କେନ୍ଦୁଝର,୧୧।୧୦ (ସ୍ବ.ପ୍ର.)-କେନ୍ଦୁଝର ଜିଲାର ପ୍ରାକୃତିକ ଝରଣା, ଜଳପ୍ରପାତ ପର୍ଯ୍ୟଟକଙ୍କୁ ଅଧିକ ଆକୃଷ୍ଟ କରିଥାଏ। ଆଉ ଏଠାରେ ବର୍ଷ ତମାମ ପର୍ଯ୍ୟଟକଙ୍କ ଭିଡ ଲାଗିଥାଏ । କିନ୍ତୁ କରୋନା ମହାମାରୀ ପାଇଁ ଚଳିତ ବର୍ଷ ପ୍ରକୃତିପ୍ରେମୀ ପର୍ଯ୍ୟଟକ କଟକଣା ଯୋଗୁ ନିରାଶ ହେଉଛନ୍ତି । କେବେ ପରିସ୍ଥିତି ସ୍ବାଭାବିକ ହେବ ଏବଂ ଏହି ସବୁ ଜଳପ୍ରପାତ ଖୋଲିବ ସେ ଅପେକ୍ଷାରେ ରହିଛନ୍ତି । ଆଗକୁ ଆସୁଛି ଶୀତ ଋତୁ। ଲୋକେ ପର୍ଯ୍ୟଟନ ଋତୁରୁ ମଜା ନେବା ଲାଗି ଚାତକ ପରି ଚାହିଁ ରହିଛନ୍ତି। କରୋନା କଟକଣା ପାଇଁ ପର୍ଯ୍ୟଟନ ବିଭାଗ ପକ୍ଷରୁ ପର୍ଯ୍ୟଟନ କେନ୍ଦ୍ର ମାନ୍ୟତା ପ୍ରାପ୍ତ ଜଳପ୍ରପାତ ଗୁଡିକ ବନ୍ଦ ରଖାଯାଇଛି। କିନ୍ତୁ ଅନ୍ୟ ଅନାଲୋଚିତ ଓ ମାନ୍ୟତା ଅପେକ୍ଷାରେ ଥିବା ଜଳପ୍ରପାତରେ ପର୍ଯ୍ୟଟକଙ୍କ ଉପସ୍ଥିତି ଦେଖିବାକୁ ମିଳୁଛି। ଅନ୍ୟପକ୍ଷରେ ମୁଖ୍ୟମନ୍ତ୍ରୀଙ୍କ ଆଦେଶ କ୍ରମେ ପର୍ଯ୍ୟଟନ ବିଭାଗର ନିର୍ଦ୍ଦେଶକ ତଥା ଅତିରିକ୍ତ ସଚିବ ଏସ.ଆର.ଯାଦବ ଏହି ସବୁ ପର୍ଯ୍ୟଟନ କେନ୍ଦ୍ର ଗୁଡିକ ଖୋଲିବା ନେଇ ତତ୍ପରତା ଦେଖାଇଥିଲେ। ଏଥିନେଇ ଜିଲାପାଳଙ୍କୁ ୭୩୦୨/୫-୧୦-୨୦୨୦ ଚିଠି କରି କଣ୍ଟେନମେଣ୍ଟ ଜୋନ ବ୍ୟତୀତ ଅନ୍ୟ ଅଞ୍ଚଳରେ ଥିବା ପର୍ଯ୍ୟଟନ କେନ୍ଦ୍ର ସାଙ୍ଗକୁ ପର୍ଯ୍ୟଟକଙ୍କ ରହଣୀ ପାଇଁ ହୋଟେଲ, ଗେଷ୍ଟ ହାଉସ ତଥା ଅନ୍ୟ ବ୍ୟବସ୍ଥାର ଅନୁମତି ଦେବାକୁ କୁହାଯାଇଛି ା
ବଣପାହାଡ ଘେରା କେନ୍ଦୁଝର ଜିଲାର ପ୍ରତିଟି ସ୍ଥାନ ରମଣୀୟ। ଏହାର ଥଣ୍ଡା ସବୁଜ ପରିବେଶ ଓ ଜଙ୍ଗଲ ପରିବେଷ୍ଟିତ ପ୍ରକୃତି ଦତ୍ତ ଜଳପ୍ରପାତ ସମସ୍ତଙ୍କୁ ଅଧିକ ମତୁଆଲା କରିଥାଏ। ବ୍ୟସ୍ତମୟ ଜୀବନରୁ ଟିକେ ଦୂରେଇ ରହି ପ୍ରକୃତି ମଧ୍ୟରେ ସମୟ ବିତାଇବା ସହ ଭୋଜିଭାତର ଆନନ୍ଦ ନେବାକୁ ଅନେକ ଚାଲିଆସନ୍ତି ା କେନ୍ଦୁଝର ଜିଲାରେ ସାନଘାଗରା, ବଡଘାଗରା, ଖଣ୍ଡାଧାର, ଗୁଣ୍ଡିଚା ଘାଗୀ, ହାଣ୍ଡିଭଙ୍ଗା, ଭୀମକୁଣ୍ଡ, ମୁର୍ଗା, ଅସୁରଖୋଲ, ପିଶାଚୁଣୀ, ବାରାଗଡ (ଘାଗରା), ପୁଟୁଘରଘାଗୀ, ଚକ୍ରତୀର୍ଥ ଭଳି ବହୁ ପ୍ରାକୃତିକ ସୌନ୍ଦର୍ଯ୍ୟମୟ ଜଳପ୍ରପାତ ରହିଛି। ତେବେ ଏଥିରୁ ଅନେକ ପର୍ଯ୍ୟଟନର ମାନ୍ୟତା ପାଇନାହିଁ। ତେବେ ସାନଘାଗରା ଜଳପ୍ରପାତର ବିକାଶ ପାଇଁ ପ୍ରଶାସନ ଯେଉଁ ଭଳି ଭାବରେ ଉଦ୍ୟମ କରୁଛି ସେଭଳି ଉଦ୍ୟମ ଅନ୍ୟ ପର୍ଯ୍ୟଟନ କେନ୍ଦ୍ର ଗୁଡିକରେ କରୁ ନ ଥିବାରୁ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଉଛି ା ସାନମାଛକାନ୍ଦଣା ନାଳ ଉପରେ ଥିବା ସାନଘାଗରା ଜଳପ୍ରପାତରେ ବୋଟିଂର ମଜା ଓ ଭୋଜିଭାତ କରିବା ପାଇଁ ଲକ୍ଷାଧିକ ପର୍ଯ୍ୟଟକ ଆସିଥାନ୍ତି। ସେହିପରି ସେଠାରୁ ମାତ୍ର ୪ କି.ମି. ଦୂରରେ ଥିବା ବଡଘାଗରା ଜଳ ପ୍ରପାତ ରହିଛି। ହରିଚନ୍ଦନପୁର ଓ ଘଟଗାଁ ବ୍ଲକ ସୀମାରେ ଥିବା ମୁଷଳ ନାଳ ଉପରେ ଥିବା ଗୁଣ୍ଡିଚାଘାଗୀ ଜଳପ୍ରପାତରେ ସ୍ଥାନୀୟ ଲୋକଙ୍କ ଉଦ୍ୟମରେ କିଛି ବର୍ଷ ହେଲା ପ୍ରଶାସନ ବିକାଶମୂଳକ କାମ ଆରମ୍ଭ କରିଛନ୍ତି ା ଏଠାରେ ୩/୪ ଜଳ ପ୍ରପାତ ଗୋଟିଏ ସ୍ଥାନରେ ରହିଥିବା ବେଳେ ଏହାର ମନୋରମ ଦୃଶ୍ୟ ଅନେକଙ୍କୁ ମୁଗ୍ଧ କରିଥାଏ। ସେହିପରି କେନ୍ଦୁଝର ଓ ମୟୂରଭଞ୍ଜ ଜିଲା ସୀମାରେ ଥିବା ବୈତରଣୀ ନଦୀର ଭୀମକୁଣ୍ଡ ଜଳପ୍ରପାତର ବିକାଶ କରାଯାଇ ଓ୍ବାଚ୍ ଟାଓ୍ବାର ନିର୍ମାଣ କରାଯାଇଛି ଯାହାକି ପର୍ଯ୍ୟଟକ ମାନଙ୍କ ପ୍ରମୁଖ ଆକର୍ଷଣ ହେବ। ଝାଡ଼ଖଣ୍ଡ ରାଜ୍ୟ ସୀମାରେ ଥିବା ଜିଲାର ଯୋଡାବ୍ଲକର ମୁର୍ଗା ଠାରେ ଥିବା ମୁର୍ଗାନାଳ ଜଳପ୍ରପାତରେ ଗାଧୋଇବାର ମଜା ନେବା ସହ ଭୋଜିଭାତ , ମୁର୍ଗାମହାଦେବଙ୍କ ଦର୍ଶନ ପାଇଁ ଉଭୟ ରାଜ୍ୟରୁ ଲକ୍ଷାଧିକ ପର୍ଯ୍ୟଟକ ବର୍ଷତମାମ ଆସିଥାନ୍ତି ା ଏନେଇ ପର୍ଯ୍ୟଟନ ଅଧିକାରୀ ରମେଶ ଚନ୍ଦ୍ର ନାୟକଙ୍କୁ ପଚାରିବାରୁ ହୋଟେଲରେ ୩୦ ପ୍ରତିଶତ ଲୋକ ରହିବା ବ୍ୟବସ୍ଥା କରାଯାଇଛି। ଖୁବ ଶୀଘ୍ର ଜଳପ୍ରପାତ ସମେତ ଅନ୍ୟାନ୍ୟ ପର୍ଯ୍ୟଟନ କେନ୍ଦ୍ର ଖୋଲିବା ପାଇଁ ପଦକ୍ଷେପ ନିଆଯାଉଛି।
ଫଟୋ-
