କେସିଙ୍ଗା, ୧।୭(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ଅନ୍ତର୍ଗତ କୁର୍ଲୁପଡ଼ା ଗ୍ରାମର କଲେକ୍ଟରପଡ଼ାରେ ବସବାସ କରୁଥିବା ପ୍ରାୟ ୩୨ଟି ଗରିବ ପରିବାର ଗତ ୨୨ ବର୍ଷ ଧରି ଏଠାରେ ରହୁଥିଲେ ମଧ୍ୟ ସେମାନଙ୍କୁ ପାନୀୟଜଳ, ବିଦ୍ୟୁତ, ଆବାସ ଯୋଜନା, ରାସ୍ତା ଘାଟରୁ ବଞ୍ଚିତ ହୋଇ ବହୁ ଅସୁବିଧାରେ କାଳାତିପାତ କରୁଛନ୍ତି। ଏପର୍ଯ୍ୟନ୍ତ ଆଧାର କାର୍ଡ ସମେତ ଅନ୍ୟାନ୍ୟ ମୌଳିକ ପରିଚୟପତ୍ରରୁ ବଞ୍ଚିତ ରହିଥିବା ପଡ଼ାବାସୀ ଅଭିଯୋଗ କରିଛନ୍ତି। ଫଳରେ ସେମାନେ ବିଭିନ୍ନ ସରକାରୀ ଯୋଜନା ଓ ସୁବିଧାର ଲାଭ ପାଇବାରେ ଅସୁବିଧାର ସମ୍ମୁଖୀନ ହେଉଛନ୍ତି।
ସୂଚନା ଅନୁସାରେ, ପ୍ରାୟ ୨୨ ବର୍ଷ ପୂର୍ବେ କେସିଙ୍ଗା ରେଳ ଷ୍ଟେଶନ ନିକଟସ୍ଥ କୁଡ଼ାପଡ଼ା ଅଞ୍ଚଳରୁ ଏହି ପରିବାରମାନଙ୍କୁ ସେତେବେଳର ଜିଲାପାଳ ସ୍ଥାନାନ୍ତର କରି କୁର୍ଲୁପଡ଼ା ନିକଟ ଜଙ୍ଗଲ ସଂଲଗ୍ନ ଅଞ୍ଚଳରେ ବସବାସ ପାଇଁ ବ୍ୟବସ୍ଥା କରିଥିଲେ। ସେହି ଦିନଠାରୁ କଲେକ୍ଟର ପଡ଼ାରେ ନାମିତ ହୋଇଛି।
ବର୍ତ୍ତମାନ ଉକ୍ତ ଅଞ୍ଚଳ ଇଡକୋ (IDCO) ଅଧୀନକୁ ଯାଇଥିବାରୁ ସେମାନଙ୍କୁ ସ୍ଥାନ ଖାଲି କରିବାକୁ କୁହାଯାଉଥିବା ଅଭିଯୋଗ ହୋଇଛି। ଦିନମଜୁରି କରି ପରିବାର ପ୍ରତିପୋଷଣ କରୁଥିବା ଏହି ପରିବାରଗୁଡ଼ିକ ଏବେ ଉଚ୍ଛେଦ ଭୟରେ ଦିନ କାଟୁଛନ୍ତି। ଆମେ ଯଦି ଏଠାରୁ ଉଚ୍ଛେଦ ହେବୁ, ତେବେ ଯିବୁ କେଉଁଠି? ବୋଲି ସେମାନେ ପ୍ରଶ୍ନ କରିଛନ୍ତି।
ସରକାର କେହି ବାସହରା ହେବେ ନାହିଁ ବୋଲି କେନ୍ଦ୍ର ଓ ରାଜ୍ୟ ସରକାର ଡିଣ୍ଡିମ ପିଟୁଥୁବା ବେଳେ, କଲେକ୍ଟରପଡ଼ା ବାସିନ୍ଦାଙ୍କ ସ୍ଥିତି ତାହାର ବିପରୀତ ଚିତ୍ର ପ୍ରଦର୍ଶନ କରୁଥିବା ଅଭିଯୋଗ ଉଠିଛି। ସେମାନଙ୍କୁ ତୁରନ୍ତ ଆଧାର କାର୍ଡ ସମେତ ସମସ୍ତ ମୌଳିକ ପରିଚୟପତ୍ର ପ୍ରଦାନ କରିବା ସହ ପାନୀୟଜଳ, ବିଦ୍ୟୁତ ସେବା, ପ୍ରଧାନମନ୍ତ୍ରୀ ଆବାସ ଯୋଜନା, ରାସ୍ତା ର୍ନିମାଣ କରିବା ସହଏହି ସବୁ ସ୍ଥାୟୀ ବସବାସର ବ୍ୟବସ୍ଥା କରିବାକୁ ସ୍ଥାନୀୟ ପଡ଼ାବାସୀ ଏମଏସଏମଇ ପାର୍କ ଉଦଘାଟନ ଦିବସରେ ଜିଲାପାଳ ଓ ଏମପିଙ୍କୁ ଦାବି କରିଥିଲେ।
ଜିଲାପାଳଏହି ଅଭିଯୋଗ ଜାଣିଲା ପରେ କେସିଙ୍ଗା ତହସିଲଦାର ପ୍ରଶାନ୍ତି ପ୍ରଧାନ ଏବଂ ଗୋଷ୍ଠୀ ଉନ୍ନୟନ ଅଧିକାରୀ (ବିଡିଓ) ଜନ୍ମେଜୟ ସ୍ବାଇଁ , କସୃପଡା ରାଜସ୍ବ ନିରୀକ୍ଷକ ସୁରେଶ ବିଶ୍ୱାଳ ତଦନ୍ତ କରିବାକୁ ନିର୍ଦ୍ଦେଶ ଦେଇଥିଲେ। ପ୍ରଶାସନ ଉକ୍ତ କଲେକ୍ଟରପଡ଼ାକୁ ପହଞ୍ଚି ବାସିନ୍ଦାଙ୍କ ସହ ଆଲୋଚନା କରିଥିଲେ। ସେମାନଙ୍କ ସମସ୍ୟାର ସମାଧାନ ଦିଗରେ ପଦକ୍ଷେପ ନେବା ସହ ଯୋଗ୍ୟ ହିତାଧିକାରୀଙ୍କୁ ଜମି ପ୍ରଦାନ ପାଇଁ ପଦକ୍ଷେପ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେବା ସହ ପାନୀୟଜଳ, ବିଦ୍ୟୁତ ଯୋଗାଇ ଦେବା ପାଇଁ ପ୍ରତିଶ୍ରୁତି ଦେଇଥିଲେ।
Dharitri – Odisha’s No.1 Odia Daily
