ନନ୍ଦପୁର, ୩୦।୯ (ଶଙ୍କର ପୂଜାରୀ): କୋରାପୁଟ ଜିଲା ନନ୍ଦପୁର ବ୍ଲକ ବାଲଡା ନାଗେଶ୍ୱରୀ ପାହାଡ ଖଣି ଖନନ ପାଇଁ ନଷ୍ଟ ହେବାକୁ ଥିବା ଜଙ୍ଗଲର ସମପରିମାଣ ଜମିରେ ନୂତନ ଜଙ୍ଗଲ ସୃଷ୍ଟି କରିବାକୁ ଖିନବର ଓ ହାତୀବାରୀ ପଞ୍ଚାୟତର ୪୩୭ ଏକର ୬୭ ସେଣ୍ଟ ଜମି ଅଧିଗ୍ରହଣ କରିବାକୁ ଜିଲା ପ୍ରଶାସନ ନିଷ୍ପତ୍ତି ନେଇଛି। ଏଥିଲାଗି ଜିଲାପାଳଙ୍କ ପତ୍ରସଂଖ୍ୟା ୨୨୪୭/୨୩ ଅନୁସାରେ ନନ୍ଦପୁର ତହସିଲଦାର ପାଡୁଆ ରାଜସ୍ବ ନିରୀକ୍ଷକଙ୍କ ଜରିଆରେ ହାତୀବାରି ପଞ୍ଚାୟତର ୩୦୬ ଏକର ୩୭ସେଣ୍ଟ ଜମି ଓ ଖିନବର ପଞ୍ଚାୟତର ଖାତା ନଂ. ୩୩ର ପ୍ଲଟ ନଂ. ୩୦୦,୩୦୧, ୩୦୨,୩୦୩, ୩୦୫,୩୦୬, ୩୦୭, ୩୦୮ର ସମୁଦାୟ ୧୨୪ ଏକର ୩୩ସେଣ୍ଟ ଜମି ଚିହ୍ନଟ କରିଛନ୍ତି, ଯାହାକୁ ଶୁକ୍ରବାର ଖିନବର ପଞ୍ଚାୟତର ୮ଖଣ୍ଡ ଗ୍ରାମର ଗ୍ରାମବାସୀ ମେଳିକରି ବିରୋଧ କରିବାକୁ ସ୍ଥିର କରିଛନ୍ତି। ଚିହ୍ନଟ ୧୨୪ ଏକର ୩୩ ସେଣ୍ଟ ଜମିରେ ସେମାନେ ଧାନ , ମାଣ୍ଡିଆ, ପନିପରିବା ଚାଷକରି ଗୁଜୁରାଣ ମେଣ୍ଟାଉଛନ୍ତି। କିଛି ଜମିକୁ ଗୃହପାଳିତ ପ୍ରାଣୀଙ୍କ ଚରିବାକୁ ଛାଡି ଦେଇଛନ୍ତି। ପଞ୍ଚାୟତର ୧୫ଟି ଗ୍ରାମର ଅଧିକାଂଶ ପରିବାର ଜଙ୍ଗଲ ଓ ରାଜସ୍ବ ଜମିକୁ ବ୍ୟବହାର କରୁଛନ୍ତି। ଆମେ ବ୍ୟବହାର କରୁଥିବା ରାଜସ୍ବ ଜମିରେ ଜଙ୍ଗଲ ସୃଷ୍ଟି ପାଇଁ ପ୍ରଶାସନ ହାତକୁ ଜମି ଟେକିଦେଲେ ଆମେ କ’ଣ କରିବୁ ବୋଲି ଗ୍ରାମବାସୀ ପ୍ରଶ୍ନ ଉଠାଇଛନ୍ତି। କିଛିଦିନ ତଳେ ନନ୍ଦପୁର ବିଡିଓ, ତହସିଲଦାର, ଆର୍ଆଇ ଓ ଏସ୍ଡିପିଓଙ୍କ ଜରିଆରେ ଜିଲାପାଳ ଓ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଜମି ଅଧିଗ୍ରହଣକୁ ବିରୋଧ କରି ଗ୍ରାମବାସୀ ଦାବିପତ୍ର ଦେଇଥିଲେ। ଏହାକୁ ମାସେ ବିତି ଯାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ଆମେ ମରିଯିବୁ ପଛେ ଆମ ପଞ୍ଚାୟତର ଜମି ଅନ୍ୟ କାହାରିକୁ ହସ୍ତାନ୍ତର କରିବୁ ନାହିଁ। ଆଗାମୀ ଦିନରେ ନେଇ ବ୍ଲକ, ତହସିଲ ଓ ଜିଲାପାଳଙ୍କ କାର୍ଯ୍ୟାଳୟ ଘେରାଉ କରି ପ୍ରତିବାଦ କରିବୁ ବୋଲି ଖିନବର ସରପଞ୍ଚ ଭୀମ ଖିଲ, ସମିତି ସଭ୍ୟ ଘାସି ପାଙ୍ଗୀ, ବାସନ୍ତୀ ଖିଲ, ଦସୁ ଖିଲ, ତୁଳାରାମ ପାଙ୍ଗୀ, ଚିତୁ ପାଙ୍ଗୀ, ରାମ ଖିଲଙ୍କ ସମେତ ଶତାଧିକ ଗ୍ରାମବାସୀ ପ୍ରକାଶ କରିଛନ୍ତି। ବିଡିଓ ସୁଜିତ ମିଶ୍ର, ତହସିଲଦାର ନରସିଂହ ଗାଦବା, ଏସ୍ଡିପିଓ ସଞ୍ଜୟ ମହାପାତ୍ର ମିଳିତ ଭାବେ କହିଛନ୍ତି ଯେ, ପଞ୍ଚାୟତବାସୀ ପୂର୍ବରୁ ଦେଇଥିବା ଦାବିପତ୍ର ବିଭାଗୀୟ ମୁଖ୍ୟଙ୍କ ମାଧ୍ୟମରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ପଠାଯାଇଛି। ଆଗକୁ ଯାହା ନିର୍ଦ୍ଦେଶ ଆସିବ ତାହା କାର୍ଯ୍ୟକାରୀ କରାଯିବ।
