ନୟାଗଡ଼ ଅଫିସ,୧୪।୧:ପରୀ ହତ୍ୟା ମାମଲାରେ ଗିରଫ କଲେଜ ଛାତ୍ରଙ୍କ ବ୍ରେନ୍ ମ୍ୟାପିଂ ପାଇଁ ଏସ୍ଆଇଟି କରିଥିବା ଆବେଦନ ଉପରେ ଜୁଭେନାଇଲ ଜଷ୍ଟିସ ବୋର୍ଡ(କିଶୋର ନ୍ୟାୟ ପରିଷଦ)ରେ ବୁଧବାର ଶୁଣାଣି ହୋଇଛି। ଶୁଣାଣି ସମୟରେ ଆଇନକୁ ନେଇ ଦ୍ୱନ୍ଦରେ ଥିବା କଲେଜ ଛାତ୍ର ବ୍ରେନ୍ ମ୍ୟାପିଂ ପାଇଁ ଅରାଜି ହେବା ପରେ ଏସ୍ଆଇଟିର ଆବେଦନକୁ ବୋର୍ଡ ଖାରଜ କରିଦେଇଛନ୍ତି।
ଅନ୍ୟପକ୍ଷେ କଲେଜ ଛାତ୍ରଙ୍କ ସ୍ବରର ସ୍ତର ନିରୀକ୍ଷଣ (ଲାୟର ଭଏସ ଆନାଲିସିସ୍) କରିବାକୁ ଏସ୍ଆଇଟି ପକ୍ଷରୁ ଆବେଦନ ହୋଇଛି। ସେହିପରି ରିମାଣ୍ଡ ସମୟରେ ଅଭିଯୁକ୍ତଙ୍କୁ ମାଡ଼ ଓ ନିର୍ଯାତନା ଅଭିଯୋଗର ଶୁଣାଣି ଆସନ୍ତା ୨୦ରେ ହେବ ବୋଲି କୋର୍ଟ ତାରିଖ ଧାର୍ଯ୍ୟ କରିଛନ୍ତି ା
ସରକାରୀ ଓକିଲ ବଳଭଦ୍ର ମହାନ୍ତିଙ୍କ ସୂଚନା ଅନୁସାରେ ଅଭିଯୁକ୍ତଙ୍କୁ ଅନୁଗୋଳସ୍ଥିତ ବାଳସୁଧାର ଗୃହରୁ ଅଣାଯାଇ କିଶୋର ନ୍ୟାୟ ପରିଷଦରେ ବୁଧବାର ହାଜର କରାଯାଇଥିଲା। ଶୁଣାଣି ସମୟରେ ସେ ବ୍ରେନ୍ ମ୍ୟାପିଂ ପାଇଁ ଅରାଜି ହୋଇ ଲିଖିତ ଭାବେ କୋର୍ଟଙ୍କୁ ଅବଗତ କରାଇଥିଲେ। ପରେ କୋର୍ଟ ଏସ୍ଆଇଟିର ଯୁକ୍ତି ଶୁଣି ରାୟକୁ ସଂରକ୍ଷିତ ରଖିଛନ୍ତି । ପୂର୍ବରୁ ବି ଅଭିଯୁକ୍ତ ନାର୍କୋ ଟେଷ୍ଟ ପାଇଁ ମନା କରିଥିଲେ। ବୋର୍ଡ ମଧ୍ୟ ନାର୍କୋ ଆନାଲିସିସ୍ ଟେଷ୍ଟକୁ ଖାରଜ କରିଦେଇଥିଲେ। ସମ୍ବିଧାନର ୨୧ ଧାରା ଅନୁସାରେ କାହାର ବଞ୍ଚତ୍ବା ଉପରେ କେହି ହସ୍ତକ୍ଷେପ କରି ପାରିବେ ନାହିଁ। କଲେଜ ଛାତ୍ରଙ୍କ ଜୀବନ ପ୍ରତି ବିପଦ ଥିବାରୁ ଓ ସେ ଅନିଚ୍ଛା ପ୍ରକାଶ କରୁଥିବା କାରଣରୁ ବୋର୍ଡ ଅଭିଯୁକ୍ତଙ୍କ ବ୍ରେନ ମ୍ୟାପିଂ ଓ ନାର୍କୋ ଟେଷ୍ଟ ପାଇଁ ଅନୁମତି ଦେଇନାହାନ୍ତି । ତେବେ ତାଙ୍କ ସ୍ବରର ସ୍ତର ନିରୀକ୍ଷଣ କରିବାକୁ ଏସ୍ଆଇଟି ପକ୍ଷରୁ ଆବେଦନ ହୋଇଛି । ଯାହାର ଶୁଣାଣି ୨୦ ରେ ହେବ ବୋଲି ସରକାରୀ ଓକିଲ କହିଛନ୍ତି ।
ଅଭିଯୁକ୍ତଙ୍କ ଓକିଲ ଚନ୍ଦ୍ରବିଜୟୀ ମିଶ୍ର କହିଛନ୍ତି, ଜୁଭେନାଇଲ ଜଷ୍ଟିସ ବୋର୍ଡକୁ ମାମଲା ସ୍ଥାନାନ୍ତର ସମୟରେ ନାର୍କୋ ଆନାଲିସିସ୍ ଟେଷ୍ଟ ଓ ରିମାଣ୍ଡ ସମୟରେ ଅଭିଯୁକ୍ତଙ୍କୁ ମାଡ ମରାଯାଇଥିଲା। ଏ ସଂକ୍ରାନ୍ତରେ ବିଚାର କରିବାକୁ ପୋକସ୍ କୋର୍ଟର ସ୍ବତନ୍ତ୍ର ଜଜଙ୍କ ନିର୍ଦ୍ଦେଶ ଥିଲା। ନାର୍କୋ ଆନାଲିସିସ୍ ଟେଷ୍ଟ ଶୁଣାଣୀ ହୋଇ ଥିବାବେଳେ ମାଡ ଓ ନିର୍ଯାତନା ଘଟଣାର ଣୁଣାଣି ହୋଇନାହିଁ।
