କାମାକ୍ଷାନଗର, ୬।୮(ଡି.ଏନ୍.ଏ.): ଧାରା ଶ୍ରାବଣରେ ଉଭାନ ହୋଇଯାଇଛି ବର୍ଷା। ଧାନତଳି ରୋଇବା ଯୋଗ୍ୟ ହୋଇଯାଇଥିଲେ ମଧ୍ୟ ବିଲରେ ପାଣି ନ ଥିବାରୁ କାମ ଆଗଉନି। ଏହାକୁ ନେଇ ଚିନ୍ତାରେ ପଡ଼ିଛନ୍ତି ଢେଙ୍କାନାଳ ଜିଲା କଙ୍କଡ଼ାହାଡ଼ ବ୍ଲକର ୧୦ ପଞ୍ଚାୟତର ଚାଷୀ। ବର୍ଷାଭାବରୁ ବ୍ଲକରେ ମରୁଡ଼ି ଆଶଙ୍କା ଦେଖାଦେଇଥିବାବେଳେ ଶୁକ୍ରବାର ବହୁ ଚାଷୀ ପ୍ରତିନିଧି ଉପଜିଲାପାଳଙ୍କ ଉଦ୍ଦେଶ୍ୟରେ ଦାବିପତ୍ର ଦେଇଛନ୍ତି।
ଆଦିବାସୀ ବହୁଳ କଙ୍କଡ଼ାହାଡ଼ ବ୍ଲକର ଗଡ଼ପଳାଶୁଣି, ମହାବିରୋଡ, ଝିଲ୍ଲି, ଦଶିପୁର, କୁଟୁରିଆ, ଘାଗରାମୁଣ୍ଡା, ବାମ, ପଙ୍ଗାତୀରା, ବିରିବୋଲାଇ, ଚାନ୍ଦପୁର ପଞ୍ଚାୟତର ଅଧିକାଂଶ ପରିବାର ଚାଷ ଉପରେ ନିର୍ଭରଶୀଳ। ଦୁଇବର୍ଷ କରୋନା କଷଣ ପରେ ଚଳିତବର୍ଷ ଭଲ ଫସଲ ଆଶାରେ ଥିଲେ ସେମାନେ। ହେଲେ ସେମାନଙ୍କ ଆଶା ନିରାଶରେ ପରିଣତ ହୋଇଛି। ତଳି ପଡ଼ିବାର ୨ମାସ ବିତିଯାଇଥିଲେ ହେଁ ଜମିରେ ପାଣି ନ ଥିବାରୁ ରୁଆ କି ବେଉଷଣ କାର୍ଯ୍ୟ ହୋଇପାରୁନାହିଁ। ସମ୍ପୃକ୍ତ ଅଞ୍ଚଳରେ ଜଳସେଚନ ବ୍ୟବସ୍ଥା ନ ଥିବାରୁ ସମସ୍ୟା ଆହୁରି ବଢ଼ିଯାଇଛି। ତଳିସବୁ ମରିଯିବାକୁ ବସିଲାଣି। ଧାନ ତଳି ବଞ୍ଚାଇ ରଖିବା ପାଇଁ ଚାଷୀମାନେ ପୋଖରୀ, କୂଅରୁ ପାଣି ବୋହି ନେଇ ପକାଉଛନ୍ତି। ଅନ୍ୟପଟେ ଖରିଫ୍ ଧାନକୁ ନେଇ ଚାଷୀ ଚିନ୍ତାରେ ପଡ଼ିଥିବା ବେଳେ ହାତୀପଲ ଦାଉ ସାଧୁଛନ୍ତି। ବିଭିନ୍ନ ସ୍ଥାନରେ ଦଳବଦ୍ଧ ହାତୀପଲ ତଳିଘରା ନଷ୍ଟ କରିବାରେ ଲାଗିଛନ୍ତି। ଫସଲ ଅମଳ ପରେ ଆବଶ୍ୟକତା ଅନୁଯାୟୀ ଚାଷୀମାନେ ଧାନ ସଞ୍ଚତ୍ତ କରି ରଖିବା ପରେ ଅବଶିଷ୍ଟ ଧାନ ବିକ୍ରି କରି ବର୍ଷସାରା ପରିବାର ପ୍ରତିପୋଷଣ କରିଥାନ୍ତି। ହେଲେ ଅନିୟମିତ ବୃଷ୍ଟିପାତ ଯୋଗୁ ଗଜା ମରୁଡ଼ି ଆଶଙ୍କା ଦେଖାଦେଇଛି। ତେଣୁ କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୂରଣ ଦେବା ପାଇଁ ସେମାନେ ଦାବି କରିଛନ୍ତି। ଉପଜିଲାପାଳ ଅନୁପସ୍ଥିତ ଥିବାରୁ ଏ ସମ୍ପର୍କିତ ଏକ ଦାବିପତ୍ର ଡାକଯୋଗେ ପ୍ରେରଣ କରାଯାଇଥିବା ଚାଷୀ ଧନେଶ୍ୱର ସାହୁ, ମହେଶ୍ବର ନାୟକ, ଭୁବନେଶ୍ୱର ସାହୁ, ରୁଦ୍ରମୋହନ ପ୍ରଧାନ ପ୍ରମୁଖ ସୂଚନା ଦେଇଛନ୍ତି।
