ରାଇକିଆ,୨୬ା୧୨(ପ୍ରଦୀପ ବେହେରା): ରାଜ୍ୟର ପ୍ରମୁଖ ଜଳପ୍ରପାତଗୁଡ଼ିକ ମଧ୍ୟରୁ ଅନ୍ୟତମ ହେଉଛି କନ୍ଧମାଳ ଜିଲାର ଲୁଦୁ ଜଳପ୍ରପାତ। ପ୍ରାକୃତିକ ସୌନ୍ଦର୍ଯ୍ୟରେ ଭରପୂର ଏହି ଜିଲାର ବିଭିନ୍ନ ପର୍ଯ୍ୟଟନସ୍ଥଳୀ ମଧ୍ୟରୁ ଏହାର ଆକର୍ଷଣ ଅଲଗା। ଏହି ଜଳପ୍ରପାତ ପ୍ରତି ପର୍ଯ୍ୟଟକଙ୍କ ସ୍ବତନ୍ତ୍ର ଆକର୍ଷଣ ରହିଛି। ବର୍ଷର ବିଭିନ୍ନ ସମୟରେ ବିଶେଷ କରି ଶୀତ ଦିନେ ଏବଂ ପିକ୍ନିକ୍ ଋତୁ ଏଠାରେ ଭିଡ଼ ଜମିଥାଏ। ଜଙ୍ଗଲ, ପାହାଡ଼ ଘେରା ଏବଂ ଦୁର୍ଗମ ଅଞ୍ଚଳ ହୋଇଥିଲେ ମଧ୍ୟ ଏହାର ସୌନ୍ଦର୍ଯ୍ୟ ପ୍ରକୃତିପ୍ରେମୀଙ୍କୁ ଏହି ସ୍ଥାନକୁ ଟାଣି ଥାଏ। ସହରର କୋଳାହଳ ଜୀବନଠାରୁ ଦୂରରେ ରହି ସବୁଜ ଓ ଏହି ଶାନ୍ତ ବାତାବରଣରେ ସମୟ ଟିକେ ବିତେଇବା ପାଇଁ ଅକ୍ଟୋବରରୁ ମାର୍ଚ୍ଚ ମାସ ମଧ୍ୟରେ ପର୍ଯ୍ୟଟକ ଏଠାକୁ ଆସିଥାନ୍ତି। ୧୦୦ ଫୁଟ ଉପରୁ ପାଣି ପଡୁଥିବାର ଦୃଶ୍ୟ ଅତ୍ୟନ୍ତ ମନୋରମ ହୋଇଥିବା ବେଳେ ବୃହତ ପଥର ଚଟାଣ, ସବୁଜ ପରିବେଶ ଏହାର ସୋନ୍ଦର୍ଯ୍ୟକୁ ଦ୍ୱିଗୁଣିତ କରିଥାଏ। ବଣଭୋଜି ପାଇଁ ସବୁ ପ୍ରକାର ବ୍ୟବସ୍ଥା ଥିବାରୁ ପଡ଼ୋଶୀ ଜିଲାଗୁଡ଼ିକରୁ ପିକ୍ନିକ୍ ପାଇଁ ନିୟମିତ ଭିଡ଼ ରହିଥାଏ। କୋଟଗଡ଼ରୁ ସୁବର୍ଣ୍ଣଗିରି ଏବଂ ସେଠାରୁ ଆଗକୁ ୮ କିମି ଗଲେ ଏହି ସ୍ଥାନରେ ପହଞ୍ଚି ହୁଏ। ଦୁର୍ଗମ ଅଞ୍ଚଳ ହୋଇଥିବାରୁ ସେହି ସ୍ଥାନରେ ରହିବା ଖାଇବା ପାଇଁ ସୁବିଧା ନ ଥିବାରୁ ଦାରିଙ୍ଗବାଡ଼ି କିମ୍ବା ବାଲିଗୁଡ଼ାରେ ରହି ସେଠାକୁ ଯାଇ ହେବ ଏବଂ ଗମନାଗମନ ପାଇଁ କୌଣସି ବ୍ୟବସ୍ଥା ନ ଥିବାରୁ ନିଜସ୍ବ ବନ୍ଦୋବସ୍ତରେ ଯିବାକୁ ହୁଏ। ଶୀତ ଦିନରେ ପର୍ଯ୍ୟଟକଙ୍କ ସୁଅ ଛୁଟୁଥିବା ଦାରିଙ୍ଗିବାଡ଼ିଠାରୁ ମଧ୍ୟ ଏହା ନିକଟତର ହେଉଥିବାର ଦାରିଙ୍ଗିବାଡ଼ିକୁ ଆସୁଥିବା ପର୍ଯ୍ୟଟକ ମଧ୍ୟ ଏଠାକୁ ଆସିଥାନ୍ତି। ପ୍ରଚାରପ୍ରସାର ଅଭାବରୁ ବିଶେଷ ଲୋକଲୋଚନକୁ ଆସି ନ ଥିଲେ ମଧ୍ୟ ଏହା ରାଜ୍ୟର ବିଭିନ୍ନ ଆକର୍ଷଣୀୟ ଜଳପ୍ରପାତ ମଧ୍ୟରୁ ଏହା ଅନ୍ୟତମ। ଏଠାକୁ ପହଞ୍ଚିବା ପୂର୍ବରୁ ରାସ୍ତାରେ ଛୋଟ ଛୋଟ ଗାଁ ଏବଂ ଘାଟି ରାସ୍ତା ମଧ୍ୟ ଯାତ୍ରାକୁ ଅଧିକ ରୋମାଞ୍ଚ କରିଥାଏ ବୋଲି ରାୟଗଡ଼ାରୁ ଆସିଥିବା ଜଣେ ପର୍ଯ୍ୟଟକ ଟି. ଶ୍ରୀନିବାସନ କହିଛନ୍ତି।
କେମିତି ଯିବେ:
ଜିଲା ସଦର ମହକୁମା ଫୁଲବାଣୀଠାରୁ ୧୬୮ କିମି ଏବଂ କୋଟଗଡ଼ଠାରୁ ୨୭ କିମି ଦୂରରେ ଅବସ୍ଥିତ। ଭୁବନେଶ୍ୱରଠାରୁ ଲୁଦୁର ଦୂରତା ୩୬୪ କିଲୋମିଟର ହୋଇଥିବା ବେଳେ ବ୍ରହ୍ମପୁରଠାରୁ ୨୫୧ କିଲୋମିଟର। ସେଠାକୁ ସିଧାସଳଖ ଯିବା ପାଇଁ କୌଣସି ବ୍ୟବସ୍ଥା ନ ଥିବା ବେଳେ ଟ୍ୟାକ୍ସି ଯୋଗେ ହିଁ ଯାଇ ପାରିବେ। ଏହାର ନିକଟତମ ସହର ହେଉଛି ବାଲିଗୁଡ଼ା ଓ ଦାରିଙ୍ଗବାଡ଼ି। ଯେଉଁଠାରେ ରହିବା ପାଇଁ ହୋଟେଲ ଏବଂ ସରକାରୀ ଡାକବଙ୍ଗଳା ରହିଛି।
