ନୂଆଦିଲ୍ଲୀ,୩୧।୧: ଚାମ୍ପିଅନ୍ସ ଟ୍ରଫିର ଠିକ୍ ପୂର୍ବରୁ ଅବସର ଘୋଷଣା କରି ଚମକାଇଲେ ଜଣେ ଲୋକପ୍ରିୟ କ୍ରିକେଟର। ଫଳରେ ତାଙ୍କର ଅନ୍ତର୍ଜାତୀୟ କ୍ୟାରିୟରରେ ବ୍ରେକ ଲାଗିଛି। ସେ ହେଲେ ଆଫଗାନିସ୍ତାନ କ୍ରିକେଟର ଶାପୁର ଜାଦ୍ରାନ। ୩୭ ବର୍ଷ ବୟସରେ ସେ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି। କ୍ରିକେଟର ସମସ୍ତ ଫର୍ମାଟରୁ ନିଜକୁ ଦୂରେଇ ନେଇଛନ୍ତି। ଶାପୁର ଜଣେ ଦ୍ରୁତ ବୋଲର ଥିଲେ। ଏବେ ତାଙ୍କ ବୋଲିଂର ଯାଦୁ କ୍ରିକେଟ ମଇଦାନରେ ଦେଖିବାକୁ ମିଳିବ ନାହିଁ। ସେ ଫେସବୁକ୍ରେ ଏକ ଲମ୍ବା ପୋଷ୍ଟ ଲେଖି ତାଙ୍କର ଅବସର ଘୋଷଣା କରିଛନ୍ତି।
ଜାଦ୍ରାନ ଜାନୁଆରୀ ୩୦ରେ ଏକ ଫେସବୁକ ପୋଷ୍ଟ ମାଧ୍ୟମରେ ତାଙ୍କର ଅବସର ଘୋଷଣା କରିଛନ୍ତି। ସେ ପୋଷ୍ଟରେ ଲେଖିଛନ୍ତି, ‘ସନ୍ୟାସ। ଆଜି ଏପରି ଦିନ ଯାହାକୁ ମୁଁ କେବେ ସାମ୍ନା କରିବାକୁ ଚାହୁଁ ନ ଥିଲି, କିନ୍ତୁ ଏହା ଶେଷରେ ପ୍ରତ୍ୟେକ ଖେଳାଳିଙ୍କ ଜୀବନରେ ଆସେ। କ୍ରିକେଟ ପ୍ରତି ୨୨ ବର୍ଷର ସେବା, ତ୍ୟାଗ ଏବଂ ପ୍ରେମ ପରେ, ମୁଁ ଆନୁଷ୍ଠାନିକ ଭାବରେ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରୁଛି। ଏହା ମୋ ଜୀବନର ସବୁଠାରୁ କଠିନ ନିଷ୍ପତ୍ତି ମଧ୍ୟରୁ ଗୋଟିଏ କାରଣ କ୍ରିକେଟ ମୋ ପାଇଁ କେବଳ ଏକ ଖେଳ ନୁହେଁ, ଏହା ମୋର ଆଗ୍ରହ, ମୋର ପରିଚୟ ଏବଂ ମୋର ଉଦ୍ଦେଶ୍ୟ ରହି ଆସିଛି।
ଜାଦ୍ରାନ ଆହୁରି ଲେଖିଛନ୍ତି, ‘ପିଲାଦିନରୁ ମୁଁ ଆଫଗାନିସ୍ତାନ ପକ୍ଷରୁ ଖେଳିବାର ସ୍ବପ୍ନ ଦେଖୁଥିଲି। ଏବେ ପଛକୁ ଫେରି ଚାହିଁଲେ ମୁଁ ଅନ୍ତର୍ଜାତୀୟସ୍ତରରେ ଆମ ଦେଶର ପତାକାର ସମ୍ମାନ ବଢ଼ାଇବାରେ ଭୂମିକା ଗ୍ରହଣ କରିଥିବାରୁ ଗର୍ବିତ।’ ଆଫଗାନ କ୍ରିକେଟର ସବୁଠାରୁ ଚ୍ୟାଲେଞ୍ଜିଂ ସମୟରେ ମୋର ଯାତ୍ରା ଆରମ୍ଭ ହୋଇଥିଲା। ମୁଁ ଅସୁବିଧାର ସମ୍ମୁଖୀନ ହେଲି। ମୁଁ ସୀମିତ ସମ୍ବଳ ସହିତ ଖେଳିଲି ଏବଂ ଅନେକ ବାଧା ଅତିକ୍ରମ କଲି, କିନ୍ତୁ ମୁଁ କେବେ ବିଶ୍ୱାସ ହରାଇ ନ ଥିଲି। କ୍ରିକେଟ ପ୍ରଶଂସକ, ମୋର ସାଥୀ ଖେଳାଳି, ପ୍ରଶିକ୍ଷକ ଏବଂ ବିଶେଷକରି ମୋ ପରିବାରର ସମର୍ଥନ ମୋତେ ପ୍ରତ୍ୟେକ କଷ୍ଟକୁ ଦୂର କରିବାରେ ସାହାଯ୍ୟ କରିଥିଲା। ଏହି ଲମ୍ବା ଯାତ୍ରା ସମୟରେ ମୋ ସହିତ ଠିଆ ହୋଇଥିବା ସମସ୍ତଙ୍କୁ ମୁଁ ହୃଦୟର ସହିତ ଧନ୍ୟବାଦ ଜଣାଉଛି। ମୋ ପରିବାର, ବନ୍ଧୁ, ପ୍ରଶଂସକ ଏବଂ ଆଫଗାନିସ୍ତାନର ଲୋକଙ୍କ ପ୍ରେମ, ପ୍ରାର୍ଥନା ଏବଂ ଅତୁଟ ସମର୍ଥନ ମୋର ସବୁଠାରୁ ବଡ଼ ଶକ୍ତି ହୋଇଛି।
ଜାଦ୍ରାନ ୨୦୦୯ରେ ତାଙ୍କର ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିଲେ। ସେ ତାଙ୍କର ଶେଷ ମ୍ୟାଚ୍ ୨୦୨୦ ମାର୍ଚ୍ଚରେ ଖେଳିଥିଲେ। ଜାଦ୍ରାନ ୨୦୧୫ ବିଶ୍ୱକପରେ ଆଫଗାନିସ୍ତାନ ଦଳର ଅଂଶ ଥିଲେ। ଏହି ସମୟ ମଧ୍ୟରେ, ଯେତେବେଳେ ଆଫଗାନିସ୍ତାନ ବିଶ୍ୱକପ ଇତିହାସରେ ସ୍କଟଲାଣ୍ଡ ବିପକ୍ଷରେ ପ୍ରଥମ ବିଜୟ ହାସଲ କରିଥିଲା, ସେତେବେଳେ ବିଜୟୀ ରନ ଜାଦ୍ରାନଙ୍କ ବ୍ୟାଟରୁ ଆସିଥିଲା।
