ନୂଆଦିଲ୍ଲୀ,୮।୧୦: ଆମ୍ ଆଦ୍ମୀ ପାର୍ଟି (ଏଏପି) ମନ୍ତ୍ରୀ ରାଜେନ୍ଦ୍ର ପାଲ୍ ଗୌତମ୍ ଏକ ଧର୍ମାନ୍ତରୀକରଣ କାର୍ଯ୍ୟକ୍ରମରେ ଯୋଗଦେବା ସମୟର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଏହାକୁ ନେଇ ବିବାଦ ଦେଖାଦେଇଛି। ଏଥିପାଇଁ ଭାଜପା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ସମାଲୋଚନା କରିବା ସହ ସମ୍ପୃକ୍ତ ମନ୍ତ୍ରୀଙ୍କୁ କ୍ୟାବିନେଟରୁ ବିଦା କରିବା ଲାଗି ଦାବି କରିଛି। ମନ୍ତ୍ରୀ ଗୌତମଙ୍କ କାର୍ଯ୍ୟରେ ମୁଖ୍ୟମନ୍ତ୍ରୀ ଅସନ୍ତୁଷ୍ଟ ଥିବା ଏଏପି ପକ୍ଷରୁ କୁହାଯାଇଛି। ତେବେ ଦିଲ୍ଲୀ ସରକାର କିମ୍ବା ମୁଖ୍ୟମନ୍ତ୍ରୀଙ୍କ ପକ୍ଷରୁ ଏନେଇ କିଛି କୁହାଯାଇ ନାହିଁ।
କେଜ୍ରିଓ୍ବାଲ ସରକାରରେ ଗୌତମ ସାମାଜିକ କଲ୍ୟାଣ ମନ୍ତ୍ରୀ ଅଛନ୍ତି। ଏଏପି ହିନ୍ଦୁମାନଙ୍କ ଭାବାବେଗକୁ ଆଘାତ ଦେଇଛି। ଗୌତମଙ୍କ ମନ୍ତବ୍ୟ ଏହି ସମ୍ପ୍ରଦାୟ ପ୍ରତି ଦଳର ଘୃଣା ମାନସିକତାକୁ ପଦାରେ ପକାଇଛି ବୋଲି ଭାଜପା ରାଷ୍ଟ୍ରୀୟ ମୁଖପାତ୍ର ଗୌରବ ଭାଟିଆ ଏକ ଖବରଦାତା ସମ୍ମିଳନୀରେ କହିଛନ୍ତି। ଧର୍ମାନ୍ତରୀକରଣ କାର୍ଯ୍ୟକ୍ରମରେ ୧୦ ହଜାର ଲୋକ ଯୋଗଦେଇ ହିନ୍ଦୁ ଦେବଦେବୀ ପୂଜା ତ୍ୟାଗକରି ବୌଦ୍ଧଧର୍ମ ଗ୍ରହଣ କରିବାକୁ ଶପଥ ନେଇଥିଲେ। କେଜ୍ରିଓ୍ବାଲଙ୍କ ତରଫରୁ ଗୌତମ ହିନ୍ଦୁ ବିରୋଧୀ ମନ୍ତବ୍ୟ ଦେଇଥିବା ଭାଜପା ମୁଖପାତ୍ର କହିଛନ୍ତି।
