କୋଟଗଡ,୧୪ା୧୦(ଡି.ଏନ.ଏ.): କନ୍ଧମାଳ ଜିଲାରେ ଏଭଳି କେତେକ ସ୍ଥାନ ଅଛି ଯେଉଁଠି କି ବର୍ତ୍ତମାନ ପର୍ଯ୍ୟନ୍ତ ପୋଲ କିମ୍ବା ଭଲ ରାସ୍ତାଖଣ୍ଡେ ନାହିଁ। ଫଳରେ ଲୋକେ ଯାତାୟାତରେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଲୋକେ ଅଭିଯୋଗ କଲେ ମଧ୍ୟ ପ୍ରଶାସନ କିମ୍ବା ରାଜନେତା ସମସ୍ୟା ଜାଣି ମଧ୍ୟ ନୀରବ ରହୁଛନ୍ତି। ଏମିତି ଦେଖିବାକୁ ମିଳିଛି କନ୍ଧମାଳ ଜିଲା ତୁମୁଡିବନ୍ଧ ବ୍ଲକ ଶୀର୍ଲା ପଞ୍ଚାୟତରେ। ସେଠାରେ ଥିବା ରାହୁଲ ନଦୀ ଲୋକଙ୍କ ଲାଗି ସମସ୍ୟା ସାଜିଛି। ଏଠାରେ ପୋଲ ନ ଥିବାରୁ ଦଉଡି ସାହାଯ୍ୟରେ ପାର ହେବାକୁ ପଡୁଛି। ଶୀତ ଓ ବର୍ଷା ଦିନେ ଜୀବନ ବାଜି ଲାଗୁଛି। କାହାର ଦେହ ଖରାପ ହେଲେ ମଧ୍ୟ ସମସ୍ୟା ଦ୍ୱିଗୁଣିତ ହେଉଛି।
ନଦୀ ଆରପଟେ ଥିବା ପୀଡାମାହା, ପାଙ୍ଗାଲପଦର ଓ ଲିଙ୍ଗିରିମାହା ଆଦି ଗ୍ରାମରେ ବସବାସ କରୁଥିବା ପ୍ରାୟ ୫୦୦ଶହ ଲୋକ ଅଭିଶପ୍ତ ଜୀବନ ବିତାଉଛନ୍ତି। ପ୍ରତିଦିନ ଏମାନେ ବିଭିନ୍ନ କାର୍ଯ୍ୟଲାଗି କୋଟଗଡ ଓ ସୁବର୍ଣ୍ଣଗିରିରେ ଥିବା ମେଡିକାଲ କିମ୍ବା ହାଟବଜାର ଲାଗି ଆସିଥାନ୍ତି। ଏମାନେ ଦଉଡି ସାହାଯ୍ୟରେ ନଦୀପାଣିରେ ପଶି ବିପଦସଙ୍କୁଳ ଅବସ୍ଥାରେ ପାର ହୋଇଥାନ୍ତି। ନିର୍ବାଚିତ ଜନପ୍ରତିନିଧି କିମ୍ବା ସ୍ଥାନୀୟ ପ୍ରଶାସନ ସମସ୍ୟା ବିଷୟରେ ଅବଗତ ଥାଇ ମଧ୍ୟ ନୀରବ ରହୁଛନ୍ତି। ଉକ୍ତ ସମସ୍ୟା ଉପରେ ପ୍ରଶାସନ ଧ୍ୟାନ ଦେବାକୁ ସରପଞ୍ଚ ନୁସୁଙ୍ଗା ପାଟ୍ଟମାଝି, ଓ୍ବାର୍ଡ ମେମ୍ବର ସଞ୍ଜ ମଲ୍ଲିକ, ସୁରେନ୍ଦ୍ର ମଲ୍ଲିକ, ରାଜେଶ ନାୟକ, ଆୟୁବ ନାୟକ, ସୀମାଞ୍ଚଳ ମଲ୍ଲିକ, ଶ୍ରମିକ ମୁଠାମାଝି, ରାମଚନ୍ଦ୍ର ପାଟ୍ଟମାଝି, ଦିଗମ୍ବର ମୁଠାମାଝି, ନିକ୍ର ପାଟ୍ଟମାଝି ଓ ବିଶ୍ୱନାଥ ମଲ୍ଲିକ ପ୍ରମୁଖ ଦାବି କରିଛନ୍ତି।
