ସୁନାବେଡ଼ା,୨ା୯(ସ୍ବ.ପ୍ର.):ସରକାର ଶାରୀରିକ ଓ ମାନସିକ ଅନଗ୍ରସରମାନଙ୍କ ବିକାଶ ଲାଗି ବିଭିନ୍ନ ଯୋଜନା କରିଛନ୍ତି। ମାତ୍ର ସେଥିରୁ ଲାଭ ନେଉଛନ୍ତି କେତେଜଣ ପ୍ରଶାସନିକ ଅଧିକାରୀ ଓ ଠିକାଦାର୍ । ସୁନାବେଡ଼ା ମହିଳା ମହାବିଦ୍ୟାଳୟ ପାର୍ଶ୍ୱରେ ଥିବା ମୂକ ଓ ବଧିର ଛାତ୍ରାବାସ ହେଉଛି ଏହାର ଉଦାହରଣ। ଗତ ୩ ବର୍ଷ ତଳେ ନିର୍ମାଣ ହୋଇଥିବା ୧୦୦ ଶଯ୍ୟା ବିଶିଷ୍ଟ ଦୁଇ ମହଲା ଛାତ୍ରାବାସରେ ୯୬ ଜଣ ଅନ୍ତେବାସୀ ରହନ୍ତି। ତଳ ମହଲାରେ ଛାତ୍ରମାନେ ରହୁଥିବା ବେଳେ ଉପର ମହଲାରେ ୩୨ଜଣ ଛାତ୍ରୀ ରହୁଥିଲେ। ୧୯୯୦ ପୂର୍ବରୁ ଉକ୍ତ ବିଦ୍ୟାଳୟଟି ସୁନାବେଡ଼ା ଚର୍ଚ୍ଚ କଲୋନୀ ନିକଟରେ ଥିଲା। ୨୦୧୮ରେ ପିଲାଙ୍କ ସୁବିଧା ପାଇଁ ୧୦ଟି ଶ୍ରେଣୀଗୃହ ସାଙ୍ଗକୁ ଦୁଇ ମହଲା ବିଶିଷ୍ଟ ଛାତ୍ରାବାସଟିଏ ସରକାର ନିର୍ମାଣ କରିଥିଲେ। ୨୦୧୯ରେ ଏହା ସମ୍ପୂର୍ଣ୍ଣ ହୋଇଥିଲା। ସେହି ବର୍ଷ ଗଣେଶପୂଜା ଦିନ ଅନ୍ତେବାସୀଙ୍କୁ ନୂତନ ଗୃହକୁ ସ୍ଥାନାନ୍ତର କରାଯାଇଥିଲା। ୩ବର୍ଷ ମଧ୍ୟରେ ଛାତ୍ରାବାସର ଅବସ୍ଥା ଶୋଚନୀୟ ହୋଇପଡିଛି। ଛାତ୍ରାବାସ ଓ ଶ୍ରେଣୀଗୃହର ଛାତରୁ ସିମେଣ୍ଟ ଛାଡି ଫାଟି ଆଁ କଲାଣି। ସାମାଜିକ ସୁରକ୍ଷା,ଭିନ୍ନକ୍ଷମ ଓ ସଶକ୍ତୀକରଣ ବିଭାଗ ଦ୍ୱାରା ପରିଚାଳିତ ଏହି କୋଠାରେ ଦୁଇଟି ପ୍ରାରମ୍ଭିକ ଶ୍ରେଣୀ ସହ ପ୍ରଥମରୁ ଅଷ୍ଟମ ଶ୍ରେଣୀ ମୋଟ ୧୦ଟି ଶ୍ରେଣୀ ରହିଛି। ଗତ କିଛିଦିନ ତଳେ ଅସୁରକ୍ଷିତ ମନେକରି ଛାତ୍ରାବାସର ଉପରମହଲାରେ ରହୁଥିବା ଛାତ୍ରୀମାନଙ୍କୁ ରୋଷେଇ ତଥା ଡାଇନିଂ ହଲ୍କୁ ସ୍ଥାନାନ୍ତର କରାଯାଇଛି। କିଛି ପ୍ରଶାସନିକ ଅଧିକାରୀ ଓ ଠିକାଦାରଙ୍କ କାର୍ଯ୍ୟ ପାଇଁ କୋଟି କୋଟି ଟଙ୍କା ପାଣିରେ ପଡୁଛି। ପ୍ରଶାସନ ଶୀଘ୍ର ଏ ଦିଗରେ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।
ଏ ସମ୍ପର୍କରେ ଡିଏସ୍ଏସ୍ଓ ସିମାଞ୍ଚଳ ମହାପାତ୍ରଙ୍କୁ ପଚାରିବାରୁ ସେ କହିଛନ୍ତି, ଏ ନେଇ ଜିଲପାଳଙ୍କୁ ଅବଗତ କରାଯିବ। ପରେ ଏକ ଟେକ୍ନିକାଲ ଟିମ୍ ଛାତ୍ରାବାସର ପରୀକ୍ଷା ନିରୀକ୍ଷା ପାଇଁ ପଠାଯିବ ବୋଲି ସେ କହିଛନ୍ତି।
