ବାଉଁଶୁଣୀ,୨୨।୧୦(ଡି.ଏନ୍.ଏ.): ବୌଦ୍ଧ ଜିଲା ବାଉଁଶୁଣୀ ବଜାର ଅଞ୍ଚଳରେ ଜବରଦଖଲ ଉଚ୍ଛେଦ ପାଇଁ ଆକ୍ସନ ମୋଡ଼ରେ ପ୍ରଶାସନ ରହିଛି। ଫଳରେ ଦୋକାନକରି ପରିବାର ଚଳାଉଥିବା ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ବାଉଁଶୁଣୀ ବଜାର ରାସ୍ତା କଡ଼ରେ ଅନେକ ବର୍ଷ ହେଲା ଛୋଟ ଛୋଟ ଦୋକାନ କରି ପରିବାର ପ୍ରତିପୋଷଣ କରିଆସୁଥିଲେ ଅନେକ ଦୋକାନୀ। ଗତ ସୋମବାର ଆମ୍ବଝରି ପଞ୍ଚାୟତରେ ଜିଲାପାଳ ଏବଂ ଆରକ୍ଷୀ ଅଧୀକ୍ଷକଙ୍କ ଅଭିଯୋଗ ଶୁଣାଣି ଶିବିର ସମାପ୍ତ କରି ଫେରିବା ବାଟରେ ଅଚାନକ ବାଉଁଶୁଣୀ ହସ୍ପିଟାଲ ପରିଦର୍ଶନ କରିଥିଲେ। ହସ୍ପିଟାଲ ସାମ୍ନାରେ ଥିବା ଦୋକାନଗୁଡ଼ିକ ପାଇଁ ଟ୍ରାଫିକ ସମସ୍ୟା ଉପୁଜୁଥିବା ନେଇ ତୁରନ୍ତ ସେହି ଦୋକାନଗୁଡ଼ିକୁ ହଟାଇବା ପାଇଁ ଜିଲାପାଳ ସତ୍ୟରଞ୍ଜନ ସାହୁ ବାଉଁଶୁଣୀ ରାଜସ୍ବ ନିରୀକ୍ଷକଙ୍କୁ ନିର୍ଦ୍ଦେଶ ଦେଇଥିଲେ। ପରେ ବାଉଁଶୁଣୀ ବସଷ୍ଟାଣ୍ଡରୁ ଗୁନ୍ଦୁଲିଆ ରାସ୍ତା, ଥାନା ରୋଡ ସହିତ ଏନ୍ଏଚର ଦୁଇ କଡରେ ଜବରଦଖଲ କରି ରହିଥିବା ଦୋକାନଗୁଡ଼ିକୁ ୭ ଦିନ ମଧ୍ୟରେ ହଟାଇବାକୁ କହିଥିଲେ। କିନ୍ତୁ ବ୍ୟବସାୟୀମାନେ ଘର ଭାଙ୍ଗିବାକୁ କିଛି ଦିନ ସମୟ ମାଗିଥିଲେ। ହେଲେ କୌଣସି ଅଧିକାରୀ ଶୁଣି ନ ଥିଲେ। ଯାହାକି ନିରାଶ ହୋଇ ଉଠାଦୋକାନୀମାନେ ଜାଗା ଛାଡ଼ିବାକୁ ବାଧ୍ୟ ହୋଇଥିଲେ। ଗୁରୁବାର ଅତିରିକ୍ତ ତହସିଲଦାର ମନୋରଞ୍ଜନ ସୁନାଙ୍କ ସହ ବାଉଁଶୁଣୀ ରାଜସ୍ବ ନିରୀକ୍ଷକ, ଗୁନ୍ଦୁଲିଆ ରାଜସ୍ବ ନିରୀକ୍ଷକ ଏବଂ ଅନ୍ୟ କର୍ମଚାରୀମାନେ ମିଳିତ ଭାବେ ସରକାରୀ ସ୍ଥାନକୁ ନାଲିଗାର ଟାଣି ଚିହ୍ନଟ କରିଥିଲେ। ସେହି ସମୟରେ କିଛି ଲୋକ ଆମେ ଭାଙ୍ଗିବା ପାଇଁ ରାଜି ଅଛୁ, ଆମକୁ ଦୀପାବଳି ପର୍ଯ୍ୟନ୍ତ ସମୟ ଦିଅନ୍ତୁ ବୋଲି ନେହୁରା ହୋଇଥିଲେ। ହେଲେ ଆମକୁ ଜିଲାପାଳ ଯେଉଁ ଦିନଠୁ ସମୟ ଦେଇଛନ୍ତି ସେହିଦିନଠାରୁ ୭ ଦିନ ମଧ୍ୟରେ ଜାଗା ଖାଲି କରିବାକୁ ପଡ଼ିବ ବୋଲି ଅତିରିକ୍ତ ତହସିଲଦାର କହିଥିଲେ। ସେହି ଦିନଠୁ ହିସାବ କଲେ ଦୀପାବଳି ପୂର୍ବ ଦିନ ପଡୁଛି। ଯାହାକି ଏବର୍ଷ ଦୀପାବଳି ଫିକା ପଡ଼ିପାରେ ବୋଲି ଲୋକଙ୍କ ମଧ୍ୟରେ ଆଲୋଚନା ହେଉଛି। ତେବେ ଅସ୍ଥାୟୀ ଭାବେ ଦୋକାନ କରି ନିଜ ପରିବାର ପ୍ରତିପୋଷଣ କରୁଥିବାରୁ ପ୍ରଶାସନର ଏପରି ତରବରିଆ ନିଷ୍ପତ୍ତି ଯୋଗୁ ଲୋକେ ଅସନ୍ତୋଷ ପ୍ରକାଶ କରିଛନ୍ତି। ପୂର୍ବରୁ କୌଣସି ସୂଚନା ନ ଦେଇ ହଠାତ ଉଚ୍ଛେଦକୁ ବ୍ୟବସାୟୀମାନେ ସମାଲୋଚନା କରିଛନ୍ତି। ତୁରନ୍ତ ଉଠାଦୋକାନୀଙ୍କୁ ଆଗ ଥଇଥାନ କରି ପରେ ଉଚ୍ଛେଦ କରିବାକୁ ଜନସାଧାରଣରେ ଦାବି ହେଉଥିବାବେଳେ ବାରମ୍ବାର ଟ୍ରାଫିକ ସମସ୍ୟା ଉପୁଜୁ ଥିବାରୁ ପୂର୍ବରୁ ଜବରଦଖଲ ଉଚ୍ଛେଦ ପାଇଁ ବାଉଁଶୁଣୀ ନାଗରିକ କମିଟି ଅନେକ ଥର ଦାବି କରୁଥିଲେ। ଯାହାକି ଏବେ ତାହା ସଫଳ ହେବାରେ ଲାଗିଛି।
