ଭୁବନେଶ୍ୱର,୨୧ା୧(ବ୍ୟୁରୋ): ୟୁନିଟ-୧ ଆଦିବାସୀ ପଡ଼ିଆରେ ଆସନ୍ତା ୨୬ତାରିଖରୁ ଆରମ୍ଭ ହେବ ଆଦିବାସୀ ମେଳା। କରୋନା ମହାମାରୀ ଯୋଗୁ ଷ୍ଟଲ୍ ସଂଖ୍ୟା ହ୍ରାସ କରି ମେଳାକୁ ୟୁନିଟ୍-୩ ଇଡ୍କୋ ପ୍ରଦର୍ଶନୀ ପଡ଼ିଆ ପରିବର୍ତ୍ତେ ଆଦିବାସୀ ପଡ଼ିଆରେ କରିବାକୁ ନିଷ୍ପତ୍ତି ନିଆଯାଇଛି। ଫେବୃୟାରୀ ୯ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଏହି ମେଳାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦ୍ଘାଟନ କରିବେ। ଏଥର ମେଳା ହାଇବ୍ରିଡ୍ ମୋଡ୍ରେ ଅନୁଷ୍ଠିତ ହେବ। ଏଥିପାଇଁ ଉଭୟ ଭର୍ଚୁଆଲ୍ ମୋଡ୍ ଏବଂ କ୍ଷେତ୍ରସ୍ତରୀୟ ଆୟୋଜନର ବ୍ୟବସ୍ଥା କରାଯାଇଛି। ଏଥିପାଇଁ ଆଦିବାସୀ ମେଳା-୨୦୨୧ ପାଇଁ ଏକ ସ୍ବତନ୍ତ୍ର ୱେବ୍ସାଇଟ୍ କରାଯିବା ସହ ସେଥିରେ ରାଜ୍ୟ ବାହାରର ଦର୍ଶକଙ୍କୁ ପଞ୍ଜୀକରଣ କରିବାକୁ କୁହାଯାଇଛି। ରାଜ୍ୟ ବାହାରର ଦର୍ଶକ ମେଳା ବୁଲିବାକୁ ଆସିବାକୁ ହେଲେ ପ୍ରଥମେ ଏହି ୱେବ୍ସାଇଟରେ ପଞ୍ଜୀକରଣ କରିବାକୁ ପଡ଼ିବ। ଜାନୁୟାରୀ ୨୩ତାରିଖରୁ ଅନ୍ଲାଇନ ରେଜିଷ୍ଟ୍ରେଶନ ଆରମ୍ଭ ହେବା ନେଇ ସୂଚନା ମିଳିଛି।
ହାଇବ୍ରିଡ୍ ମୋଡ୍ ମେଳାର ସଫଳ ଆୟୋଜନ ନିମନ୍ତେ ବୁଧବାର ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ସୋସିଆଲ ମିଡିଆ ପ୍ଲାଟଫର୍ମକୁ ଉଦ୍ଘାଟନ କରି କହିଛନ୍ତି, କୋଭିଡ୍ ମହାମାରୀର ଏକ ସକରାତ୍ମକ ଫଳାଫଳ ସ୍ବରୂପ ଅନୁସୂଚିତ ଜାତି ଓ ଜନଜାତି ଉନ୍ନୟନ ଏବଂ ସଂଖ୍ୟାଲଘୁ, ପଛୁଆ ବର୍ଗ ବିକାଶ ବିଭାଗ ତରଫରୁ ଏହି ଅଭିନବ ପ୍ରଚେଷ୍ଟା ଆରମ୍ଭ ହୋଇଛି। ଏହାଦ୍ୱାରା ଓଡ଼ିଶାର ଆଦିବାସୀ ମେଳା ଦେଶ ବିଦେଶରେ ଅଧିକ ଲୋକପ୍ରିୟତା ହାସଲ କରିବ। ମେଳାର ଭର୍ଚୁଆଲ୍ ମୋଡ୍ରେ ଏକ ବିପଣୀ ପ୍ଲାଟ୍ଫର୍ମ ରହିବ ଯାହା ମାଧ୍ୟମରେ ଲୋକମାନେ ଆଦିବାସୀ ଉତ୍ପାଦ କ୍ରୟ କରିପାରିବେ। ଏହି ବିପଣୀ ପ୍ଲାଟଫର୍ମକୁ ବିକଶିତ କରି ଏକ ସ୍ଥାୟୀ ପ୍ଲାଟଫର୍ମ ଭାବେ ସ୍ଥାପିତ କରିବାକୁ ମହାପାତ୍ର ବିଭାଗକୁ ନିର୍ଦ୍ଦେଶ ଦେଇଛନ୍ତି। ଏହି ଅବସରରେ ଉନ୍ନୟନ କମିଶନର ପ୍ରଦୀପ ଜେନା କହିଥିଲେ ଯେ, ବିଭାଗର ଏ ପ୍ରକାର ପ୍ରଚେଷ୍ଟା ଫଳରେ ଓଡ଼ିଶା ଆଦିବାସୀ କଳାକାର, ଶିଳ୍ପୀ, ଉଦ୍ୟୋଗୀ ଓ ବୁଣାକାରମାନେ ବିଶ୍ୱସହ ଯୋଡ଼ି ହୋଇପାରିବେ।
ମେଳା ଦୈନିକ ପୂର୍ବାହ୍ନ ୧୧ଟାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ସର୍ବସାଧାରଣଙ୍କ ପାଇଁ ଖୋଲାରହିବ। କୋଭିଡ୍ ଗାଇଡ୍ଲାଇନକୁ କଡ଼ାକଡ଼ି ପାଳନ କରି ଆଦିବାସୀ ମେଳାର ଆୟୋଜନ କରାଯିବ। ଏଥର ମୋଟ ୯୦ଟି ଷ୍ଟଲ୍ ଖୋଲିବ। ରାଜ୍ୟର ବିଭିନ୍ନ ସମ୍ପ୍ରଦାୟର ଜନଜାତି ସମ୍ପ୍ରଦାୟ ମେଳାରେ ଅଂଶଗ୍ରହଣ କରି ସେମାନଙ୍କ ଦ୍ୱାରା ପ୍ରସ୍ତୁତ ପାରମ୍ପରିକ ସାମଗ୍ରୀ, ହସ୍ତତନ୍ତ ଓ ହସ୍ତଶିଳ୍ପ ଘରକରଣା ଓ ଘରସଜ୍ଜା ଉପକରଣ ଏବଂ ଖାଦ୍ୟ ସାମଗ୍ରୀ ବିକ୍ରିବଟା କରିବେ।
