ପୁରୁଷୋତ୍ତମପୁର,୩୦/୭ (ସବିତା ମିଶ୍ର) ଗଞ୍ଜାମ ଜିଲା ପୁରୁଷୋତ୍ତମପୁର ରଥସାହିରେ ଏକ ଅଭାବନୀୟ ଘଟଣା ଚର୍ଚ୍ଚିତ ବିଷୟ ପାଲଟିଥିଲା। ସବୁଥାଇ ମଧ୍ୟ ପରିବାର ଓ ସମ୍ପର୍କିୟମାନେ ମୁହଁ ଫେରାଇ ଚାଲିଯାଇଛନ୍ତି ।ଫଳରେ ଏବେ ବେସାହାରା ହୋଇପଡିଛନ୍ତି ମାନସିକବିକାରଗ୍ରସ୍ତ ୨ ପୁଅ। ଏହାକୁ ନେଇ ସାହିବାସିନ୍ଦାଙ୍କ ପକ୍ଷରୁ ପ୍ରଶାସନର ଦୃଷ୍ଟି ଆକର୍ଷଣ କରାଯାଇଥିବା ବେଳେ ତିନିଦିନ ବିତିଥିଲେ ସୁଦ୍ଧା କାହାରି ହେଲେ ଦେଖାମିଳିନି। ଏହାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଉଥିବା ବେଳେ ସହାୟତାର ହାତ ବଢାଇଛନ୍ତି ଖଲ୍ଲିକୋଟ ବିଧାୟକଙ୍କ ପ୍ରତିନିଧି ସୁଦର୍ଶନ ବେହେରା ।
ବ୍ରହ୍ମପୁର ସଦରଥାନା ଅନ୍ତର୍ଗତ କୁକୁଡାଖଣ୍ଡି ଗ୍ରାମର ଚନ୍ଦ୍ରଶେଖର ପଟ୍ଟନାୟକ ଦୀର୍ଘ ୪୦ବର୍ଷ ତଳେ ପୁରୁଷୋତ୍ତମପୁରକୁ ଶିକ୍ଷକତା କରିବାକୁ ଆସି ରଥସାହିରେ ଘରଦ୍ବାର କରି ପତ୍ନୀ ଇନ୍ଦିରା(୭୫)ଙ୍କ ସମେତ ଦୁଇପୁଅ ଶୁଶାନ୍ତ (୫୫) ଓ ପ୍ରଶାନ୍ତ(୫୨)ଙ୍କୁ ନେଇ ବସବାସ କରୁଥିଲେ । ଇତି ମଧ୍ୟରେ ଦୁଇପୁଅ ମାନସିକ ବିକାରଗ୍ରସ୍ତ ହୋଇପଡିଥିବା ବେଳେ ଚନ୍ଦ୍ରଶେଖରଙ୍କ ଗତ ବର୍ଷେତଳେ ମୃତ୍ୟୁ ଘଟିଥିଲା। ବୃଦ୍ଧା ମହିଳା ଇନ୍ଦିରା ବହୁକଷ୍ଟରେ ମାନସିକ ବିକାରଗ୍ରସ୍ଥ ଦୁଇପୁଅଙ୍କୁ ନେଇ ଚଳାଉଥିବାବେଳେ ସେ କୌଣସି କାରଣରୁ ମୃତ୍ୟୁବରଣ କରି ଦୀର୍ଘ ଦିନଧରି ଘରେ ପଡିରହିଥିଲେ ।ହେଲେ ଦୁଇପୁଅ ମାନସିକ ବିକାରଗ୍ରସ୍ତ ଯୋଗୁ ମାଙ୍କ ମରଶରିର ନିକଟରେ ରହି ମଧ୍ୟ ମୃତ୍ୟୁ ସମ୍ପର୍କରେ ଆଦୌ ଜାଣି ପାରିନଥିଲେ ।
ଶେଷରେ ସୋମବାର ଘରୁ ଦୁର୍ଗନ୍ଧ ବାହାରିବାରୁ ସାହିପଡିଶାଲୋକେ ସନ୍ଦେହ କରି ସମ୍ପର୍କୀୟମାନଙ୍କୁ ଖବର ଦେଇଥିଲେ । ହେଲେ ବୃଦ୍ଧା ଇନ୍ଦିରାଙ୍କ ପରିବାର ଓ ସମ୍ପର୍କୀୟମାନେ କୁକୁଡାଖଣ୍ଡି ଗ୍ରାମରୁ ଆସି ମୃତଦେହକୁ ଦେଖି ମୁହଁ ଫେରାଇ ଚାଲିଯାଇଥିଲେ। ଶେଷରେ ରଥସାହିର ଯୁବଗୋଷ୍ଠୀ, ପୁରୁଷୋତ୍ତମପୁର ଆଇଆଇସି କୁଳମଣି ସେଠୀ ଓ ଖଲ୍ଲିକୋଟ ବିଧାୟକଙ୍କ ପ୍ରତିନିଧି ସୁଦର୍ଶନ ବେହେରାଙ୍କ ସହାୟତାରେ ମୃତଦେହ ସତ୍କାର କରାଯାଇଥିଲା। ଦୁଇପୁଅ ମାନସିକ ବିକାରଗ୍ରସ୍ତ ହୋଇଥିବା ହେତୁ ଏମାନେ ବଞ୍ଚିବା ଲାଗି ସରକାର ଓ ଜିଲାପ୍ରଶାସନ ସହାୟତାର ହାତବଢାଇ ଏମାନଙ୍କୁ ଥଇଥାନଲାଗି ପଦକ୍ଷେପ ନେବାକୁ ଜନସାଧାରଣ ଦାବି କରିଥିବା ବେଳେ ଏହାକୁ ତିନିଦିନ ବିତିଥିଲେ ସୁଦ୍ଧା କୌଣସି ହେଲେ ପ୍ରଶାସନର ଦେଖାମିଳିନି । ଯାହାଦ୍ବାରା ଦୁଇପୁଅ ବେସାହାରା ହୋଇ ଭୋକଉପାସରେ ପଡିଛନ୍ତି। ଏହାକୁ ନେଇ ବିଧାୟକଙ୍କ ପ୍ରତିନିଧି ସୁଦର୍ଶନ ବେହେରା ତାଙ୍କ ଘରନିକଟକୁ ଯାଇ ଦୁଇପୁଅଙ୍କୁ ସହାୟତାର ହାତ ବଢାଇଥିବା ବେଳେ ଏହାକୁ ନେଇ ବିଧାୟକକୁ ଜଣାଇ ଏମାନଙ୍କ ଯେପରି ଥଇଥାନ ହୋଇପାରିବା ସହ ସେମାନେ କିପରି ମୁଠାଏ ଖାଇ ବଞ୍ଚିପାରିବେ ସେଥିନେଇ ପଦକ୍ଷେପ ନେବେ ବୋଲି କହିଛନ୍ତି ।
