ଚଣ୍ଡିଖୋଲ,୨୭।୮(ଡି.ଏନ.ଏ.): ବଡ଼ଚଣା ଶିକ୍ଷାମଣ୍ଡଳ ଅଧୀନ ବଡ଼ଚଣାଠାରେ ଆଦର୍ଶ ବିଦ୍ୟାଳୟର ଗୃହ ଓ କ୍ୟାମ୍ପସ ନିର୍ମାଣ କରାଯାଇଛି। ଦୀର୍ଘ ୮ ମାସ ହେଲା ଏହି କାର୍ଯ୍ୟ ଶେଷ ହୋଇଛି। ହେଲେ ଏହା ଅଦ୍ୟାବଧି ଶିକ୍ଷା ବିଭାଗ ଅଧୀନକୁ ଯାଇ ପାରିନାହିଁ। ନିର୍ମାଣ କାର୍ଯ୍ୟ କରୁଥିବା ଗ୍ରାମ୍ୟ ଉନ୍ନୟନ ସଂସ୍ଥା ଶିକ୍ଷା ଅଧିକାରୀଙ୍କୁ ତିନି ତିନିଥର ପତ୍ର ଲେଖିଥିଲେ ମଧ୍ୟ କେଉଁ କାରଣ ପାଇଁ ଶିକ୍ଷା ବିଭାଗ ନିଜ ଅଧୀନକୁ ନେଉନାହିଁ ତାହା ପ୍ରଶ୍ନବାଚୀ ସୃଷ୍ଟି କରିଛି। ସୂଚନା ଥାଉକି, ରାଜ୍ୟ ସରକାର ପ୍ରତ୍ୟକ ବ୍ଲକରେ ଗୋଟିଏ ଲେଖା ଆଦର୍ଶ ବିଦ୍ୟାଳୟ ସ୍ଥାପନା କରିବାକୁ ନିର୍ଦ୍ଦେଶ ଦେଇଥିଲେ। ସେହି ଆଧାରରେ ୨୦୧୭ ଜାନୁୟାରୀରେ ବଡ଼ଚଣା ଆଦର୍ଶ ବିଦ୍ୟାଳୟର ଭିତ୍ତିପ୍ରସ୍ତର ସ୍ଥାପନ ହୋଇଥିଲା। ୫ କୋଟି ଟଙ୍କା ବ୍ୟୟରେ ନିର୍ମାଣାଧୀନ ଏହି ବିଦ୍ୟାଳୟ ଗୃହ, କାର୍ଯ୍ୟାଳୟ ଓ ଛାତ୍ରାବାସ ଇତ୍ୟାଦି ସମସ୍ତ କନଷ୍ଟ୍ରକଶନ କାମ ଏକ ବର୍ଷ ମଧ୍ୟରେ ଶେଷ ହେବ ବୋଲି ଘୋଷଣା କରାଯାଇଥିଲା। ଗ୍ରାମ୍ୟ ଉନ୍ନୟନ ବିଭାଗ ତରଫରୁ ଏହାର ନିର୍ମାଣ କାର୍ଯ୍ୟ ଚାଲିଥିବାବେଳେ କାର୍ଯ୍ୟ ଶେଷ ହେବାକୁ ୪ବର୍ଷ ସମୟ ଲାଗିଗଲା। ୨୦୨୦ ଡିସେମ୍ବର ୨୦ରେ କାର୍ଯ୍ୟ ଶେଷ କରାଯାଇ ହସ୍ତାନ୍ତର ପାଇଁ ବ୍ଲକ ଶିକ୍ଷାଧିକାରୀଙ୍କୁ ବିଭାଗ ତରଫରୁ ଚିଠି କରାଯାଇଛି। ଏହା ମଧ୍ୟରେ ୮ମାସ ବିତିଯାଇଥିଲେ ବି ତାହା ହସ୍ତାନ୍ତର ହୋଇପାରିନି।
ଜାରକା ଗ୍ରାମ୍ୟ ଉନ୍ନୟନ ଡିଭିଜନ ନିର୍ବାହୀ ଯନ୍ତ୍ରୀ ଅଗଷ୍ଟ ୭ରେ ପତ୍ର ସଂଖ୍ୟା ୨୬୪୫ରେ ଜିଲା ଶିକ୍ଷାଧିକାରୀଙ୍କୁ ଚିଠି ଲେଖି ଜଣାଇଛନ୍ତି କି, ବାରମ୍ବାର ପତ୍ର ଦେବା ସତ୍ତ୍ୱେ ଆଦର୍ଶ ବିଦ୍ୟାଳୟର ଅଧ୍ୟକ୍ଷ ଦାୟିତ୍ୱରେ ଥିବା ବ୍ଲକ ଶିକ୍ଷାଧିକାରୀ ଏ ପର୍ଯ୍ୟନ୍ତ ବିଦ୍ୟାଳୟର ନୂତନ କୋଠାକୁ ଗ୍ରହଣ କରୁନାହାନ୍ତି। ସେ ତାଙ୍କ ପତ୍ରରେ ଦର୍ଶାଇଛନ୍ତି, ଦ୍ୱିତୀୟବାର ୧୭ା୬ା୨୧ରେ ପତ୍ର ସଂଖ୍ୟା ୨୦୮୪ ଓ ୧୩ା୭ା୨୧ରେ ପତ୍ର ସଂଖ୍ୟା ୨୩୨୬ରେ ଅନୁରୋଧ କରାଯାଇଥିଲେ ମଧ୍ୟ ବ୍ଲକ ଶିକ୍ଷାଧିକାରୀ ଆଦର୍ଶ ବିଦ୍ୟାଳୟକୁ ତାଙ୍କ ଅଧୀନକୁ ନେଉନାହାନ୍ତି। ଯଦି ସେ ବିଦ୍ୟାଳୟ କ୍ୟାମ୍ପସକୁ ନ ନିଅନ୍ତି ଏହା ଦୀର୍ଘଦିନ ପଡ଼ି ରହିଲେ ଆମ୍ଭେ ମରାମତି କରିପାରିବୁ ନାହିଁ। ଗତ ମାସ ୩୦ ତାରିଖରେ ଗ୍ରାମ୍ୟ ଉନ୍ନୟନ ବିଭାଗ ଚଣ୍ଡିଖୋଲ ସବଡିଭିଜନର ସହକାରୀ ନିର୍ବାହୀ ଯନ୍ତ୍ରୀ ତୁଳସୀ ପାତ୍ର ଏବଂ ବ୍ଲକ ଶିକ୍ଷାଧିକାରୀ ହରିହର ଦଳାଇ ମିଳିତ ଭାବେ କ୍ଷେତ୍ର ପରିଦର୍ଶନ କରିଥିଲେ। ଏଥିନେଇ ଜାରକା ଡିଭିଜନର ନିର୍ବାହୀ ଯନ୍ତ୍ରୀ ଯାଜପୁର ଜିଲାପାଳ ଏବଂ ଗ୍ରାମ୍ୟ ଉନ୍ନୟନ ବିଭାଗ ମୁଖ୍ୟଯନ୍ତ୍ରୀଙ୍କୁ ଚିଠି ଲେଖି ଏ ଦିଗରେ ପଦକ୍ଷେପ ନେବାକୁ ଅନୁରୋଧ କରିଛନ୍ତି। ଏ ସମ୍ପର୍କରେ ପ୍ରତିକ୍ରିୟା ଲାଗି ବଡ଼ଚଣା ବ୍ଲକ ଶିକ୍ଷାଧିକାରୀ ହରିହର ଦଳାଇଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ କୌଣସି ଉତ୍ତର ଦେଇ ନ ଥିଲେ।
