କାବୁଲ,୧୫।୧୨: ଆଫଗାନିସ୍ଥାନର ରାଜଧାନୀ କାବୁଲର ଉପ ରାଜ୍ୟପାଳ ଓ ତାଙ୍କ ସହାୟକ ବିସ୍ଫୋରଣରେ ପ୍ରାଣ ହରାଇଛନ୍ତି। ଏ ନେଇ ଦେଶର ଗୃହ ମନ୍ତ୍ରଣାଳୟ ପକ୍ଷରୁ ସ୍ପଷ୍ଟ କରାଯାଇଛି। ଉପ ରାଜ୍ୟପାଳ ମେହବୁବୁଲା ମୋହେବି ମଙ୍ଗଳବାର ତାଙ୍କ ସୁରକ୍ଷାକର୍ମୀଙ୍କ ସହ ଅଫିସକୁ ଫେରୁଥିବାବେଳେ ତାଙ୍କ କାର ଉପରକୁ ଜଣେ ଅଜ୍ଞାତ ବ୍ୟକ୍ତି ଡୋଟୋନେଟର ଫିଙ୍ଗି ଥିଲେ।
ବିସ୍ଫୋରଣରେ ଉପ ରାଜ୍ୟପାଳ ମେହବୁବୁଲା ଓ ତାଙ୍କ ସେକ୍ରେଟାରୀଙ୍କ ମୃତ୍ୟୁ ହୋଇଥିବାବେଳେ ଦୁଇ ଜଣ ସୁରକ୍ଷା କର୍ମୀ ଆହତ ହୋଇଛନ୍ତି। ତେବେ ଏହି ବିସ୍ଫୋରଣ ଲାଗି କୌଣସି ସଙ୍ଘଠନ ନିଜକୁ ଦାୟୀ କରି ନାହାନ୍ତି।
ଦେଶରେ ଶାନ୍ତି ଫେରାଇ ଆଣିବା ପାଇଁ ତାଲିବାନ ଆତଙ୍କବାଦୀ ସଙ୍ଘଠନ ଓ ସରକାରଙ୍କ ମଧ୍ୟରେ ଆଲୋଚନା ଚାଲିଛି। ହେଲେ ପୂରା ଦେଶରେ ଆକ୍ରମଣ ବନ୍ଦ ହୋଇନାହିଁ। ମୁଖ୍ୟତଃ ଦେଶର ରାଜଧାନୀରେ ସାମ୍ବାଦିକ, ରାଜନେତାଙ୍କ ଭଳି ଦେଶର ପ୍ରମୁଖ ବ୍ୟକ୍ତିଙ୍କୁ ଟାର୍ଗେଟ କରୁଛନ୍ତି ଆତଙ୍କବାଦୀମାନେ।
