ଭଞ୍ଜନଗର,୧୩।୩(ବାବୁଲା ପ୍ରଧାନ): ଭଞ୍ଜନଗର ଉପଜିଲାପାଳଙ୍କ ସମ୍ମିଳନୀ କକ୍ଷରେ ଗୁରୁବାର ଆଗାମୀ ଗ୍ରୀଷ୍ମପ୍ରବାହ ମୁକାବିଲା ନିମନ୍ତେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଉପଜିଲାପାଳ ଉମାଶଙ୍କର ବେହେରା ବୈଠକରେ ଅଧକ୍ଷତା କରିଥିଲେ। ଏହି ଅବସରରେ ସେ କହିଛନ୍ତି, ଉପଖଣ୍ଡ ସ୍ତରରେ ଯେଉଁ ଜନବସତିରେ ପିଇବା ପାଣିରେ ଅଭାବ ପରିଲଖିତ ହେଉଛି ସେଠି ଯଥାଶୀଘ୍ର ପିଇବା ପାଣି ଯୋଗାଇବା ବ୍ୟବସ୍ଥା ହେଉ। ହ୍ୟାଣ୍ଡ ଟ୍ୟୁବଲ ଆବଶ୍ୟକତା ଅନୁସାରେ ଖୋଳାଯାଉ। ସହରଠୁ ଗ୍ରାମାଞ୍ଚଳ ପର୍ଯ୍ୟନ୍ତ ବିଭିନ୍ନ ସ୍ଥାନରେ ଜଳଛତ୍ର ଖୋଲାଯାଉ। ଯେଉଁଠି ପାଣି ସୁବିଧା ନାହିଁ ସେଠୀ ଟ୍ୟାଙ୍କର ଯୋଗେ ପାଣି ଯୋଗାଇବା ପାଇଁ ଉପଜିଲାପାଳ ବେହେରା ଉପସ୍ଥିତ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଉପଖଣ୍ଡ ସ୍ତରରେ ଥିବା ସମସ୍ତ ହ୍ୟାଣ୍ଡ ଟ୍ୟୁବଲ ଗୁଡ଼ିକୁ ଯାଞ୍ଚ କରାଯାଉ। ଯେଉଁଠି ମରାମତି ଆବଶ୍ୟକ ତାହାକୁ ତୁରନ୍ତ କରାଯାଉ। ଭୂତଳ ଜଳସ୍ତର ହ୍ରାସ ଯୋଗୁ କୂଅଗୁଡ଼ିକରେ ପାଣି କମିଯାଇଛି। ତେଣୁ ଯେଉଁଠି ବ୍ଲିଚିଂ ପାଉଡର ଆବଶ୍ୟକ ସେଠି ପାଉଡର ପକାଯାଉ। ପାଣି ସମସ୍ୟା ନେଇ ଜନସାଧାରଣ ଯେଉଁ ଅଭିଯୋଗ ଆଣୁଛନ୍ତି ତାହାର ତୁରନ୍ତ ସମାଧାନ କରାଯାଉ । ଯଦି କୌଣସି କର୍ମଚାରୀ ଜନସାଧାରଣଙ୍କୁ ସେବା ଯୋଗାଇବାରେ ଅବହେଳା କରନ୍ତି ତେବେ ସଂମ୍ପୃକ୍ତ କର୍ମଚାରୀଙ୍କ
ବିରୋଧରେ କାର୍ଯାନୁଷ୍ଠାନ ନିଆଯିବ ବୋଲି ଉପଜିଲାପାଳ ବେହେରା ପରୋକ୍ଷରେ ତାହା କହିଛନ୍ତି। ଉକ୍ତ ସମୀକ୍ଷା ବୈଠକରେ ପାନୀୟଜଳ ଯୋଗାଣ ବିଭାଗର ଅଧ୍ୟକ୍ଷଣ ଯନ୍ତ୍ରୀଙ୍କ ସମେତ ଭଞ୍ଜନଗର, ଆସିକା, ପୋଲସରା, ହିଞ୍ଜିଳିକାଟୁର ସହାୟକ ନିର୍ବାହୀ ଯନ୍ତ୍ରୀ, ଭଞ୍ଜନଗର ଓ ଆସିକା ଜନସ୍ବାସ୍ଥ୍ୟ ବିଭାଗ ସହାୟକ ନିର୍ବାହୀ ଯନ୍ତ୍ରୀ ଏବଂ ବ୍ଲକ ସ୍ତରୀୟ କନିଷ୍ଠ ଯନ୍ତ୍ରୀ ଉପସ୍ଥିତ ଥିଲେ । ଅନ୍ୟପଟେ ଭଞ୍ଜନଗର ଦକ୍ଷୀଣ ଘୁମୁସର ବନଖଣ୍ଡ କାର୍ଯ୍ୟାଳୟ ପକ୍ଷରୁ ଆଜି କାର୍ଯ୍ୟାଳୟ ସମ୍ମୁଖରେ ଜଳ ଛତ୍ର ଖୋଲାଯାଇଛି। ଉପଖଣ୍ଡରେ ପ୍ରାୟ ଜଳ ଛତ୍ର ଖୋଲି ନଥିବା ବେଳେ ଦକ୍ଷୀଣ ଘୁମୁସର ବନଖଣ୍ଡ ଏହି କ୍ଷେତ୍ରରେ ବହୁତ ଆଗୁଆ। ବିଭାଗର ଏହିଭଳି କାର୍ଯ୍ୟକୁ ଲୋକେ ପ୍ରଶଂସା କରିଛନ୍ତି।
