ବେତନଟୀ, ୧୧ା୯ (ସ୍ବ.ପ୍ର.): ବଳାତ୍କାର ମାମଲାରେ ଛନ୍ଦିହୋଇ ଜେଲ୍ ଯିବା ପରେ ମାମଲାରୁ ମୁକୁଳିବାକୁ ବିବାହ କଲେ। ପରେ ପୁଣି ଅଧିକ ଯୌତୁକ ନିର୍ଯାତନା ଦାବି କରି ମହିଳାଙ୍କୁ ଘରୁ ତଡ଼ିଦେଲେ। ପୋଲିସ ଅଭିଯୁକ୍ତ ଶାଶୁଙ୍କୁ ଗିରଫ କରିଥିବା ବେଳେ ସ୍ବାମୀ ଫେରାର ହୋଇଯାଇଛନ୍ତି। ଏପରି ଘଟଣା ଘଟିଛି ମୟୂରଭଞ୍ଜ ଜିଲା ବେତନଟୀ ଥାନା ଅନ୍ତର୍ଗତ ଇନ୍ଦିରାନଗର ଗ୍ରାମରେ।
ଇନ୍ଦିରାନଗରର ସ୍ବରୂପ ବେହେରା ଓ ପୀଡ଼ିତା ମହିଳାଙ୍କ ମଧ୍ୟରେ ଏକ ବାହାଘର ଉତ୍ସବରେ ଦେଖାସାକ୍ଷାତ ହୋଇଥିଲା। ଉଭୟଙ୍କ ମଧ୍ୟରେ ପ୍ରେମ ସଂପର୍କ ଗଢ଼ିଉଠିଥିଲା। ପରେ ପୀଡ଼ିତାଙ୍କ ଘରେ କେହି ନ ଥିବାର ସୁଯୋଗ ନେଇ ସ୍ବରୂପ ଜବରଦସ୍ତ ତାଙ୍କୁ ବଳାତ୍କାର କରିଥିଲେ। ପୋଲିସ ସ୍ବରୂପଙ୍କୁ ଗିରଫ କରି କୋର୍ଟଚାଲାଣ କରିଥିଲା। ଜାମିନ ନାମଞ୍ଜୁର ହେବା ପରେ ତାଙ୍କୁ ଜେଲ ଯିବାକୁ ପଡ଼ିଥିଲା। ଏହି ମାମଲାରୁ ମୁକୁଳିବା ପାଇଁ ୨୦୧୫ରେ ସ୍ବରୂପ ପୀଡ଼ିତା ମହିଳାଙ୍କୁ ବିବାହ କରିଥିଲେ। ଦୀର୍ଘ ୭ବର୍ଷ ପରେ ଶୁକ୍ରବାର ପୁଣି ସ୍ବାମୀ ଓ ଶାଶୁ ମିଶି ନିର୍ଯାତନା ଦେଇ ଘରୁ ତଡ଼ିଦେଇଥିବା ବେତନଟୀ ଥାନାରେ ପୀଡ଼ିତା ଅଭିଯୋଗ କରିଛନ୍ତି। ପୋଲିସ ଅଭିଯୁକ୍ତ ଶାଶୁ ରେବତୀ ବେହେରାଙ୍କୁ ଗିରଫ କରିଥିବା ବେଳେ ସ୍ବାମୀ ସ୍ବରୂପ ଫେରାର ହୋଇଯାଇଛନ୍ତି।
