ତେହେରାନ,୧୦।୧୨: ସେପ୍ଟେମ୍ବର ଶେଷରେ ଯେତେବେଳେ ଇସ୍ରାଏଲର ଏୟାର ଷ୍ଟ୍ରାଇକ୍ରେ ଇରାନର ସବୁଠାରୁ ଶକ୍ତିଶାଳୀ ହିଜବୁଲାର ମୁଖ୍ୟ ହାସନ ନାସରାଲ୍ଲାଙ୍କୁ ହତ୍ୟା କରାଯାଇଥିଲା, ସେତେବେଳେ ଏହା ତେହେରାନକୁ ଏକ ବଡ଼ ଝଟକା ଲାଗିଥିଲା। ଦୁଇମାସ ପରେ ଇରାନର ପ୍ରମୁଖ ସହଯୋଗୀ ସିରିଆ ରାଷ୍ଟ୍ରପତି ବାଶାର ଅଲ-ଅସଦ ଦେଶ ଛାଡି ପଳାୟନ କରିଥିଲେ। ଅସଦ ଶାସନର ପତନ ପରେ ଇରାନର ପ୍ରତିରୋଧ ମୋର୍ଚ୍ଚା ବିଚ୍ଛିନ୍ନ ହୋଇଛି। ସିରିଆର ପତନ ପରେ ପରବର୍ତ୍ତୀ ପାଳି ଇରାନର ପଡିପାରେ ବୋଲି ଆଲୋଚନା ତୀବ୍ର ହୋଇଛି।
ଜେରୁଜେଲମ ପୋଷ୍ଟର ବିଶେଷଜ୍ଞମାନେ ଅନୁମାନ କରିଛନ୍ତି ଯେ, ଅସଦ ଶାସନର ପତନ ପରେ ଯେଉଁମାନଙ୍କୁ ସବୁଠୁ ବଡ଼ ଝଟ୍କା ଲାଗିଛି ସେମାନଙ୍କ ମଧ୍ୟରେ ଇରାନ ଶୀର୍ଷରେ ରହିଛି। ଦ୍ୱିତୀୟରେ ରହିଛି ଲେବନାନର ହିଜବୁଲା। ଋଷିଆ ଅସଦଙ୍କୁ ସବୁଠାରୁ ଅଧିକ ସମର୍ଥନ କରୁଥିଲା କିନ୍ତୁ ସିରିଆରେ ଏହାର ପୁଞ୍ଜି ବିନିଯୋଗ ଇରାନ ଭଳି ନ ଥିଲା।
ଅସଦଙ୍କ ପତନ ଇରାନକୁ ସବୁଠୁ ଅଧିକ ଚକିତ କରିଛି। ଅସଦଙ୍କ ପତନ କେବଳ ଇରାନ ପାଇଁ ରଣନୈତିକ ଝଟକା ନୁହେଁ। ଘରୋଇ ସ୍ତରରେ ଏହା ଏକ ବଡ ପ୍ରଭାବ ପକାଇପାରେ। ଅସଦଙ୍କ ଶାସନ ପରି ଅଲି ଖାମେନେଇଙ୍କ ନିଷ୍ଠୁର ଶାସନ ବିରୋଧରେ ଚାପା ବିରୋଧ ଧୀରେଧୀରେ ତେଜିବାରେ ଲାଗିଛି। ତେବେ ଇରାନରେ ସିରିଆ ଭଳି ସମାନ ଘଟଣା ଘଟିବ ବୋଲି କହିବା ଠିକ୍ ହେବନାହିଁ ବୋଲି ବିଶେଷଜ୍ଞମାନେ କହିଛନ୍ତି। ଇରାନର ଏକ ଶକ୍ତିଶାଳୀ ସେନା ଏବଂ ଆଭ୍ୟନ୍ତରୀଣ ସୁରକ୍ଷା ବାହିନୀ ରହିଛି।
ଇରାନରେ ପରିବର୍ତ୍ତନ ଆଣିବାକୁ ଚାହୁଁଥିବା ଲୋକଙ୍କ ପାଇଁ ଅସଦଙ୍କ ପତନ ଏକ ଶକ୍ତିଶାଳୀ ପ୍ରେରଣା ସାଜିପାରେ। ଯଦି ଅସଦଙ୍କୁ ଶାସନରୁ ହଟାଯାଇପାରୁଛି, ତେବେ ଖାମେନେଙ୍କୁ ମଧ୍ୟ ହଟାଯାଇପାରିବ। ଏଥିସହ, ମାସେତଳେ ଡୋନାଲ୍ଡ ଟ୍ରମ୍ପଙ୍କ ଶାସନକୁ ଫେରିବା ଇରାନ ସରକାରଙ୍କ ଟେନଶନ ବଢାଇପାରେ।
