ବେଙ୍ଗାଲୁରୁ, ୨୦।୪: କନ୍ନଡ଼ ଅଭିନେତ୍ରୀ ହର୍ଷିକା ପୁନାଚାଙ୍କୁ ୨ ଦିନ ତଳେ କେତେଜଣ ଦୁର୍ବୃତ୍ତ ଆକ୍ରମଣ କରିଥିବା ଶୁକ୍ରବାର ସେ ନିଜ ଫେସବୁକରେ ପୋଷ୍ଟ କରି ସୂଚନା ଦେଇଛନ୍ତି। ତେବେ ନିଜ ମାତୃଭାଷା କନ୍ନଡରେ କଥା ହେଉଥିବାରୁ ଦୃର୍ବୃତ୍ତମାନେ ଉତ୍ତେଜିତ ହୋଇ ସେ ଓ ତାଙ୍କ ସ୍ବାମୀଙ୍କୁ ଆକ୍ରମଣ କରିଥିବା ହର୍ଷିକା କହିଛନ୍ତି। ଏନେଇ ସେ ଫେସବୁକରେ କିଛି ଭିଡିଓ ମଧ୍ୟ ଶେୟାର କରିଛନ୍ତି। ତେବେ ଘଟଣାକୁ ନେଇ ହର୍ଷିକା ସ୍ଥାନୀୟ ପୋଲିସ ଷ୍ଟେସନର ସହାୟତା ଲୋଡ଼ିଥିବା ବେଳେ ଏହି ମାମଲାରେ କୌଣସି କାର୍ଯ୍ୟାନୁଷ୍ଠାନ ହୋଇ ନ ଥିବା ସେ ଅଭିଯୋଗ କରିଛନ୍ତି।
ଘଟଣା ସମ୍ପର୍କରେ ହର୍ଷିକା କହିଛନ୍ତି, ବେଙ୍ଗାଲୁରୁର ଫ୍ରେଜର ଟାଉନ ସ୍ଥିତ ଏକ ରେଷ୍ଟୁରାଣ୍ଟରେ ସେ ତାଙ୍କ ସ୍ବାମୀଙ୍କ ସହ ନିକଟରେ ରାତ୍ରୀ ଭୋଜନ କରିବାକୁ ଯାଇଥିଲେ। ଯେତେବେଳେ ଉଭୟ ଭୋଜନ ସାରି କାର୍ ପାର୍କି ସ୍ଥଳକୁ ଫେରିଲେ, ସେତେବେଳେ ୨ ଜଣ ଦୃର୍ବୃତ୍ତ ତାଙ୍କ ସହ ଯୁକ୍ତିତର୍କ କରିବାକୁ ଲାଗିଥିଲେ। ଏହି ସମୟରେ ଦୃର୍ବୃତ୍ତମାନେ ତାଙ୍କ ସ୍ବାମୀଙ୍କ ସୁନା ଚେନ ଛଡ଼ାଇବାକୁ ଚେଷ୍ଟା କରିବା ସହ ତାଙ୍କ କାରକୁ କ୍ଷତି ପହଞ୍ଚାଇଥିଲେ। ଏହାକୁ ବିରୋଧ କରିବାରୁ କାହିଁକି କନ୍ନଡରେ କଥା ହେଉଛ ବୋଲି କହି ଦୃର୍ବୃତ୍ତମାନେ ଉତ୍ତେଜିତ ହୋଇଥିଲେ। ହିନ୍ଦୀ ଓ ଉର୍ଦ୍ଦୁରେ କଥା ହେଉଥିବା ଏହି ଦୃର୍ବୃତ୍ତମାନେ କନ୍ନଡ଼ ଭାଷାରେ କଥା ହେବାକୁ ନେଇ ଆପତ୍ତି ଉଠାଇଥିଲେ।
ଏହି ଘଟଣାକୁ ନେଇ ହର୍ଷିକା ନିଜ ଫେସବୁକ୍ ପୋଷ୍ଟରେ କେତେକ ପ୍ରଶ୍ମ ଉଠାଇଛନ୍ତି। ନିଜ ସହର ବେଙ୍ଗାଲୁରୁରେ ମାତୃଭାଷା କନ୍ନଡ଼ ବ୍ୟବହାର କରିବାରେ କ’ଣ ପ୍ରତିବନ୍ଧକ ରହିଛି ବୋଲି ସେ ପ୍ରଶ୍ନ କରିଛନ୍ତି। ସେହିପରି ପାକିସ୍ତାନ ଓ ଆଫଗାନିସ୍ତାନ ପରି ଏଭଳି ନିନ୍ଦନୀୟ ଘଟଣା ବେଙ୍ଗାଲୁରୁରେ କିପରି ଘଟୁଛି ପ୍ରଶ୍ନ କରି ହର୍ଷିକା ଅସନ୍ତୋଷ ପ୍ରକାଶ କରିଛନ୍ତି। ନିଜ ସହରରେ ସେ ସୁରକ୍ଷିତ ଅଛନ୍ତି କି ନାହିଁ ବୋଲି କର୍ନାଟକ ସରକାର ଓ ପୋଲିସକୁ ହର୍ଷିକା ପ୍ରଶ୍ନ କରିଛନ୍ତି। ଏପରି ଘଟଣା ରୋକିବା ସହ ବେଙ୍ଗାଲୁରୁର ଜନସାଧାରଣଙ୍କୁ ସୁରକ୍ଷା ଯୋଗାଇବା ପାଇଁ ସେ ମୁଖ୍ୟମନ୍ତ୍ରୀ ସିଦ୍ଦାରାମାୟାଙ୍କୁ ଅପିଲ କରିଛନ୍ତି। ତାଙ୍କ ଉପରେ ହୋଇଥିବା ଏହି ଆକ୍ରମଣକୁ ଗୁରୁତର ସହ ନେଇ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ହର୍ଷିକା ଦାବି କରିଛନ୍ତି।
