କୁଳିଅଣା,୩ା୧୧(ଡି.ଏନ.ଏ.): ମୟୂରଭଞ୍ଜ ଜିଲା ଯଶିପୁର ଥାନା ଅଞ୍ଚଳର ଜଣେ ନାବାଳିକାଙ୍କୁ ଅପହରଣ କରାଯାଇଥିବା ଥାନାରେ ଅଭିଯୋଗ ହୋଇଥିଲା। ମଙ୍ଗଳବାର ପୋଲିସ ଉକ୍ତ ନାବାଳିକାଙ୍କୁ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରିଥିବା ବେଳେ ଅପହରଣରେ ସମ୍ପୃକ୍ତ ଅଭିଯୁକ୍ତମାନେ ଫେରାର ହୋଇଯାଇଛନ୍ତି। ଦଶମ ଶ୍ରେଣୀରେ ପଢ଼ୁଥିବା ନାବାଳିକା ଜଣକ କୁଳିଅଣା ଥାନା ଅଞ୍ଚଳରେ ଥିବା ସମ୍ପର୍କୀୟଙ୍କ ଘରକୁ ବୁଲିବାକୁ ଆସିଥିଲେ। ୨୦ ତାରିଖରେ ବସ୍ ଯୋଗେ ସେ ଗାଁକୁ ଫେରୁଥିଲେ। ବିଶୋଇ ବସ୍ଷ୍ଟାଣ୍ଡରୁ କୁଳିଅଣା ଥାନା ଅଧୀନ ପଳାସବଣି ଗ୍ରାମର ଚନ୍ଦନ ବେହେରା ଓ ତାଙ୍କର ୩ ସହଯୋଗୀ ତାଙ୍କୁ ଅପହରଣ କରି ନେଇଥିଲେ। ନାବାଳିକାଙ୍କୁ ସେମାନେ ବିଭିନ୍ନ ସ୍ଥାନରେ ଲୁଚାଇ ରଖି ଚନ୍ଦନଙ୍କୁ ବିବାହ କରିବା ପାଇଁ ବାଧ୍ୟ କରିବା ସହ ମାରପିଟ୍ କରିଥିଲେ। ନାବାଳିକା ଜଣକ ଫୋନ ଯୋଗେ ଏକଥା ତାଙ୍କ ଭାଇଙ୍କୁ ଜଣାଇଥିଲେ। ନାବାଳିକାଙ୍କ ଭାଇ ଏନେଇ ଥାନାରେ ଅଭିଯୋଗ କରିଥିଲେ। ହେଲେ ଅପହରଣକାରୀମାନେ ଗତ ଗୁରୁବାର ନାବାଳିକାଙ୍କୁ ଆଣି ବାରିପଦା ଓଏସ୍ଟିପି ସେଣ୍ଡରରେ ଛାଡ଼ି ପଳାଇଥିଲେ। ପୋଲିସ ସେଠାରୁ ନାବାଳିକାଙ୍କୁ ଉଦ୍ଧାର କରି ବୟାନ ରେକର୍ଡ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି।
