ନୟାଗଡ଼,୯।୨(ଲୋକନାଥ ମିଶ୍ର): ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟ(ଡିଏଚ୍ଏଚ୍) ଲିଫ୍ଟରେ ଜଣେ ୧୫ ବର୍ଷୀୟା ନାବାଳିକାଙ୍କୁ ସଫେଇ କର୍ମଚାରୀ ଅସଦାଚରଣ କରିଛନ୍ତି। ଏହି ଘଟଣା ଜଣାପଡିବା ପରେ ସେଠାରେ ଉତ୍ତେଜନା ପ୍ରକାଶ ପାଇଛି। ନାବାଳିକା ଲିଫ୍ଟରେ ଚେତାଶୂନ୍ୟ ହେବାପରେ ଅଭିଯୁକ୍ତ ସ୍ବାସ୍ଥ୍ୟ କର୍ମଚାରୀ ଲିଫ୍ଟ ଛାଡି ପଳାଇ ଯାଇଛନ୍ତି। ରୋଗଣୀ ମା’ପାଇଁ ନିରାମୟ କେନ୍ଦ୍ରରୁ ଔଷଧ ଆଣିବାକୁ ଲିଫ୍ଟରେ ଯାଉଥିବାବେଳେ ନାବାଳିକାଙ୍କ ସହ ଏଭଳି ଘଟଣା ଘଟିଛି।
ଏନେଇ ନୟାଗଡ଼ ଟାଉନ ଥାନାରେ ପୀଡ଼ିତାଙ୍କ ବାପା ଅଭିଯୋଗ କରିବା ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି। ଅଭିଯୁକ୍ତ କୁହାଯାଉଥିବା ନୂଆଗାଁ ଥାନା ମହିପୁର ଗାଁର ପ୍ରତାପ କୁମାର ନାହାକ(୪୦)ଙ୍କୁ ପୋଲିସ ଅଟକ ରଖି ପଚରାଉଚୁରା କରୁଛି।
ଅଭିଯୋଗ ଅନୁଯାୟୀ, ଖୋର୍ଦ୍ଧା ଜିଲା ବେଗୁନିଆ ଥାନା ଅଞ୍ଚଳର ଜଣେ ମହିଳାଙ୍କ ୨ କିଡ୍ନୀ ଖରାପ ହୋଇଯାଇଛି। ତାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରେ ଗତ ୨୩ ତାରିଖରେ ଭର୍ତ୍ତି କରାଯାଇଥିଲା। ସେ ଏବେ ମେଡିସିନ ୱାର୍ଡରେ ଚିକିତ୍ସିତ ହେଉଛନ୍ତି। ତାଙ୍କର ସେବା କରିବା ପାଇଁ ପାଖରେ ୧୫ ବର୍ଷର ଝିଅ ଅଛନ୍ତି।
ବୁଧବାର ରାତି ପ୍ରାୟ ୯ଟାରେ ମା’ଙ୍କ ପାଇଁ ଔଷଧ ନେବାକୁ ଝିଅ ଲିଫ୍ଟରେ ତଳ ମହଲାର ନିରାମୟ କେନ୍ଦ୍ରକୁ ଆସୁଥିଲେ। ଏହି ସମୟରେ ଜିଲା ମୁଖ୍ୟ ଚିକିତ୍ସାଳୟର ସଫେଇ କର୍ମଚାରୀ ପ୍ରତାପ ଲିଫ୍ଟରେ ନାବାଳିକାଙ୍କୁ ବଳାତ୍କାର ଉଦ୍ୟମ କରିବା ସହ ତାଙ୍କ ଶରୀରର ବିଭିନ୍ନ ଅଙ୍ଗକୁ ସ୍ପର୍ଶ କରିଥିଲେ । ପୀଡ଼ିତା କାନ୍ଦିବାରୁ ମା’ ଓ ଝିଅକୁ ହତ୍ୟା ଧମକ ଦେଇ ପ୍ରତାପ ତାଙ୍କ ସହ ଅସଦାଚରଣ କରିଥିଲେ। ଏପରି ପରିସ୍ଥିତିରେ ପୀଡ଼ିତା ଲିଫ୍ଟରେ ଅଚେତ ହୋଇ ପଡ଼ିବାରୁ ପ୍ରତାପ ଭୟରେ ପଳାଇ ଯାଇଥିଲେ । କେତେଜଣ ଲୋକ ପୀଡ଼ିତାଙ୍କୁ ଉଦ୍ଧାର କରି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ନାବାଳିକା ୨ ଦିନ ହେଲା ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି।
ଏନେଇ ପୀଡ଼ିତାଙ୍କ ବାପା କୁହନ୍ତି, ଜିଲା ମୁଖ୍ୟ ଚିକିତ୍ସାଳୟରେ ଅସଦାଚରଣ ଓ ବଳାତ୍କାର ଉଦ୍ୟମ ପରି ଘଟଣା ଛୋଟ କଥା ନୁହେଁ । ଏଭଳି ଘଟଣା ପରେ ଲିଫ୍ଟରେ ଯିବାକୁ ଝିଅ ବୋହୂମାନେ ଭୟ କଲେଣି । ପୋଲିସ ଅଭିଯୁକ୍ତଙ୍କୁ ଅଟକ ରଖି ପଚରାଉଚୁରା କରୁଛି । ତେବେ ଅଭିଯୁକ୍ତଙ୍କୁ ଚାକିରିରୁ ବହିଷ୍କାର କରାଯିବା ସହ କଠୋର ଦଣ୍ଡରେ ଦଣ୍ଡିତ କରିବାକୁ ସେ ଅନୁରୋଧ କରିଛନ୍ତି । ନୟାଗଡ଼ ଟାଉନ ଥାନା ଆଇଆଇସି ବିଜୟା ସାହୁ ଓ ନୟାଗଡ଼ ଏସ୍ଡିପିଓ ସ୍ନେହାଶିଷ ସାହୁ କୁହନ୍ତି, ଅଭିଯୋଗ ପରେ ପୋଲିସ ସଫେଇ କର୍ମଚାରୀ ପ୍ରତାପଙ୍କୁ ଅଟକ ରଖି ପଚରାଉଚୁରା କରୁଛି । ଶୁକ୍ରବାର ଉଭୟଙ୍କୁ ଡାକ୍ତରୀ ମାଇନା କରାଯିବ । ଏ ସଂକ୍ରାନ୍ତରେ ଏକ ମାମଲା(ନଂ.୪୫/୨୪)ରୁଜୁ କରାଯାଇ ତଦନ୍ତ ଚାଲିଛି ବୋଲି ଉଭୟେ କହିଛନ୍ତି।
