍ତି। ମହିମାଗାଦି ଯୋରନ୍ଦାରେ ଥିବା ୯୫ବର୍ଷର ପୁରାତନ ମନ୍ଦିର ଗୁଡିକ ଭଙ୍ଗାଯିବାର ଦୃଶ୍ୟ ଦେଖି ମନ କଷ୍ଟ ହେଲା। ଏହି ଘଟଣା ଦେଶର ମହିମା ଧର୍ମାବଲମ୍ବୀଙ୍କ ଆସ୍ଥା ଓ ବିଶ୍ୱାସକୁ ବହୁତ ଆଘାତ ଦେଇଛି। ଏ ସମ୍ପର୍କରେ ଜିଲାପାଳଙ୍କ ସହିତ କଥା ହୋଇଛି। ଉଭୟ ପକ୍ଷର ପରମପୂଜ୍ୟ ସାଧୁସନ୍ଥ ମାନେ ନିଜ ନିଜ ଭିତରେ ଆଲୋଚନା କରି ସମସ୍ୟାର ସମାଧାନ ରାସ୍ତା ବାହାର କଲେ ସମାଜକୁ ଠିକ୍ ମାର୍ଗଦର୍ଶନ ମିଳିବ ବୋଲି କେନ୍ଦ୍ରମନ୍ତ୍ରୀ ଟୁଇଟ୍ରେ ଆଶାବ୍ୟକ୍ତ କରିଛନ୍ତି। ଅପରପକ୍ଷରେ ବୁଧବାର ମଧ୍ୟ ଜବରଦଖଲ ଉଚ୍ଛେଦ ସ୍ଥାନରେ ସଶସ୍ତ୍ର ପୋଲିସ ମୁତୟନ ହୋଇଛନ୍ତି। ଏ ସମ୍ପର୍କରେ ବକଳଧାରୀ ମହିମା ସମାଜ ମୁଖ୍ୟ ବାବା ନିତ୍ୟାନନ୍ଦ ଦାସ କହିଛନ୍ତି, ଆମେ ଚାହୁଁଛୁ ସମସ୍ତେ ମିଳିମିଶି ରୁହନ୍ତୁ। ମକଦ୍ଦମା ଉଠାଇ ଦିଅନ୍ତୁ। ସେମାନେ ବତୀ ମନ୍ଦିର କି ଅନ୍ୟା ଯାହା କରିବେ, ସେଥିପାଇଁ ଆମେ ଜାଗା ଛାଡିଦେବୁ। ଏ ସଂକ୍ରାନ୍ତରେ କୌପୀନଧାରୀ ମହିମା ସମାଜ ମୁଖ୍ୟ ଶ୍ରୀମଦ ରଘୁନାଥ ବାବା କହିଛନ୍ତି, ସମସ୍ତଙ୍କ ବିବେକ ଓ ଜ୍ଞାନ ରହିଛି। ଯାହା ହେଇଗଲା ଜନସାଧାରଣ କହିବେ ଭଲ କି ଖରାପ ହୋଇଛି। ଜନସାଧାରଣ ଯାହା ରାୟ ଦେବେ ଆମେ ତାକୁ ମାନିନେବୁ ବୋଲି ସେ କହିଛନ୍ତି। ଏ ସଂକ୍ରାନ୍ତରେ ଢେଙ୍କାନାଳ ଉପଜିଲାପାଳ ସିଗ୍ଧାରାଣୀ ଧଳ କହିଛନ୍ତି, ବୁଧବାର ଘଟଣାସ୍ଥଳରେ ପରିବେଶ ଶାନ୍ତ ଥିଲା। କୌଣସି ଅସୁବିଧା ବା ସମସ୍ୟା ହୋଇନାହିଁ।
