ରିଚ୍ମଣ୍ଡ, ୩।୧୦: ଭର୍ଜିନିଆରେ ୪୦୦ ଫୁଟ ଗଭୀର ସମୁଦ୍ରରୁ ଜର୍ମାନୀ ୟୁ ବୋଟ୍ ଠାବ ହୋଇଛି। ୧୦୦ ବର୍ଷ ପରେ ଗବେଷକ ଓ ଟେକ୍ନିକାଲ ରେକ୍ ଡାଇଭରଙ୍କ ସହାୟତାରେ ପ୍ରଥମ ବିଶ୍ୱଯୁଦ୍ଧ ବେଳର ଏହି ଜାହାଜର ସନ୍ଧାନ କରାଯାଇଛି। ୧୯୨୨ରେ ଆମେରିକୀୟ ନୌସେନା ୟୁ-୧୧୧ ଜାହାଜଟିକୁ ସମୁଦ୍ରରେ ବୁଡ଼ାଇ ଦେଇଥିଲା। ଜାହାଜଟି ୧୬୦୦ ଫୁଟ ତଳେ ଥିବା ଆଶଙ୍କା କରାଯାଉଥିବାବେଳେ ମାତ୍ର ୪୦୦ ଫୁଟ ତଳେ ଏହାକୁ ଠାବ କରାଯାଇଛି।
ଜର୍ମାନୀର ପ୍ରଥମ ବିଶ୍ୱଯୁଦ୍ଧ ସମୟରେ ୫ ଏବଂ ଦ୍ୱିତୀୟ ବିଶ୍ୱଯୁଦ୍ଧ ସମୟରେ ୮ଟି ଜାହାଜକୁ ଆମେରିକୀୟ ସମୁଦ୍ରରେ ବୁଡ଼ାଇ ଦେଇଥିବା ସୂଚନା ରହିଛି। ସମୁଦ୍ରର ଖାରିଆ ଜଳ କାରଣରୁ ଜାହାଜର ଅବଶେଷ ନଷ୍ଟ ହୋଇଯାଇଛି। କାଠରେ ତିଆରି ହୋଇଥିବା ଜାହାଜର ଅଂଶ ସବୁ ଦୀର୍ଘ ବର୍ଷ ଧରି ପାଣିରେ ବୁଡ଼ି ରହିବା କାରଣରୁ ଖତିରା ହୋଇଯିବା ସହ ସମୁଦ୍ର ଜୀବ ଓ ଜିଆ ଖାଇ ନଷ୍ଟ କରି ଦେଇଥିବା ଦେଖିବାକୁ ମିଳିଛି। ୧୯୮୫ରେ ରବର୍ଟ ବାଲାର୍ଡ ଟାଇଟେନିକ ବୁଡ଼ାଜାହାଜର ଭଗ୍ନାବଶେଷ ସମୁଦ୍ରରୁ ଠାବ କରିଥିବାବେଳେ ଏଥିରୁ ଅନୁପ୍ରାଣିତ ହୋଇ ଡାଇଭର ଏରିକ୍ ପେଟକୋଭିକ୍ ସମୁଦ୍ରରେ ବୁଡ଼ିଯାଇଥିବା ଜାହାଜଗୁଡ଼ିକର ସନ୍ଧାନ କରିବା ପାଇଁ ବହାରି ପଡ଼ିଥିଲେ।
ବର୍ତ୍ତମାନ ଏ କାମରେ ପୋଟକୋଭିକ୍ ପାରଦର୍ଶିତା ହାସଲ କରିଥିବା କୁହାଯାଉଛି। ଏ ସମ୍ବନ୍ଧରେ ସେ ଏକାଧିକ ପୁସ୍ତକ ମଧ୍ୟ ଲେଖିଥିବା କୁହାଯାଉଛି। ପେକୋଭିକ୍ ଏବଂ ତାଙ୍କ ସହଯୋଗୀ ରଷ୍ଟି କାସ୍ଓ୍ବେ ୪୫ ଫୁଟ ଆର୍/ଭି ଏକ୍ସପ୍ଲୋରର ଡାଇଭିଙ୍ଗ୍ ଭେସେଲ୍କୁ ଜାହାଜ ଭଗ୍ନାବଶେଷ ଚିହ୍ନଟ ପାଇଁ ବ୍ୟବହାର କରାଯାଇଥିବା କୁହାଯାଉଛି।
ପ୍ରଥମ ବିଶ୍ୱଯୁଦ୍ଧ ସମୟରେ ଜର୍ମାନୀ ନୌସେନାରେ ୩୨୯ଟି ବୁଡ଼ାଜାହାଜ ସାମିଲ ହୋଇଥିଲା, ଯାହା ମଧ୍ୟରୁ ଗୋଟିଏ ଥିଲା ୟୁ-୧୧୧ ଜାହାଜ।
୧୯୧୮ରେ କିଏଲ ସ୍କୁଲରେ ପ୍ରଶିକ୍ଷଣ ନେବା ପରେ ଏହାକୁ ଫୋର୍ଥ ପ୍ଲୋଟିଲା ନୌସେନାର ସ୍ବତନ୍ତ୍ର ଦଳ)ରେ ସାମିଲ କରାଯାଇଥିଲା। ଜର୍ମାନୀ ଜାହାଜ ନିର୍ମାଣକାରୀ କମ୍ପାନୀ ଜର୍ମାନିଆଓ୍ବେରଫ୍ ଏହାକୁ ତିଆରି କରିଥିଲା। ଏଥିରେ ମୋଟ ୨୮୦ଟି ୟାର୍ଡ ରହିଥିଲା। ଏହାର ଲମ୍ବ ୨୩୪ ଫୁଟ ୯ ଇଞ୍ଚ ଥିବାବେଳେ ଉଚ୍ଚତା ୨୭ ଫୁଟ ୧ ଇଞ୍ଚ ଥିଲା। ଗୋଟିଏ ଘଣ୍ଟାରେ ୟୁ-୧୧୧ ବୋଟ୍ ୩୦.୪ କି.ମି. ଅତିକ୍ରମ କରିବାର କ୍ଷମତା ରଖିଥିଲା।
