ଦିଗପହଣ୍ଡି,୧୦ା୧(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଅବକାରୀ ଥାନା ଏସ୍ଆଇ ଅନୀତା ପ୍ରଧାନ ଗଜପତି ଜିଲା ମୋହନା ଥାନା କୀର୍ତ୍ତିଗି ଗ୍ରାମର ଜିତେନ୍ଦ୍ର ପାଇକଙ୍କୁ ଶୁକ୍ରବାର ବ୍ରହ୍ମପୁର ଜିଲା ଦୌରା ଜଜ କୋର୍ଟକୁ ଚାଲାଣ କରିଛନ୍ତି। ଅବକାରୀ ମାମଲା ନଂ.୧୮୧/୨୪-୨୫ ଅନୁଯାୟୀ ଜାମିନ ଆବେଦନ ନାମଞ୍ଜୁର ହେବାରୁ ଅଭିଯୁକ୍ତଙ୍କୁ ବ୍ରହ୍ମପୁର ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଅଭିଯୁକ୍ତ ଜଣକ ଏକ ବାଇକ୍ ନଂ.ଓଆର ୦୭ ଟି -୫୦୪୩ ଯୋଗେ ଗଞ୍ଜେଇ ନେଇ ମୋହନାରୁ ବ୍ରହ୍ମପୁର ଅଭିମୁଖେ ଯାଉଥିଲେ। ଗୁରୁବାର ମଧ୍ୟାହ୍ନରେ ପ୍ରାପ୍ତ ସୂଚନାକୁ ଭିତ୍ତିକରି ଦିଗପହଣ୍ଡି ପୁଞ୍ଜିକୟଁା ଛକରେ ଅବକାରୀ କର୍ମଚାରୀ ବୃନ୍ଦ ଅଭିଯୁକ୍ତଙ୍କ ବାଇକ୍କୁ ଅଟକାଇ ଖାନତଲାସ କରିଥିଲେ। ସେ ଧରିଥିବା ଏକ ବ୍ୟାଗ୍ରେ ୭ କେଜି ଗଞ୍ଜେଇ ଥିବା ଜଣାପଡ଼ିଥିଲା। ଅବକାରୀ ଏସ୍.ଆଇ ଅଭିଯୁକ୍ତଙ୍କୁ ଗିରଫ କରି ବାଇକ୍ ସହ ଅବକାରୀ ଥାନାକୁ ଉଠାଇ ନେଇଥିଲେ। ତଦନ୍ତ ପରେ ସେ ବେଆଇନ ଭାବେ ଗଞ୍ଜେଇ ବିକ୍ରି ପାଇଁ ବ୍ରହ୍ମପୁର ଯାଉଥିବା ସ୍ବୀକାର କରିଥିଲେ। ଏହି ଚଢ଼ାଉ ଧରପଗଡ଼ରେ ଅବକାରୀ ଏସ୍.ଆଇ ଏନ. ତ୍ରିପତି, କନେଷ୍ଟବଳ ନୀର ବେହେରା, ଆଲଫଲତା ସାହୁ ସାମିଲ ଥିଲେ।
