କେନ୍ଦୁଝର,୧୫ା୨(ନରେଶ ଚନ୍ଦ୍ର ପଟ୍ଟନାୟକ): ଯୋଡ଼ା ବ୍ଲକ ଅନ୍ତର୍ଗତ ବଳଦା ପଞ୍ଚାୟତର ଖଣି ଖାଦାନ ଦ୍ୱାରା ପ୍ରଭାବିତ ବି ପ୍ଲଟ ଗ୍ରାମରେ ଦୀର୍ଘ ଏକ ମାସ ହେବ ବସୁଧା ଯୋଜନାରେ ବିଛା ଯାଇଥିବା ପାଣି ପାଇପ୍ ଫାଟି ଯାଇଥିଲେ ମଧ୍ୟ ଏ ପର୍ଯ୍ୟନ୍ତ ପ୍ରଶାସନର ଦୃଷ୍ଟି ପଡୁନାହିଁ। ଫଳରେ ପାଣି ଭାସି ଯାଉଥିବାବେଳେ ଉକ୍ତ ସ୍ଥାନରେ ପାଣି ପ୍ରଦୂଷିତ ହେବା ଆଶଙ୍କା ରହୁଛି।
ଏପଟେ ବ୍ୟାପକ ଧୂଳି ପ୍ରଦୂଷଣ ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇ ପଡ଼ୁଥିବା ବେଳେ ଯାତାୟାତ ବିପଦପୂର୍ଣ୍ଣ ହୋଇପଡ଼ିଛି। ସେପଟେ ପାଣି ପାଇପ ଫାଟି ପାଣି ବହି ଯାଉଛି। ଫଳରେ ଲୋକମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି ବୋଲି ସ୍ଥାନୀୟ ଗ୍ରାମବାସୀ ପଙ୍କଜ ବାରିକ କହିଛନ୍ତି। ଉକ୍ତ ଗ୍ରାମରେ ନଳକୂପ ନାହିଁ କି କୌଣସି ପାଣି ସୁବିଧା ମଧ୍ୟ ନାହିଁ। ଫଳରେ ଏଭଳି ପାଣି ବହି ଯାଉଥିବାରୁ ଗ୍ରାମକୁ ପାଣି ପହଞ୍ଚି ପାରୁନାହିଁ, ଲୋକମାନେ ବହୁ ଦୁର୍ଦ୍ଦଶା ଭୋଗୁଥିବା କହିଛନ୍ତି।
ଗତ ସରକାରଙ୍କ ତରଫରୁ ବସୁଧା ଯୋଜନାରେ ପାଇପ୍ ପାଣି ହିଁ ଲୋକଙ୍କ ପାଇଁ ବହୁ ବଡ଼ ସାହାରା ହେଇଥିଲା। ଏଣୁ ତୁରନ୍ତ ଖରାଦିନ ପୂର୍ବରୁ ପାଣି ପାଇପ୍ ସଜାଡ଼ିବାକୁ ସ୍ଥାନୀୟ ଲୋକେ ଦାବି କରିଛନ୍ତି।
ଏପଟେ ଖଣିରୁ ନିର୍ଗତ ଧୂଳିଧୂଆଁ ଖାଇ ଅନେକ ରୋଗରେ ପଡ଼ୁଛନ୍ତି। ଫଳରେ ବହୁ ଗରିବ ପରିବାର ପାଣି ଭଳି ମୌଳିକ ସୁବିଧା ପାଉ ନ ଥିବାରୁ ନର୍କ ଯନ୍ତ୍ରଣା ଭୋଗୁଛନ୍ତି। ଖଣି ସଂସ୍ଥାଗୁଡ଼ିକ ପାରିପାର୍ଶ୍ୱିକ ଉନ୍ନୟନ କାର୍ଯ୍ୟକ୍ରମ ଓ ପ୍ରଶାସନର ଜନ କଲ୍ୟାଣ କାର୍ଯ୍ୟକ୍ରମ ଗ୍ରାମରେ ଅପହଞ୍ଚ ହୋଇପଡ଼ିଛି। ପ୍ରଶାସନ କିମ୍ବା ଖଣି କମ୍ପାନୀମାନେ ଉକ୍ତ ଅଞ୍ଚଳର ମୌଳିକ ସମସ୍ୟା ସମାଧାନ କରିବାକୁ ପଦକ୍ଷେପ ନେଉ ନ ଥିବାରୁ ସେମାନେ ମୁଖ୍ୟମନ୍ତ୍ରୀଙ୍କ ହସ୍ତକ୍ଷେପ କରିବାକୁ ଦାବି କରିଛନ୍ତି।
