ବାରିପଦା,୨୭।୧୨(ନୀଳାଦ୍ରି ବିହାରୀ ଦଣ୍ଡପାଟ): ବାରିପଦା ସଦର ଥାନା ଅଧୀନ ଗୁମୁ ଗ୍ରାମ ନିକଟସ୍ଥ ବୁଢାବଳଙ୍ଗ ନଦୀପଠାରୁ ଜନୈକ ବ୍ୟକ୍ତିଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର ଘଟଣାରେ ପୋଲିସ ୨ଜଣକୁ ଗିରଫ କରିଛି। ଅଭିଯୁକ୍ତ ଜଣେ ହେଲେ ଆଶିଷ ସିଂ ଏବଂ ଅନ୍ୟ ଜଣେ ଜାମବଣୀ ଅଞ୍ଚଳର ବୋଲି ଜଣାପଡିଛି। ମୃତକ ହେଲେ କେନ୍ଦ୍ରାପଡ଼ା ଜିଲା ମାର୍ଶାଘାଇ ଥାନା ହିନ୍ଦୁଳିଆ ଗ୍ରାମର ଚନ୍ଦନ ସ୍ବାଇଁ।
ମିଳିଥିବା ସୂଚନା ମୁତାବକ, ଚନ୍ଦନଙ୍କ ସହିତ ୪ ସାଙ୍ଗ ଶନିବାର ଭୋଜି କରିବାକୁ ଯାଇଥିଲେ। ହେଲେ ଚନ୍ଦନ ଘରକୁ ଫେରି ନ ଥିଲେ। ସନ୍ଧ୍ୟାରେ ଚନ୍ଦନଙ୍କୁ ଅପହରଣ କରି ନିଆଯାଇଥିବା ପରିବାର ଲୋକଙ୍କୁ ଫୋନ କରି କେତେଜଣ ବ୍ୟକ୍ତି ଟଙ୍କା ମାଗିଥିଲେ। ଏନେଇ ଭୁବନେଶ୍ୱରରେ ରହୁଥିବା ପରିବାର ଲୋକେ ଘଟଣା ସମ୍ପର୍କରେ ଖାରବେଳନଗର ଥାନାରେ ଅଭିଯୋଗ କରିଥିଲେ।
ଏଭଳିସ୍ଥିତିରେ ବୁଢାବଳଙ୍ଗ ନଦୀ ପଟାରେ ଜଣେ ବୃକ୍ତିଙ୍କ ଅର୍ଦ୍ଧଦଗ୍ଧ ମୃତଦେହ ବାଲିରେ ପୋତା ହୋଇଥିବା ବେଳେ ବାହାରକୁ ହାତ ବାହାରିଥିବା ଦେଖି ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିଲା।
ତଦନ୍ତ ବେଳେ ମୃତକଙ୍କ ପକେଟରୁ ଦୁଇଟି ଫୋନ ନମ୍ବର ଏବଂ ଜୁଏଲାରୀ ଦୋକାନର ଏକ ରସିଦ ପୋଲିସ ଜବତ କରିଥିଲା । ଏହାକୁ ନେଇ ପୋଲିସ ଛାନଭିନ୍ ଆରମ୍ଭ କରିଥିଲା। ତଦନ୍ତ ପରେ ପୋଲିସ ଘଟଣାର ୨୪ ଘଣ୍ଟା ମଧ୍ୟରେ ହତ୍ୟାକାଣ୍ଡରେ ସମ୍ପୃକ୍ତ ଦୁଇ ଅଭିଯୁକ୍ତଙ୍କୁ ଗିରଫ କରି ଅଧିକ ପଚରାଉଚରା କରୁଛି।
ସୂଚନାଯୋଗ୍ୟ, ପୋଲିସ ବାଲେଶ୍ୱର ଷ୍ଟେଶନରୁ ସମ୍ପୃକ୍ତ ଜଣେ ଅଭିଯୁକ୍ତଙ୍କୁ ଗିରଫ କରି ପଚରାଉଚରା ପରେ ଅନ୍ୟଜଣେ ଅଭିଯୁକ୍ତଙ୍କୁ ଧରିବାରେ ସଫଳ ହୋଇଛି। ତେବେ ହତ୍ୟାକାଣ୍ଡରେ ଜଡିତ ସମସ୍ତ ଅପରାଧିକୁ ପୋଲିସ ଧରିବା ନେଇ ତନାଘନା ଆରମ୍ଭ କରିଛି। ସମସ୍ତ ଅଭିଯୁକ୍ତଙ୍କୁ ଧରିବା ପରେ ଏକ ଖବରଦାତା ସମ୍ମିଳନୀରେ ହାତ୍ୟାକାଣ୍ଡର ସମ୍ପୂର୍ଣ୍ଣ ତଥ୍ୟ ଦିଆଯିବ ବୋଲି ଥାନା ଅଧିକାରୀ ମଧୁସ୍ମିତା ମହାନ୍ତି ପ୍ରକାଶ କରିଛନ୍ତି । ପୋଲିସ ଏନେଇ ଏକ ହତ୍ୟା ମାମଲା ରୁଜୁ କରିଛି।
