ପୁରୀ ଅଫିସ,୯।୩: ପୁରୀରେ ଶ୍ରୀଜଗନ୍ନାଥ ଅନ୍ତର୍ଜାତୀୟ ବିମାନ ବନ୍ଦର ନିର୍ମାଣ ପାଇଁ ଯୋଜନା ଚାଲିଛି। ଏଥିଲାଗି ବାରମ୍ବାର ବିଭିନ୍ନ ବୈଷୟିକ ଅଧିକାରୀ ଟିମ୍ ଆସି ବିଭିନ୍ନ ସ୍ଥିତି ଅନୁଧ୍ୟାନ କରୁଥିବା ବେଳେ ମଙ୍ଗଳବାର ଆଉ ଏକ ୭ଜଣିଆ ଟିମ୍ ପୁରୀ ଗସ୍ତରେ ଆସି ସିପସରୁବାଲିର ଅଞ୍ଚଳ ବୁଲି ଦେଖିବା ସହ ଆର୍ଥିକ ଓ ବୈଷୟିକ ସ୍ଥିତି ଅନୁଧ୍ୟାନ କରିଛନ୍ତି। ଏଥିସହ ବିମାନବନ୍ଦର ପାଇଁ ବୈଷୟିକ ଓ ଆର୍ଥତ୍କ କ୍ଷେତ୍ରରେ କ’ଣ ସବୁ ଆବଶ୍ୟକତା ରହିଛି, ସେନେଇ ଟେକ୍ନୋ ଇକୋନୋମିକ ଫିଜିବିଲିଟି ଷ୍ଟଡି କରିବା ପାଇଁ ଇଡ୍କୋ ମାଧ୍ୟମରେ ଦିଲ୍ଲୀର ଡିଲାୟେଡ୍ ନାମକ ଏକ ଘରୋଇ ସଂସ୍ଥାକୁ ଦାୟିତ୍ୱ ମିଳିଛି। ଏହି ସଂସ୍ଥାର ଅଧିକାରୀମାନେ ପୁରୀରେ ପହଞ୍ଚି ସିପସରୁବାଲିରେ ସର୍ଭେ କରିଛନ୍ତି। ବିମାନବନ୍ଦରର ନକ୍ସା ଦେଖିସାରିବା ପରେ ଜମି ଅଧିଗ୍ରହଣ, ରନ୍ୱେ, ବିମାନଯାତ୍ରା ପାଇଁ ଯାତ୍ରୀଙ୍କ ବାର୍ଷିକ ସଂଖ୍ୟା, ସମୁଦ୍ର ନିକଟବର୍ତ୍ତୀ ଅଞ୍ଚଳରେ ବିମାନବନ୍ଦରର ସ୍ଥାୟିତ୍ୱ, ଭିତ୍ତିଭୂମିର ପ୍ରକାର ଓ ଉଦ୍ୟୋଗୀକରଣକୁ ନେଇଥିବା ସମ୍ଭାବନା ଓ ଆହ୍ବାନ ସମ୍ପର୍କରେ ଜିଲାପାଳ ସମର୍ଥ ବର୍ମାଙ୍କ ସହ ଅଧିକାରୀମାନେ ଆଲୋଚନା କରିଛନ୍ତି। ବିମାନବନ୍ଦର ନିର୍ମାଣକୁ ନେଇ ରାଜ୍ୟ ସରକାରଙ୍କର ସମ୍ପୂର୍ଣ୍ଣ ଯୋଜନା ଓ ନକ୍ସାକୁ ଏହି ଟିମ୍ ଟିକିନିଖି କରି ଦେଖିବା ସହ ବିଶେଷ ଭାବେ ବୈଷୟିକ ସ୍ଥିତିକୁ ନେଇ ଜିଲା ପ୍ରଶାସନକୁ ପ୍ରଶ୍ନ କରିଛି। ପୁରୀ ନିକଟବର୍ତ୍ତୀ ରାଜଧାନୀ ଭୁବନେଶ୍ୱରରେ ବିମାନବନ୍ଦର ଥିବା ହେତୁ ଏଠାରେ ଅନ୍ତର୍ଜାତୀୟ ବିମାନବନ୍ଦର କରିବା କେତେ ଫଳପ୍ରଦ ହେବ ଓ ଏହାର ଘରୋଇକରଣ ଫଳରେ ରାଜ୍ୟ ସରକାର କେତେ ଲାଭପ୍ରଦ ହେବେ, ସେ ନେଇ ମଧ୍ୟ ରିପୋର୍ଟ ପ୍ରସ୍ତୁତି ଚାଲିଛି।
ପୁରୀ ଜନଗହଳି ସହର ହୋଇଥିବା ହେତୁ ବିମାନବନ୍ଦରରେ ପହଞ୍ଚୁଥିବା ଯାତ୍ରୀଙ୍କ ଗମନାଗମନ କିଭଳି ସହଜ ହେବ ସେନେଇ ସର୍ଭେ ହୋଇଛି। ଏହି ଟିମ୍ ଦ୍ୱାରା ସର୍ଭେ ରିପୋର୍ଟ ଦାଖଲ ହେବା ପରେ ବିମାନବନ୍ଦର କାର୍ଯ୍ୟ ଆଗେଇପାରିବ। ଜିଲା ପ୍ରଶାସନ ନିକଟରେ ଥିବା ତଥ୍ୟ ଓ ସୂଚନା ସର୍ଭେ ଟିମ୍୍ ଯୋଗାଇ ଦିଆଯାଇଛି। ସେହିଭଳି ନକ୍ସା ଓ ଏହାକୁ ନେଇଥିବା ଛୋଟବଡ଼ ସମସ୍ୟା ସମ୍ପର୍କରେ ମଧ୍ୟ ଆଲୋଚନା ହୋଇଛି ବୋଲି କହିଛନ୍ତି ଉପଜିଲାପାଳ ଭବତାରଣ ସାହୁ।
