ପରଜଙ୍ଗ, ୧୩।୨(ଡି.ଏନ୍.ଏ.):ନିଲାମ ହୋଇଛି ବାଲିଘାଟ। ହେଲେ ନିଲାମଧାରୀ ସଂସ୍ଥା ଦାଖଲ କରିନାହିଁ ଆବଶ୍ୟକ କାଗଜପତ୍ର। ତଥାପି ବାହୁବଳ, ରାଜନୈତିକ ଚାପ ପ୍ରୟୋଗ କରି ବ୍ରାହ୍ମଣୀ ଶଯ୍ୟାରୁ ଦିନରାତି ଉଠାଯାଉଛି ବାଲି। ଏଭଳି ବେଆଇନ କାର୍ଯ୍ୟ ସମ୍ପର୍କରେ ରାଜସ୍ବ ବିଭାଗ ଅବଗତ ଥିବା ସତ୍ତ୍ୱେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ଏହାଯୋଗୁ ସରକାର ବିପୁଳ ରାଜସ୍ବ ହରାଉଥିବାବେଳେ ଜୈବ ବିବିଧତା ଉପରେ ଏହାର କୁପ୍ରଭାବ ପଡୁଛି, ଯାହାକୁ ନେଇ ଢେଙ୍କାନାଳ ଜିଲା ପରଜଙ୍ଗ ବ୍ଲକ କୁଲେଇ ଅଞ୍ଚଳବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ପରଜଙ୍ଗ ଅଞ୍ଚଳରେ ପ୍ରଚୁର ପରିମାଣର ଲଘୁ ଖଣିଜ ସାମଗ୍ରୀ ଉପଲବ୍ଧ ଥିବାବେଳେ ଏସବୁ ଉପରେ ମୁନାଫାଖୋର ବ୍ୟବସାୟୀଙ୍କ ଲୋଲୁପ ଦୃଷ୍ଟି ପଡ଼ିଛି। ବିଶେଷ କରି ବାଲିଘାଟ ନିଲାମ ଏକ ଲାଭଜନକ ବ୍ୟବସାୟ ହୋଇଥିବାରୁ ଏହାକୁ କରାୟତ୍ତ କରିବାକୁ ପ୍ରତିଯୋଗିତା ଚାଲିଛି। ଏଭଳି ଦୃଶ୍ୟ ଦେଖିବାକୁ ମିଳିଛି ବ୍ରାହ୍ମଣୀ ନଦୀର କୁଲେଇ ବାଲିଘାଟରେ। ଉକ୍ତ ବାଲିଘାଟକୁ ପ୍ରଶାସନ ପକ୍ଷରୁ ଟେଣ୍ଡର ମାଧ୍ୟମରେ ନିଲାମ ଡକାଯାଇଥିଲା, ଯାହାକୁ ଭୁବନେଶ୍ୱର ଅଞ୍ଚଳର ଜଣେ ବ୍ୟକ୍ତି ହାସଲ କରିଛନ୍ତି। ହେଲେ ବାଲିଘାଟ ନିଲାମ, ଉତ୍ତୋଳନ ସଂକ୍ରାନ୍ତ କାଗଜପତ୍ର ସମ୍ପୂର୍ଣ୍ଣ ହୋଇନାହିଁ। ତହସିଲ ପ୍ରଶାସନ ମଧ୍ୟ ବାଲି ଉଠାଣ ପାଇଁ ଅନୁମତି ଦେଇନାହିଁ। ଏହାସତ୍ତ୍ୱେ ଜେସିବି ମେଶିନ ଏବଂ ଟିପ୍ପର ସହାୟତାରେ ନଦୀଶଯ୍ୟାରୁ ବାଲି ଉତ୍ତୋଳନ କରି ଅନ୍ୟତ୍ର ଗଚ୍ଛିତ ରଖାଯାଉଛି। ସେଠାରୁ ବିଭିନ୍ନ ସ୍ଥାନକୁ ଚାଲାଣ କରାଯାଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। କେବଳ ଏତିକି ନୁହେଁ, ସୁବିଧାରେ ବାଲି ଚାଲାଣ ପାଇଁ ନଦୀ ଗର୍ଭକୁ ରାସ୍ତା ତିଆରି କରାଯାଇଛି। ଏଥିଲାଗି ଜଙ୍ଗଲ ଜମିରୁ ମୋରମ ଖନନ କରାଯାଇଛି। ଅନୁରୂପ ଦୃଶ୍ୟ ଦେଖିବାକୁ ମିଳିଛି ବସୁଲେଇ ଘାଟରେ। ଲଘୁ ଖଣିଜ ସାମଗ୍ରୀ ଚାଲାଣ ରୋକିବା ଲାଗି ଜିଲା ପ୍ରଶାସନ ତରଫରୁ ସ୍କ୍ବାଡ୍ ଗଠନ କରାଯାଇଥିଲେ ମଧ୍ୟ ଏ ଦିଗରେ କୌଣସି ପଦକ୍ଷେପ ନିଆଯାଉନାହିଁ। ତେଣୁ ବାଲି ବ୍ୟବସାୟୀମାନେ ଏଭଳି ବେଆଇନ କାର୍ଯ୍ୟ କରିବାକୁ ସୁଯୋଗ ପାଉଛନ୍ତି ବୋଲି ଆଲୋଚନା ହେଉଛି।
ଏ ସଂକ୍ରାନ୍ତରେ ଗେଙ୍କୁଟିଆ ରାଜସ୍ବ ନିରୀକ୍ଷକ (ଆର୍ଆଇ) ବିବେକାନନ୍ଦ ସାହୁ କୁହନ୍ତି, ଏଭଳି ବେଆଇନ କାର୍ଯ୍ୟ ସମ୍ପର୍କରେ ତାଙ୍କ ନିକଟରେ ସୂଚନା ଅଛି। ତେବେ ତହସିଲ କାର୍ଯ୍ୟରେ ବ୍ୟସ୍ତ ରହୁଥିବାରୁ ସମୟ ଅଭାବ ରହୁଛି। ତେଣୁ ନିରୁପାୟ ହୋଇ ଦେଖିବା ଛଡ଼ା ଅନ୍ୟ ବାଟ ନାହିଁ ବୋଲି ସେ କହିଛନ୍ତି। ଏ ସଂକ୍ରାନ୍ତରେ ଉପଜିଲାପାଳ ଜ୍ୟୋତିଶଙ୍କର ସାହୁ କୁହନ୍ତି, ଏଭଳି ବେଆଇନ କାର୍ଯ୍ୟ ଚାଲିଥିବା ସମ୍ପର୍କରେ କୌଣସି ସୂଚନା ନ ଥିଲା। ତେବେ ଖୁବ୍ଶୀଘ୍ର ବାଲିଘାଟରେ ଚଢ଼ାଉ କରାଯିବ।
