କେନ୍ଦୁଝର,୧୭ା୧(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ସଦର ବ୍ଲକ ପଦ୍ମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଆମ୍ବୁଲାନ୍ସ ନ ଥିବାରୁ ରୋଗୀ ସ୍ଥାନାନ୍ତରରେ ବିଳମ୍ବ ହେଉଛି। ଫଳରେ ଅନେକ ସମୟରେ ଅସନ୍ତୋଷ ଦେଖାଦେଉଛି। ଏଭଳି ଜଣେ ରୋଗୀଙ୍କୁ ବିଳମ୍ବରେ ସ୍ଥାନାନ୍ତର କରାଯିବା ଘଟଣାକୁ ନେଇ ଉକ୍ତ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି। ସ୍ଥାନୀୟ କାଦଗଡ଼ ଗ୍ରାମରେ ମକରମେଳା ଦେଖି ଚାଲିଚାଲି ଫେରୁଥିବା ଜଣେ ବ୍ୟକ୍ତିଙ୍କୁ କୌଣସି ଏକ ଗାଡ଼ି ଧକ୍କା ଦେଇଥିଲା। ପଦ୍ମପୁର ପଞ୍ଚାୟତରେ ରହୁଥିବା ଏକ ଆମ୍ବୁଲାନ୍ସ ତୁରନ୍ତ ଉକ୍ତ ଘଟଣାସ୍ଥଳକୁ ଯାଇ ଉଦ୍ଧାର କରି ପଦ୍ମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଡାକ୍ତରଙ୍କ ପ୍ରାଥମିକ ଚିକିତ୍ସା ପରେ ଦେହ ଓ ମୁହଁରୁ ବହୁ ମାତ୍ରାରେ ରକ୍ତସ୍ରାବ ହେଉଥିବାରୁ ତାଙ୍କୁ କେନ୍ଦୁଝର ମୁଖ୍ୟାଳୟ ମେଡିକାଲକୁ ସ୍ଥାନାନ୍ତର କରିବା ପାଇଁ ଆମ୍ବୁଲାନ୍ସରେ ନେବାକୁ କହିଥିଲେ। ମାତ୍ର ଆମ୍ବୁଲାନ୍ସ ଯାଇ ପାରିବ ନାହିଁ କେବଳ ତାଙ୍କର ଆଖପାଖ ଅଞ୍ଚଳର ରୋଗୀଙ୍କୁ ଆଣି ଏହି ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିବା ଏ ଆମ୍ବୁଲାନ୍ସର କାର୍ଯ୍ୟ ବୋଲି କହିଥିଲେ। ଏପଟେ ଦୁର୍ଘଟଣା ଶିକାର ହୋଇଥିବା ବ୍ୟକ୍ତି ଜଣକ ଗୁରୁତର ଅବସ୍ଥାରେ ପଡ଼ି ବିକଳ ହୋଇ ଚିତ୍କାର କରୁଥାନ୍ତି। ଖବର ପାଇ ଯୁବ ଓ ଶ୍ରମ ବିକାଶ ମଞ୍ଚ କେନ୍ଦୁଝରଗଡ଼ ସଭାପତି ରଞ୍ଜନ କୁମାର ବେହେରା ଘଟଣାସ୍ଥଳରେ ପହଞ୍ଚି ଜିଲା ମୁଖ୍ୟଚିକିତ୍ସା ଅଧିକାରୀଙ୍କୁ ଫୋନ୍ ମାଧ୍ୟମରେ ଅବଗତ କରିଥିଲେ। ତେବେ ପଦ୍ମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ସ୍ଥାୟୀ ଭାବେ ଆମ୍ବୁଲାନ୍ସ ଦିଆଯିବ। ଯେଉଁ ଆମ୍ବୁଲାନ୍ସ କି କେବଳ ପଦ୍ମପୁର ସ୍ବାସ୍ଥ୍ୟକେନ୍ଦ୍ରରୁ କେନ୍ଦୁଝର ମେଡିକାଲକୁ ସ୍ଥାନାନ୍ତର କେସ୍ ହିଁ ନିଆଯିବ ବୋଲି କର୍ତ୍ତୃପକ୍ଷ କହିଥିଲେ। ପ୍ରାୟ ୩ ଘଣ୍ଟା ବେଡ୍ରେ ପଡ଼ି ରହିବା ପରେ ୧୦୮ ଆମ୍ବୁଲାନ୍ସ ସହାୟତାରେ କେନ୍ଦୁଝର ବଡ଼ ମେଡିକାଲକୁ ଉକ୍ତ ଦୁର୍ଘଟଣାଗସ୍ତ ଗୁରୁତର ବ୍ୟକ୍ତି ଜଣଙ୍କୁ ସ୍ଥାନାନ୍ତର କରାଯାଇଛି।
