ଭୋଗରାଇ,୧୫।୯(ଡି.ଏନ.ଏ.)- ପଶ୍ଚିମବଙ୍ଗର ଦାଦାଗିରିକୁ ମୁହଁତୋଡ଼ ଜବାବ ଦେଇଛନ୍ତି ଓଡ଼ିଶା ସରକାର। ବାଲେଶ୍ୱର ଜିଲା ଭୋଗରାଇ ବ୍ଲକ ଅଧୀନ ଉଦୟପୁର ବେଳାଭୂମିକୁ କୌଶଳକ୍ରମେ ଦଖଲ ଉଦ୍ୟମକୁ ପଣ୍ଡ କରିଛନ୍ତି ଜିଲା ପ୍ରଶାସନ। ଗତ ୭ ତାରିଖ ଉଦୟପୁର ବେଳାଭୂମିରେ ପଶ୍ଚିମବଙ୍ଗ ସେଚ ବିଭାଗ ପକ୍ଷରୁ ରାତିଅଧିଆ ସମୁଦ୍ରତଟ ସୁରକ୍ଷା ପଥର କାର୍ଯ୍ୟ କରୁଥିବା ସ୍ଥାନୀୟ ଲୋକଙ୍କ ସୂଚନା ପାଇ ଜିଲା ପ୍ରଶାସନ ସେଠାରେ ପହଞ୍ଚତ୍ ଓଡ଼ିଶା ମଧ୍ୟରେ ବେଆଇନ କାର୍ଯ୍ୟକୁ ବନ୍ଦ କରିଥିଲେ। ମଙ୍ଗଳବାର ପ୍ରବଳ ଝଡ଼ବର୍ଷା ମଧ୍ୟରେ ପଶ୍ଚିମବଙ୍ଗର ସେଚ ବିଭାଗ ପୁଣି ବିବାଦୀୟ ସ୍ଥାନରେ କାର୍ଯ୍ୟ ଆରମ୍ଭ କରୁଥିବା ବେଳେ ଜିଲା ପ୍ରଶାସନ ଖବର ପାଇ ସେଠାରେ ପହଞ୍ଚତ୍ ପଶ୍ଚିମବଙ୍ଗ ସେଚ ବିଭାଗକୁ ଫେରିଯିବାକୁ କହି ୧୪୪ ଧାରା ଜାରି କରିବା ସହିତ ନାଲି ପତାକା ପୋତି ପଶ୍ଚିମବଙ୍ଗ ପ୍ରଶାସନକୁ ସତର୍କ କରାଇଥିଲେ। ଜିଲା ପ୍ରଶାସନର ନିର୍ଦ୍ଦେଶ ପାଇ ଭୋଗରାଇ ତହସିଲଦାର କମଳାକାନ୍ତ ପଣ୍ଡା, ତାଳସାରୀ ମେରାଇନ ଥାନା ପୋଲିସ ସହିତ ରାଜସ୍ବ ବିଭାଗର କର୍ମଚାରୀ ମିଳିତ ହୋଇ ପ୍ରଶାସନର ସମସ୍ତ କାର୍ଯ୍ୟ କରିବା ପରେ ପଶ୍ଚିମବଙ୍ଗ ସେଚ ବିଭାଗର ବରିଷ୍ଠ ଅଧିକାରୀ ଓ କର୍ମକର୍ତ୍ତାମାନେ ଘଟଣାସ୍ଥଳରୁ ପଛଘୁଞ୍ଚା ଦେଇଥିଲେ।
ପଶ୍ଚିମବଙ୍ଗ ସରକାର ଦୀଘା-ଶଙ୍କରପୁର ଉନ୍ନୟନ ପରିଷଦ ମିଳିତ ଉଦ୍ୟମରେ ବାଲେଶ୍ୱର ସୀମାନ୍ତ ସାହାବାଜିପୁର, ଉଦୟପୁରକୁ ସ୍ଥାନକୁ ନେବାକୁ ବାରମ୍ବାର ପ୍ରୟାସ କରିଆସୁଛନ୍ତି। ସୀମାନ୍ତବାସୀଙ୍କ ପ୍ରବଳ ପ୍ରତିରୋଧ ଓ ଓଡ଼ିଶା ସରକାରଙ୍କ ଉପସ୍ଥିତି ଯୋଗୁ ପଶ୍ଚିମବଙ୍ଗ ସରକାର ସୀମାରେ ଖେଳ ଖେଳି ବିଫଳ ହୋଇ ନିରାଶ ହୋଇ ଫେରୁଛନ୍ତି।
