ସୁନ୍ଦରଗଡ଼,୨୫।୩(ଡି.ଏନ.ଏ.): ଦିନକୁ ଦିନ ସୁନ୍ଦରଗଡ଼ ସହରରେ ଲୋକସଂଖ୍ୟା ବୃଦ୍ଧି ପାଉଥିବାବେଳେ ରାସ୍ତାଘାଟ ଓ ଛକ ସ୍ଥାନଗୁଡିକରେ ଟ୍ରାଫିକ ସମସ୍ୟା ମଧ୍ୟ ଜଟିଳ ହେବାକୁ ଲାଗିଲାଣି। ଦୋକାନ ବଜାର ବଢିଚାଲିଥିବାବେଳେ ପୂଜା ପାର୍ବଣ ସମୟରେ ଅଣଓସାରିଆ ରାସ୍ତାଘାଟ ଓ ସଙ୍କୁଚିତ ଛକ ସ୍ଥାନଗୁଡିକରେ ପରିସ୍ଥିତି ଅଧିକ ଜଟିଳ ହେଉଛି। ଫଳରେ ପୁରୁଣା ବସଷ୍ଟାଣ୍ଡ ଛକ ନିକଟରେ ନିର୍ମାଣାଧୀନ ଏକ ସରକାରୀ କ୍ବାର୍ଟର୍ସକୁ ନେଇ ସ୍ଥାନୀୟ ଜନସାଧାରଣ ଓ ପ୍ରଶାସନ ମଧ୍ୟରେ ମୁହାଁମୁହିଁ ଅବସ୍ଥା ହେବା ଦେଖାଯାଇଛି। ପୁରୁଣା ବସଷ୍ଟାଣ୍ଡ ପାଲ ହୋଟେଲ ସାମ୍ନାରେ ଅତିରିକ୍ତ ଜିଲାପାଳଙ୍କ ଦ୍ବିତୀୟ କ୍ବାର୍ଟର୍ସ ନିର୍ମାଣ କାର୍ଯ୍ୟକୁ ସ୍ଥାନୀୟ ଜନସାଧାରଣ ବିରୋଧ କରିଛନ୍ତି। ଏହାକୁ ନେଇ ବିଗତ କିଛିଦିନ ହେବ ସ୍ଥାନୀୟ ବାସିନ୍ଦା ଓ ପ୍ରଶାସନ ମୁହାଁମୁହିଁ ଅବସ୍ଥାକୁ ଆସିଥିବାବେଳେ ଏହି କିସମ ନଜୁଲ ଥିବା ଓ କିଛିଦିନ ଆଗରୁ ଏହାର କିସମକୁ ଘରବାରି କରାଯାଇଥିବା ସ୍ଥାନୀୟ ଜନସାଧାରଣ ଅଭିଯୋଗ କରି ଏହାର ନିର୍ମାଣ କାର୍ଯ୍ୟକୁ ଶୁକ୍ରବାର ବନ୍ଦକରି ଏନେଇ ଏକ ପ୍ରତିନିଧି ଦଳ ଜିଲାପାଳ ଡାକ୍ତର ପରାଗ ହର୍ଷଦ ଗାଭାଲିଙ୍କୁ ସାକ୍ଷାତକରି ଦାବିପତ୍ର ପ୍ରଦାନ କରିଛନ୍ତି। ଏଥିରେ ଦର୍ଶାଯାଇଛି ଯେ, ଏହି ନିର୍ମାଣାଧୀନ ଜାଗାଟି ପୁରୁଣା ବସଷ୍ଟାଣ୍ଡ ଛକ ସାମ୍ନାରେ ଥିବାରୁ ଏହି ସ୍ଥାନରେ ମାର୍କେଟ କମ୍ପ୍ଲେକ୍ସ ତିଆରି କରାଗଲେ ସ୍ଥାନୀୟ ବେକାର ଯୁବକମାନେ ଦୋକାନ କରି ନିଜର ଗୁଜୁରାଣ ମେଣ୍ଟାଇ ପାରନ୍ତେ। ଏହି ଦାବି ନେଇ ପୁରୁଣା ବସଷ୍ଟାଣ୍ଡ ଅଞ୍ଚଳର ଜନସାଧାରଣ ଜିଲାପାଳଙ୍କ ସମେତ ପୌରାଧ୍ୟକ୍ଷା, ଉପପୌରାଧ୍ୟକ୍ଷଙ୍କୁ ସାକ୍ଷାତକରି ଦାବିପତ୍ର ପ୍ରଦାନ କରି କୌଣସି ପ୍ରକାରେ ଏହି ସ୍ଥାନରେ ସରକାରୀ କ୍ବାର୍ଟର୍ସ ତିଆରି କରାଇ ଦିଆଯିବ ନାହିଁ ବୋଲି ଚେତାବନୀ ଦେଇଛନ୍ତି। ପୌରାଧ୍ୟକ୍ଷା ତନୟା ମିଶ୍ର, ଉପାଧ୍ୟକ୍ଷ ଲଲାଟେନ୍ଦୁ ପରିଡା, ପୂର୍ବତନ ନଗରପାଳ ବେଣୁଧର ତାଣ୍ଡିଆ ଓ ସ୍ଥାନୀୟ କାଉନସିଲରମାନେ ନିର୍ମାଣଧୀନ ସ୍ଥାନ ପରିଦର୍ଶନ କରି ସ୍ଥାନୀୟ ଜନସାଧାରଣଙ୍କ ସହିତ ଆଲୋଚନା କରିଛନ୍ତି।
