ବ୍ରହ୍ମପୁର ଅଫିସ,୧୫।୨: ଗଜପତି ଜିଲାରେ ୨୫ ବର୍ଷ ତଳେ ହୋଇଥିବା ଏକ ସରକାରୀ ଅର୍ଥ ହେରଫେର ମାମଲାର ମଙ୍ଗଳବାର ଶୁଣାଣି କରିଛନ୍ତି ବ୍ରହ୍ମପୁର ସ୍ବତନ୍ତ୍ର ଭିଜିଲାନ୍ସ ଜଜ୍ । ପ୍ରମାଣ ଅଭାବରୁ ସେ ତତ୍କାଳୀନ ଜିଲାପାଳଙ୍କ ସମେତ ୧୦ ଜଣଙ୍କୁ ନିର୍ଦ୍ଦୋଷ ସାବ୍ୟସ୍ତ କରିଛନ୍ତି। ସେମାନେ ହେଲେ ତତ୍କାଳୀନ ଗଜପତି ଜିଲାପାଳ ସନ୍ତୋଷ କୁମାର ମିଶ୍ର, ତତ୍କାଳୀନ ଏଡିଏମ୍ କୃଷ୍ଣଚନ୍ଦ୍ର ମିଶ୍ର, ତତ୍କାଳୀନ ଅଫିସ ଇନ୍ଚାର୍ଜ ଭାସ୍କର ପଟ୍ଟନାୟକ (ଓଏଏସ୍), ଇନ୍ଚାର୍ଜ ଚିତ୍ତରଞ୍ଜନ ପାତ୍ର(ଓଏଏସ୍), ତତ୍କାଳୀନ କାଶୀ ନଗର ବିଡିଓ ନବୀନ ଚନ୍ଦ୍ର ପ୍ରଧାନ, ତତ୍କାଳୀନ ଗୋଷାଣୀ ବିଡିଓ ହରିହର ମଲିକ, ତତ୍କାଳୀନ ନୂଆଗଡ଼ ବିଡିଓ ବିଶ୍ୱନାଥ ମଲିକ, ତତ୍କାଳୀନ ଆର.ଉଦୟଗିରି ବିଡିଓ କ୍ଷୀରାବ୍ଧି ବେହେରା, ତତ୍କାଳୀନ ମୋହନା ବିଡିଓ ଇସ୍ମାଇଲ ଗୁରୁ ଓ ଅନ୍ୟ ଜଣେ ମୋହନାର ଗାଡ଼ି ଯୋଗାଣକାରୀ ଆହୋସ ଜେନା। ମାମଲାର ବିଚାର ବେଳେ ଏଡିଏମ୍ କୃଷ୍ଣଚନ୍ଦ୍ର ମିଶ୍ର ଓ ତତ୍କାଳୀନ ମୋହନା ବିଡିଓ ଇସ୍ମାଇଲ ଗୁରୁଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ସମସ୍ତେ ଅବସର ଗ୍ରହଣ କରିସାରିଛନ୍ତି।
ଯେ, ଗଞ୍ଜାମ-ଗଜପତି ଅବିଭକ୍ତ ଜିଲା ଥିବା ବେଳେ ୧୯୯୨ ଅକ୍ଟୋବରରେ ସ୍ବତନ୍ତ୍ର ଭାବେ ଗଜପତି ଜିଲା ଗଠନ ହୋଇଥିଲା। କେନ୍ଦ୍ର ସରକାରଙ୍କ ପକ୍ଷରୁ ୭୬ ଲକ୍ଷ ୮୮ହଜାର ଟଙ୍କା ଓ ରାଜ୍ୟ ସରକାରଙ୍କ ପକ୍ଷରୁ ୨୦ ଲକ୍ଷ ଟଙ୍କା ଏପରି ମୋଟ ୯୬ ଲକ୍ଷ ୮୮ହଜାର ଟଙ୍କା ଗଜପତି ଜିଲା ସାକ୍ଷରତା ପରିଷଦକୁ ମଞ୍ଜୁର ହୋଇଥିଲା। ୧୯୯୩ -୯୪ ଆର୍ଥିକ ବର୍ଷରେ ଗଜପତି ଜିଲା ସର୍ବଶିକ୍ଷା ଅଭିଯାନରେ ଖାତା, ବହି, ସ୍ଲେଟ୍, ପେନ୍ସିଲ, ଗାଡି ଯୋଗାଣ ଇତ୍ୟାଦି ବାବଦରେ ୧୬ଲକ୍ଷ ୫୦ହଜାର ଟଙ୍କା ହେରଫେର ହୋଇଥିବା ନେଇ ଭିଜିଲାନ୍ସ ନିକଟରେ ଅଭିଯୋଗ ହୋଇଥିଲା। ଘଟଣାର ଅନୁସନ୍ଧାନ କରି ୧୯୯୮ ଜାନୁୟାରୀ ୧୧ରେ ତତ୍କାଳୀନ ଭିଜିଲାନ୍ସ ଇନ୍ସପେକ୍ଟର ଦେବଦତ୍ତ ପଟ୍ଟନାୟକ ନଂ.୬/୯୮ରେ ଏକ ମାମଲା ରୁଜୁ କରିଥିଲେ। ଉପରୋକ୍ତ ସରକାରୀ ଅର୍ଥ ଆତ୍ମସାତ୍ ଅଭିଯୋଗରେ ତତ୍କାଳୀନ ଜିଲାପାଳ ସନ୍ତୋଷ କୁମାର ମିଶ୍ରଙ୍କ ସମେତ ୧୦ ଜଣଙ୍କ ନାମରେ ମାମଲା ରୁଜୁ କରିଥିଲା। ପରେ ସେ କୋର୍ଟରେ ଚାର୍ଜଶିଟ ଦାଖଲ କରିଥିଲେ। ମାମଲାର ବିଚାର ବେଳେ କୋର୍ଟରେ ୨୮ ଜଣ ସାକ୍ଷୀଙ୍କ ବୟାନ ରେକର୍ଡ କରାଯାଇଥିଲା। ମଙ୍ଗଳବାର ମାମଲାର ଶୁଣାଣି ବେଳେ ତତ୍କାଳୀନ ଜିଲାପାଳ ସନ୍ତୋଷ କୁମାର ମିଶ୍ରଙ୍କ ସମେତ ଅନ୍ୟମାନଙ୍କୁ ହାଜର କରାଯାଇଥିଲା। ଜଜ୍ ସାକ୍ଷୀଙ୍କ ବୟାନ ଓ ଭିଜିଲାନ୍ସ ପକ୍ଷରୁ କୋର୍ଟରେ ଦାଖଲ ହୋଇଥିବା ଚାର୍ଜଶିଟ୍୍କୁ ଆଧାର କରି ପ୍ରମାଣ ମିଳି ନ ଥିବାରୁ ସେ ଉପରୋକ୍ତ ରାୟ ପ୍ରକାଶ କରିଛନ୍ତି। ସରକାରଙ୍କ ପକ୍ଷରୁ ପିପି ସୁରେନ୍ଦ୍ର ପଣ୍ଡା ଓ ମୁଦାଲାଙ୍କ ପକ୍ଷରୁ ବରିଷ୍ଠ ଆଇନଜୀବୀ ପ୍ରସାଦ କୁମାର ପଟ୍ଟନାୟକ ଓ ପ୍ରଦୀପ କୁମାର ପାଣିଗ୍ରାହୀ ମକଦ୍ଦମା ପରିଚାଳନା କରିଥିଲେ।
