ଢେଙ୍କାନାଳ ଅଫିସ, ୨୦।୯ – ପ୍ରଶାସନ ଆଖିରେ ଧୂଳିଦେଇ ସୁରକ୍ଷିତ ଭାବେ ପଥର ଚୋରା ଚାଲାଣ କରିବାକୁ କରାଯାଇଛି ହ୍ବାଟ୍ସ ଆପ୍ ଗ୍ରୁପ୍। ତହସିଲ କର୍ମଚାରୀଙ୍କ ଉପରେ ନଜର ରଖୁଛନ୍ତି ପଥର ମାଫିଆ। ଚଢ଼ାଉ ପାଇଁ ଯାଉଥିବା ଗାଡ଼ିର ନମ୍ବର କ’ଣ, ଏହା କେଉଁ ରାସ୍ତାରେ ଯାଉଛି, ପଥର ଖାଦାନଠାରୁ କେତେ ଦୂରରେ ରହିଛି ସେ ସମ୍ପର୍କିତ ସବିଶେଷ ସୂଚନା ତତ୍କ୍ଷଣାତ୍ ଗ୍ରୁପ୍ରେ ଦିଆଯାଉଛି। ଟେକ୍ନୋଲୋଜିର ଅପବ୍ୟବହାର କରି ଏକ ନିର୍ଦ୍ଦିଷ୍ଟ ଗୋଷ୍ଠୀ ଏପରି କାର୍ଯ୍ୟ କରୁଥିବା ଢେଙ୍କାନାଳ ଜିଲା ପ୍ରଶାସନକୁ ତଥ୍ୟ ମିଳିଛି। ଏହାପରେ ପ୍ରଶାସନ ଏବଂ ପଥର ଚାଲାଣକାରୀଙ୍କ ମଧ୍ୟରେ ଚାଲିଥିବା ଛକାପଞ୍ଝା ଆହୁରି ତୀବ୍ର ହୋଇଛି। ତହସିଲ ପକ୍ଷରୁ ଧରପଗଡ଼ ଅଭିଯାନ ଜୋରଦାର କରାଯାଇଥିବାବେଳେ ପଥର ମାଫିଆଙ୍କ ମଧ୍ୟରେ କୋକୁଆଭୟ ସୃଷ୍ଟି ହୋଇଛି।
ବେଆଇନ ପଥର ଖାଦାନରୁ ଚୋରା ଚାଲାଣ ରୋକିବା ପାଇଁ ଢେଙ୍କାନାଳ ଜିଲା ପ୍ରଶାସନ ପକ୍ଷରୁ ବ୍ଲୁପ୍ରିଣ୍ଟ ପ୍ରସ୍ତୁତ କରାଯାଇଛି। ପ୍ରଶାସନ, ରାଜସ୍ବ ବିଭାଗ, ପୋଲିସର ଘନଘନ ଚଢ଼ାଉ ପଥର ଚାଲାଣକାରୀଙ୍କ ମୁଣ୍ଡବ୍ୟଥା ବଢ଼ାଇଛି। ଏଥିରୁ ବର୍ତ୍ତିବାକୁ ଓଡ଼ାପଡ଼ା ତହସିଲ ଅଞ୍ଚଳର ଚୋରା ପଥର ବ୍ୟବସାୟୀ ହ୍ବାଟ୍ସଆପ୍ ଗ୍ରୁପ୍ କରିଥିବା ଜଣାପଡ଼ିଛି। ଗତ ୮ ତାରିଖରେ ଉକ୍ତ ହ୍ବାଟ୍ସଆପ୍ ଗ୍ରୁପ୍ର ଜଣେ ସଦସ୍ୟଙ୍କ ମୋବାଇଲ ଜବତ କରାଯିବା ପରେ ଚୋରାପଥର ଚାଲାଣ ସମ୍ପର୍କରେ ଅନେକ ତଥ୍ୟ ପଦାକୁ ଆସିଛି। ମୋବାଇଲ ଯାଞ୍ଚରୁ ଚଢ଼ାଉରେ ସାମିଲ ହୋଇଥିବା ଅଧିକାରୀମାନେ ବ୍ୟବହାର କରୁଥିବା ବୋଲେରୋ (ନଂ. ଓଡ଼ି ୦୬ ସି ୩୧୦୯) କୁଆଡ଼େ ଯାଉଛି ସେ ସମ୍ପର୍କରେ ଭଏସ୍ ରେକର୍ଡିଂ ଏବଂ ଚାଟ୍ ମାଧ୍ୟମରେ ସୂଚନା ଦିଆଯାଉଥିବା ଜଣାପଡ଼ିଛି। ଏ ନେଇ ତହସିଲଦାର ସାଗରିକା ସାହୁ ମୋଟଙ୍ଗା ଥାନାରେ ବିଧିବଦ୍ଧ ଅଭିଯୋଗ କରିବା ସହିତ ଜବତ ମୋବାଇଲକୁ ପୋଲିସ ଜିମାରେ ଦେଇଛନ୍ତି। ଏ ସମ୍ପର୍କରେ ଜିଲାପାଳ ଓ ଏସ୍ପିଙ୍କୁ ଲିଖିତ ଭାବେ ଅବଗତ ମଧ୍ୟ କରାଯାଇଛି ା ଥାନାରେ ନଂ. ୧୯୦/୨୦ରେ ମାମଲା ରୁଜୁ ହୋଇଛି। ସେହିପରି ଗଁଦିଆ ତହସିଲ ଅନ୍ତର୍ଗତ ନିହଲପ୍ରସାଦ ଥାନା ଅସନବାହାଳି ଏବଂ ଟୋଲରପଶି ଅଞ୍ଚଳର ଜଙ୍ଗଲ ଜମିକୁ ଦୈନିକ ୬୦ରୁ ୭୦ ଗାଡିରେ ବ୍ୟାପକ ପଥର ଚୋରା ଚାଲାଣ କରାଯାଉଥିବା ଜଣାପଡ଼ିଛି। ଅପରପକ୍ଷେ ଏହି ଘଟଣା ପରେ ପ୍ରଶାସନ ପକ୍ଷରୁ ଚଢ଼ାଉକୁ ଜୋର୍ଦାର କରାଯାଇଛି। ଶନିବାର ସକାଳେ ଓଡ଼ାପଡ଼ା ତହସିଲ ଅଧୀନ ରାଣୀବଣିଆ ଅଞ୍ଚଳରେ ଚାଲିଥିବା ବେଆଇନ ପଥର ଖାଦାନରେ ଚଢ଼ାଉ କରି ୫ ପଥର ବୋଝେଇ ଟିପ୍ପର ଜବତ କରାଯାଇଛି। ଜବତ ଟିପ୍ପରକୁ ଗୁଡିଆକାଟେଣୀସ୍ଥିତ ପୋଲିସ ବିଟ୍ ହାଉସ ଜିମା ଦିଆଯାଇଛି। ଜିଲାପାଳ ଭୂମେଶ ଚନ୍ଦ୍ର ବେହେରାଙ୍କ ନିର୍ଦ୍ଦେଶରେ ଉପଜିଲାପାଳ ସାଫଲ୍ୟ ମଣ୍ଡିତ ପ୍ରଧାନଙ୍କ ନେତୃତ୍ୱରେ ତହସିଲଦାର ସାଗରିକା ସାହୁ, ରାଜସ୍ବ ବିଭାଗ ଅଧିକାରୀ ଏବଂ ପୋଲିସ ଉପସ୍ଥିତିରେ ଏହି ଚଢ଼ାଉ କରାଯାଇଥିଲା।
ଏ ନେଇ ଉପଜିଲାପାଳ କୁହନ୍ତି, ଓଡାପଡା ତହସିଲ ଅଞ୍ଚଳରେ ପଥର ମାଫିଆମାନେ ମୋବାଇଲ ଫୋନ୍ରେ ମା’ ରାମଚଣ୍ଡୀ ଗ୍ରୁପ୍ ନାମକ ଏକ ଗ୍ରୁପ୍ କରିଛନ୍ତି। ସେମାନେ ପ୍ରଶାସନିକ ଅଧିକାରୀଙ୍କ ଉପରେ ନଜର ରଖୁଛନ୍ତି। ତଥାପି ପ୍ରଶାସନ ପକ୍ଷରୁ ଚଢ଼ାଉ ଜାରି ରହିଛି। ମୋଟଙ୍ଗା ଥାନାଧିକାରୀ ସରୋଜିନୀ ସାମ୍ବାଡ୍ କୁହନ୍ତି, ତହସିଲଦାରଙ୍କ ଅଭିଯୋଗକୁ ଭିତ୍ତି କରି ଏକ ମାମଲା ରୁଜୁ ହୋଇଛି। ତଦନ୍ତ ଜାରି ରହିଛି। ଫେରାର ଅଭିଯୁକ୍ତଙ୍କୁ ଧରିବା ପାଇଁ ଚଢ଼ାଉ କରାଯାଉଛି।
