ବ୍ରହ୍ମପୁର ଅଫିସ,୨୬।୧୦: ଗଞ୍ଜାମ ଜିଲାରେ ଦିନକୁ ଦିନ ନିଶା କାରବାର ବୃଦ୍ଧି ପାଉଛି। ମଦ, ଗଞ୍ଜେଇ, ବ୍ରାଉନ୍ସୁଗାର ଭଳି ନିଶା କବଳରେ ପଡ଼ି ବହୁ ଲୋକ ବିପଥଗାମୀ ହେଉଛନ୍ତି। ପରିସ୍ଥିତି ଏମିତି ହେଉଛି, ନିଶାସକ୍ତମାନେ ନିଶା ସେବନ ପାଇଁ ହତ୍ୟା କରିବାକୁ ମଧ୍ୟ ପଛାଉ ନାହାନ୍ତି। ଗଞ୍ଜାମ ଜିଲାରେ ବିଗତ ଦିନରେ ଏଭଳି ବହୁ ଘଟଣା ଦୃଷ୍ଟିକୁ ଆସିଛି। ଏହି ନିଶା ପାଇଁ ଗତ ପ୍ରାୟ ୨ ମାସ ମଧ୍ୟରେ ୫ ଜଣଙ୍କୁ ହତ୍ୟା କରି ସାରିଲେଣି ନିଶାସକ୍ତମାନେ। ଏହି ଅଭ୍ୟାସ ପାଇଁ ମାଫିଆମାନେ ମଧ୍ୟ ବେଶ୍ ସକ୍ରିୟ ହୋଇ ଉଠିଛନ୍ତି। ଫଳରେ ବ୍ରହ୍ମପୁର ସହରରେ ଏବେ ଖୋଲାଖୋଲି ବ୍ରାଉନ୍ ସୁଗାର ବିକ୍ରି ହେଉଥିବା ବେଳେ ସହରଠାରୁ ଗଁା ସବୁ ଜାଗାରେ ଘରେ ଘରେ ନକଲି ମଦ ତିଆରି ହେଉଛି। ବାରମ୍ବାର ଏଭଳି କାରବାର ଠାବ ହେଉଥିଲେ ସୁଦ୍ଧା ଜିଲାରେ ବେଆଇନ ନିଶା ବେପାର ବନ୍ଦ ହେଉ ନାହିଁ। ଅଧିକାଂଶ ଅପରାଧ ପଛରେ ନିଶା ହିଁ ଦାୟୀ। ଆଉ କେତେବେଳେ ନିଶା ସେବନ ପାଇଁ ନିଜର ସ୍ତ୍ରୀ ଓ ମା’ଙ୍କୁ ମଧ୍ୟ ହତ୍ୟା କରିବାକୁ ପଛାଉ ନାହାନ୍ତି ନିଶାସକ୍ତ। ଆସିକା ସହରରେ ଗତ ୯ ତାରିଖରେ ମଦ ପିଇବାକୁ ଟଙ୍କା ନ ଦେବାରୁ ସ୍ତ୍ରୀଙ୍କୁ ଛୁରି ଭୁସି ହତ୍ୟା କରିଥିଲେ ସ୍ବାମୀ।
ସିନେମା ହଲ ନିକଟସ୍ଥ ଚୌଧୁରୀ ନିବାସରେ ଲକ୍ଷ୍ମୀପ୍ରିୟା ମିଶ୍ର ଓ ସ୍ବାମୀ ସୀମାଞ୍ଚଳ ମିଶ୍ର ରହୁଥିଲେ। ସୀମାଞ୍ଚଳ ପ୍ରତିଦିନ ନିଶାସକ୍ତ ଅବସ୍ଥାରେ ଘରେ ଗଣ୍ଡଗୋଳ କରୁଥିଲେ। ଅକ୍ଟୋବର ୯ ରେ ସ୍ତ୍ରୀ ଲକ୍ଷ୍ମୀପ୍ରିିୟା ଟଙ୍କା ଦେବାକୁ ମନା କରିବାରୁ ସୀମାଞ୍ଚଳ ତାଙ୍କୁ ଛୁରି ଭୁସି ହତ୍ୟା କରିଥିଲେ। ସେହିପରି ଅକ୍ଟୋବର ୭ରେ ତାରସିଂ ଥାନା ଗଜାପଦର ଗ୍ରାମରେ ନିଶାସକ୍ତ ପୁଅର ଲୁହା ପାଇପ୍ ମାଡ଼ରେ ମା’ର ମୃତ୍ୟୁ ଘଟିଥିଲା। ତ୍ରିବେଣୀ ନାଇକଙ୍କ ପୁଅ ସନାତନ ନିଶାସକ୍ତ ଅବସ୍ଥାରେ ଘରେ ଝଗଡ଼ା କରୁଥିଲେ। ୭ ରାତିରେ ଆମିଷ ରାନ୍ଧିବା ପାଇଁ ସନାତନ ମା’ ତ୍ରିବେଣୀଙ୍କୁ କହିଥିଲେ। ଆମିଷ ରନ୍ଧା ହୋଇ ନ ଥିବା ଜାଣିବା ପରେ ପୁଅ ମା’ଙ୍କୁ ହତ୍ୟା କରିଥିଲେ। ଏହା ପୂର୍ବରୁ ଦଶହରା ସମୟରେ ମଦ ପାଇଁ ବ୍ରହ୍ମପୁର ସହର ରକ୍ତରଞ୍ଜିତ ହୋଇଥିଲା। ମଦ ପାଇଁ ଟଙ୍କା ଦେବାକୁ ମନା କରିବାରୁ କେ. ଗୋପାଳକୃଷ୍ଣ ପାତ୍ର ନାମକ ଜଣେ ବ୍ୟକ୍ତିଙ୍କୁ ଜନୈକ ନାବାଳକ ପଥର ଛେଚି ହତ୍ୟା କରିଥିଲେ। ପୂର୍ବରୁ ସେପ୍ଟେମ୍ବର ୨୫ରେ ଆସିକା ଥାନା ଅନ୍ତର୍ଗତ ମଙ୍ଗଳପୁର ଗ୍ରାମରେ ନିଶାସକ୍ତ ସ୍ବାମୀ ବିଜୟ ପ୍ରଧାନଙ୍କ ମାଡ଼ରେ ସ୍ତ୍ରୀ ମଞ୍ଜୁଳାଙ୍କ ମୃତ୍ୟୁ ଘଟିଥିଲା। ସ୍ବାମୀ ବିଜୟ ପ୍ରତିଦିନ ନିଶାସକ୍ତ ଅବସ୍ଥାରେ ଆସି ଘରେ ମାରପିଟ କରୁଥିଲେ। ଘଟଣା ଦିନ ମଧ୍ୟ ସ୍ତ୍ରୀ ମଞ୍ଜୁଳାଙ୍କ ମୁଣ୍ଡକୁ ଏକ ବାଡ଼ିରେ ଆଘାତ କରିବାରୁ ତାଙ୍କର ମୃତ୍ୟୁ ଘଟିଥିବା ପୋଲିସର ତଦନ୍ତରେ ଜଣାପଡ଼ିଥିଲା। ସେହିପରି ମଦ କାରବାରକୁ ବିରୋଧ କରିବାରୁ ମଧ୍ୟ ଜିଲାରେ ଘଟିଛି ଜଘନ୍ୟ ହତ୍ୟାକାଣ୍ଡ। ଅଗଷ୍ଟ ୨୦ରେ ଜରଡ଼ା ଥାନା ଅନ୍ତର୍ଗତ ପଳାଶପୁର ଗ୍ରାମ ନିକଟରୁ ଜଣେ ନିଖୋଜ ଆଦିବାସୀଙ୍କ କଟାମୁଣ୍ଡ ଓ ଗଣ୍ଡି ଜବତ ହୋଇଥିଲା। ମୃତକ ଜଣଙ୍କ ବୃନ୍ଦାବନ ଜାନୀ ବୋଲି ଜଣାପଡ଼ିଥିଲା। ମଦ କାରବାରକୁ ବିରୋଧ କରୁଥିବାରୁ ତାଙ୍କୁ ହତ୍ୟା କରାଯାଇଥିବା ପରିବାର ବର୍ଗ ଅଭିଯୋଗ ଆଣିଥିଲେ। ମଦକୁ ନେଇ ଜିଲାରେ ଏଭଳି ବହୁ ଘଟଣା ଘଟିଛି। ବିଶେଷ କରି ଦଶହରାରୁ କୁମାର ପୂର୍ଣ୍ଣମୀ ମଧ୍ୟରେ ବିଭିନ୍ନ ସ୍ଥାନରେ ଜୁଆଖେଳ ସାଙ୍ଗକୁ ମଦର ଆସର ଜମିଥିଲା। ଏହି ସମୟରେ ମଦ ନିଶାରେ ନାନା ଅପରାଧ ଘଟଣା ନଜରକୁ ଆସିଛି।
