ଭୁବନେଶ୍ୱର,୨୮।୨(ବ୍ୟୁରୋ):ଟ୍ରାଫିକ ଜାମ୍ ସହରୀ ଜନଜୀବନକୁ ଦହଗଞ୍ଜ କରୁଛି। ରାଜଧାନୀ ଭୁବନେଶ୍ୱର ସମେତ ଖୋର୍ଦ୍ଧା, ପୁରୀ, କଟକ ଆଦି ବଡ଼ ବଡ଼ ସହରରେ ଏହି ସମସ୍ୟା ଉତ୍କଟ ହେବାରେ ଲାଗିଛି। ପଦାକୁ ବାହାରିଲେ ସହରବାସୀଙ୍କୁ ଟ୍ରାଫିକରେ ଫସିଯିବାର ଭୟ ଘାରୁଛି। ବିଶେଷକରି ୧୬ ନମ୍ବର ଜାତୀୟ ରାଜପଥରେ ଟ୍ରାଫିକ ଯନ୍ତ୍ରଣା ସବୁଠୁ ବଳିଯାଇଛି। ସୋମବାର ବ୍ରେକ୍ ଫେଲ୍ ହୋଇଥିବା ଏକ ଟ୍ରକ୍ ପାଇଁ ଜାତୀୟ ରାଜପଥର ଭୁବନେଶ୍ୱରୁ ଖୋର୍ଦ୍ଧା ମଧ୍ୟରେ ପ୍ରାୟ ୫ ଘଣ୍ଟାରୁ ଅଧିକ ସମୟ ଟ୍ରାଫିକ୍ ଜାମ୍ ହୋଇଥିଲା। ପାତ୍ରପଡ଼ା ନିକଟରୁ ଖୋର୍ଦ୍ଧା ପିତାପଲ୍ଲୀ ପର୍ଯ୍ୟନ୍ତ ଗାଡ଼ି ଲମ୍ବିଥିଲା। ଜାତୀୟ ରାଜପଥ ଓ ସର୍ଭିସ୍ ରୋଡ୍ରେ ହଜାର ହଜାର ଗାଡିମୋଟର ସହ ଲୋକେ ଫସି ରହି ଖରାରେ ଏକପ୍ରକାର ଛଟପଟ ହୋଇଥିଲେ। ସେମାବେ ପୋଲିସ ଓ ଜାତୀୟ ରାଜପଥ କର୍ତ୍ତୃପକ୍ଷଙ୍କ ଉପରେ ତୀବ୍ର ଅସନ୍ତୋଷ ପ୍ରକାଶ କରିଥିଲେ। ଟ୍ରାଫିକ୍ ପରିଚାଳନା ସହ ଟ୍ରକ୍କୁ ମରାମତି କରି ସାଇଡ୍ କରିବାରେ ବାରମ୍ବାର ଉଦ୍ୟମ ବିଫଳ ହେବାରୁ ସ୍ଥିତି ଆହୁରି ବିଗିଡ଼ି ଯାଇଥିଲା।
ସୋମବାର ସକାଳେ ତମାଣ୍ଡୋ ଥାନା ଅଧୀନ ଗୋହିରା ଛକ ନିକଟରେ ଏକ ଟ୍ରକ ବ୍ରେକ୍ ଡାଉନ ହୋଇଥିଲା। ରାସ୍ତା ଉପରୁ ଗାଡିକୁ ହଟାଇବା ପୂର୍ବରୁ ଗୋଟିଏ ପରେ ଗୋଟିଏ ଗାଡି ପଛକୁ ପଛ ଲମ୍ବି ଚାଲିଥିଲା। ଫଳରେ ଉକ୍ତ ରାସ୍ତାରେ ଗାଡି ଯିବାଆସିବା ଆଉ ସମ୍ବବ ହୋଇ ନ ଥିଲା। ସେଠାରେ ଟ୍ରାଫିକ ପରିଚାଳନା ପାଇଁ ପୋଲିସ ପକ୍ଷରୁ କୌଣସି ତତ୍ପରତା ନ ପାଇବାରୁ ଖୋର୍ଦ୍ଧାରୁ ଗୋରିହା ଛକ ପର୍ଯ୍ୟନ୍ତ ପ୍ରାୟ ୧୦ରୁ ଊର୍ଦ୍ଧ୍ୱ କିମି ପର୍ଯ୍ୟନ୍ତ ଗାଡିର ଲମ୍ବା ଲାଇନ୍ ଲାଗିଥିଲା। ସକାଳ ୮ ଟାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଦୁଇ ଚକିଆ ଓ ଚାରି ଚକିଆ ଗାଡି ରାସ୍ତା ଉପରେ ଅଟକି ରହିଥିଲା। ଭିଡରେ ଲୋକମାନେ ହଇରାଣ ହେବା ପରେ ପୋଲିସ ଘଟଣାସ୍ଥଳରେ ପହଞ୍ଚତ୍ ସ୍ଥିତି ନିୟନ୍ତ୍ରଣ କରିଥିଲା।ପାଖାପାଖି ୪ ଘଣ୍ଟା ଧରି ପୋଲିସକୁ ନାକେଦମ ହେବାକୁ ପଡ଼ିଥିଲା। ଏହା ଭିତରେ ଖୋର୍ଦ୍ଧା ଆଡୁ ଭୁବନେଶ୍ୱରକୁ ଆସୁଥିବା ଲୋକମାନେ ନାହିଁ ନ ଥିବା ହଇରାଣ ହୋଇଥିଲେ। ଏମିତିକି କିଏ ଅଫିସ ଯିବାକୁ ଓ ଜରୁରୀକାଳୀନ କାମରେ ଯାଉଥିବା ଲୋକମାନେ ଭିଡରେ ଅଣନିଃଶ୍ୱାସୀ ହୋଇ ପଡିଥିଲେ। ଏହାପରେ ପିତାପ୍ଲଲୀଠାରୁ ଗାଡିକୁ ଡାଇଭର୍ସନ କରାଯାଇ ଚନ୍ଦକା ରାସ୍ତାରେ ଗାଡି ଛଡା ଯାଇଥିଲା। ଅନ୍ୟପଟେ ପୋଲିସ ପକ୍ଷରୁ ତ୍ୱରିତ ପଦକ୍ଷେପ ନିଆଯାଇଥିଲେ ଏପରି ଜାମକୁ ନିୟନ୍ତ୍ରଣ କରାଯାଇପାରିଥାନ୍ତା ବୋଲି ଭିଡରେ ଫଶିଥିବା ଲୋକମାନେ କହିଛନ୍ତି। ଆହୁରି ମଧ୍ୟ ସବୁବେଳେ ଛୋଟ ଛୋଟ ସମସ୍ୟାକୁ ନେଇ ଜାତୀୟ ରାଜପଥରେ ବଡ ଧରଣର ଟ୍ରାଫିକ ସମସ୍ୟା ସୃଷ୍ଟି ହେଉଛି । ଟ୍ରାଫିକ ବ୍ୟବସ୍ଥାକୁ ସୁଦୃଢ କରିବା ସହ ଆଗାମୀ ଦିନରେ ଜାମକୁ କିଭଳି ରୋକାଯାଇ ପାରିବ ସେ ଦିଗରେ ପଦକ୍ଷେପ ନେବାକୁ ଲୋକମାନେ ଦାବି କରିଛନ୍ତି । ଏନେଇ ଟ୍ରାଫିକ ଏସିପି ସ୍ବସ୍ତିକ ପଣ୍ଡା କହିଛନ୍ତି, ପ୍ରଥମେ ଏକ ଗାଡି ଭୁବନେଶ୍ୱରରୁ ଖୋର୍ଦ୍ଧା ଆଡକୁ ଯାଉଥିବାବେଳେ ରାସ୍ତାରେ ଖରାପ ହୋଇଥିଲା। ତେଣୁ ଭିଡ ହେବାରୁ ସବୁ ଗାଡିକୁ ରଙ୍ଗ ରୁଟ୍ରେ ଛଡା ଯାଇଥିଲା। ଏହି ସମୟରେ ରଙ୍ଗ୍ ରୁଟ୍ରେ ଯାଉଥିବା ଏକ ଟ୍ରକ୍ ଗୋହିରା ଛକରେ ବ୍ରେକ ଫେଲ୍ ହେବାରୁ ଅଟକି ରହିଥିଲା। ତେଣୁ ଉକ୍ତ ଗାଡିକୁ ହଟାଇବାକୁ ୩ଟି କ୍ରେନ ଲଗାଯାଇଥିଲେ ମଧ୍ୟ ସବୁ ଫେଲ ମାରିଥିଲା। ଏହା ପରେ ଏକ ମେକାନିକଙ୍କୁ ଡକାଯିବାରୁ ସେ ପହଞ୍ଚି ଗାଡି ସଜାଡିବାରୁ ରାସ୍ତାରୁ ଗାଡିକୁ ସାଇଡ୍ କରାଯାଇଥିଲା। ଏହାପରେ ଗାଡି ଚଳାଚଳ ସ୍ବାଭାବିକ ହୋଇଥିଲା। ଯେହେତୁ ଗାଡିକୁ ଗାଡି ଲମ୍ବା ଲାଇନ ଲାଗିରହିଥିଲା ଟ୍ରାଫିକ ଜାମକୁ ଖାଲି କରିବାକୁ ଟିକେ ଅଧିକ ସମୟ ଲାଗିଥିବା ସେ କହିଛନ୍ତି। ଅନ୍ୟପଟେ ଗୋହିରା ଛକ ପାଖରେ ପ୍ଲାଏ ଓଭର ବ୍ରିଜ୍ କାମ ଚାଲୁଥିବାରୁ ମଧ୍ୟ ଟିକେ ସମସ୍ୟା ଲାଗିରହୁଥିବା ସେ କହିଛନ୍ତି।
