ହାଟଡ଼ିହୀ/ଛେନାପଦୀ,୧୩।୯(ଶୁଭକାନ୍ତ ନାୟକ/ନିରାକାର ପରିଡା): କେନ୍ଦୁଝର ଜିଲା ହାଟଡ଼ିହୀ ବ୍ଲକ୍ କାର୍ଯ୍ୟାଳୟ ପରିସରରେ ଶୁକ୍ରବାର ଆୟୋଜିତ ହୋଇଥିବା ଭୀମଭୋଇ ଭିନ୍ନକ୍ଷମ ଶିବିରରେ ଦଲାଲଙ୍କ ପ୍ରାଦୁର୍ଭାବ ଦେଖାଯାଇଥିଲା। ଅଧିକ ପ୍ରତିଶତର ଭିନ୍ନକ୍ଷମ ପ୍ରମାଣପତ୍ର କରାଇଦେବା ପାଇଁ କେତେକ ଦିବ୍ୟାଙ୍ଗଙ୍କୁ ବାହାରୁ ଆସିଥିବା ଦଲାଲମାନେ ପ୍ରଲୋଭିତ କରୁଥିଲେ। ଏଥିପାଇଁ ମୁଣ୍ଡ ପିଛା ପ୍ରାୟ ୫ ହଜାର ଟଙ୍କା ଡିଲ କରାଯାଉଥିଲା। କେତେକ ବ୍ୟକ୍ତି ଟଙ୍କା ଦେବାକୁ ରାଜି ହେବା ପରେ ଦଲାଲମାନେ ସେମାନଙ୍କ ମୋବାଇଲ ନମ୍ବର ନେଇ ରାତିରେ ଯୋଗାଯୋଗ କରିବାକୁ କହୁଥିଲେ। ଦଲାଲମାନେ ଯେଉଁ ଭିନ୍ନକ୍ଷମଙ୍କ ଆବେଦନ ପତ୍ର ଡାକ୍ତରଙ୍କ ପାଖକୁ ନେଉଥିଲେ ତାହା ଅଲଗା ରଖାଯାଉଥିଲା। ଯାହାକୁ ନେଇ ସନ୍ଦେହ ଉପୁଜିଥିଲା।
ଏପରିକି ଉପସ୍ଥିତ ଜିଲା ସାମାଜିକ ସୁରକ୍ଷା ଅଧିକାରୀଙ୍କ କାର୍ଯ୍ୟାଳୟର ଜଣେ କର୍ମଚାରୀଙ୍କ ଭୂମିକାକୁ ନେଇ ମଧ୍ୟ ପ୍ରଶ୍ନ ଉଠିଥିଲା। ସେ ଦଲାଲଙ୍କ ସହ ସମ୍ପୃକ୍ତ ଥାଇ ଏପରି କରୁଥିବା ବାବଦରେ ଗଣମାଧ୍ୟମ ପ୍ରତିନିଧିମାନେ ତାଙ୍କୁ ଘେରି ପଚାରିଥିଲେ। ଉକ୍ତ କର୍ମଚାରୀ ଜଣକ ଟଙ୍କା ନେବା କିମ୍ବା ପ୍ରମାଣପତ୍ର କରାଇଦେବା ପାଇଁ ନୁହେଁ, କେବଳ ଲୋକଙ୍କୁ ବୁଝାଉଥିଲେ ବୋଲି ସଫେଇ ଦେଇଥିଲେ। ସେହିପରି ଶିବିରକୁ ବାହାର ବ୍ଲକ୍ରୁ ଆଉ ୩ ରୁ ୪ ଜଣ ବ୍ୟକ୍ତି ଆସି ଦିବ୍ୟାଙ୍ଗଙ୍କୁ ପ୍ରଭାବିତ କରୁଥିବା ଦେଖା ଯାଇଥିଲା। ଏହି ବ୍ୟକ୍ତିମାନେ ମୋଟା ଅଙ୍କର ଅର୍ଥ ନେଇ ଅଯୋଗ୍ୟ ବ୍ୟକ୍ତିଙ୍କୁ ଅଧିକ ପ୍ରତିଶତର ଦିବ୍ୟାଙ୍ଗ ପ୍ରମାଣପତ୍ର କରାଇଦେବାର ପ୍ରତିଶ୍ରୁତି ଦେଉଥିଲେ।
ଏପରି ଘଟଣା ଧୀରେ ଧୀରେ ପ୍ରଚାରିତ ହୋଇଥିଲା। ଫଳରେ ଦଲାଲଙ୍କ ସହ ସ୍ଥାନୀୟ ଲୋକଙ୍କ ମଧ୍ୟରେ ହାତାହାତି ପର୍ଯ୍ୟନ୍ତ କଥା ଯାଇଥିଲା। ଏଭଳି ପ୍ରସଙ୍ଗ ଶିବିରର ସ୍ବଚ୍ଛତା ଓ ବ୍ୟବସ୍ଥାକୁ ନେଇ ପ୍ରଶ୍ନ ଉଠାଇଛି। ତେଣୁ ଜିଲା ପ୍ରଶାସନ ଘଟଣାର ନିରପେକ୍ଷ ତଦନ୍ତ କରିବା ଜରୁରୀ ହୋଇପଡ଼ିଛି । ଏଥିସହ ପ୍ରକୃତ ଯୋଗ୍ୟ ଭିନ୍ନକ୍ଷମ ବ୍ୟକ୍ତିମାନେ ଯେପରି ସହଜ, ସୁବିଧାରେ ଭିନ୍ନକ୍ଷମ ପ୍ରମାଣପତ୍ର ପାଇ ପାରିବେ ସେଥିପାଇଁ ପ୍ରଶାସନ ଦୃଢ଼ ପଦକ୍ଷେପ ନେବାକୁ ଦାବି ହୋଇଛି। ବ୍ଲକ୍ର ଜଣେ ଅଧିକାରୀ ନାମ ଗୋପନ ରଖିବା ସର୍ତ୍ତରେ କହିଛନ୍ତି, ବିଡ଼ିଓଙ୍କ ଅଜାଣତରେ କିଛି ଦଲାଲ, ଡାକ୍ତର, ବ୍ଲକ ଏବଂ ଜିଲା ସାମାଜିକ ସୁରକ୍ଷା ଅଧିକାରୀଙ୍କ କାର୍ଯ୍ୟାଳୟର କର୍ମଚାରୀମାନେ ମିଳିମିଶି ଏପରି ଘଟଣାରେ ସମ୍ପୃକ୍ତ ରହି ଦିବ୍ୟାଙ୍ଗଙ୍କ ସହ ଡିଲ କରିଛନ୍ତି। ବିଡିଓ ରଞ୍ଜନ କୁମାର ପରିଡା କହିଛନ୍ତି, ଘଟଣା ବାବଦରେ ଜାଣିନାହାନ୍ତି । ଯଦି ସେପରି କାର୍ଯ୍ୟ କିଏ କରିଥିବ, ତେବେ ପଦକ୍ଷେପ ନିଆଯିବ ।
