ନୂଆଦିଲ୍ଲୀ, ୧୨ା୪ : ଡିଜିଟାଲ ବ୍ୟକ୍ତିଗତ ତଥ୍ୟ ସୁରକ୍ଷା ବିଲ୍ ପ୍ରସ୍ତୁତ ହୋଇଛି ଏବଂ ପାର୍ଲାମେଣ୍ଟର ଆଗାମୀ ମୌସୁମୀ ଅଧିବେଶନରେ ଏହାକୁ ଉପସ୍ଥାପନ କରାଯିବ। କେନ୍ଦ୍ର ସରକାରଙ୍କ ପକ୍ଷରୁ ଆଟର୍ନି ଜେନେରାଲ ଆର୍. ଭେଙ୍କଟରମଣୀ ମଙ୍ଗଳବାର ସୁପ୍ରିମକୋର୍ଟଙ୍କୁ ଏହା ଜଣାଇଛନ୍ତି। ହ୍ବାଟ୍ସଆପ୍ ପ୍ରିଭେସି ନୀତି ସହ ଜଡିତ ବ୍ୟକ୍ତିଗତ ତଥ୍ୟ ସୁରକ୍ଷାକୁ ନେଇ ଆବେଦନକାରୀ ଚିନ୍ତାବ୍ୟକ୍ତ କରିଥିବାବେଳେ ଉକ୍ତ ବିଲ୍ ଏହାର ସମାଧାନ କରିବ ବୋଲି ଆଟର୍ନି ଜେନେରାଲ କହିଛନ୍ତି। ହ୍ବାଟ୍ସଆପ୍ର ୨୦୨୧ ପ୍ରିଭେସି ପଲିସି ଗ୍ରହଣ କରିବାକୁ ୟୁଜରମାନେ ବାଧ୍ୟ ନୁହନ୍ତି ବୋଲି ଏହି ସୋସିଆଲ ମିଡିଆ ପ୍ଲାଟ୍ଫର୍ମ ଗଣମାଧ୍ୟମରେ ବ୍ୟାପକ ପ୍ରଚାର କରିବାକୁ ଗତ ଫେବୃୟାରୀ ୧ରେ ସର୍ବୋଚ୍ଚ ଅଦାଲତ ନିର୍ଦ୍ଦେଶ ଦେଇଥିଲେ। ନୂଆ ତଥ୍ୟ ସୁରକ୍ଷା ବିଲ୍ କାର୍ଯ୍ୟକାରୀ ନ ହେବା ପର୍ଯ୍ୟନ୍ତ ହ୍ବାଟ୍ସଆପ୍ର କାର୍ଯ୍ୟକ୍ଷମତା ପ୍ରଭାବିତ ହେବନାହିଁ ବୋଲି କୁହାଯାଇଥିଲା। ଉକ୍ତ ବିଲ୍ ପ୍ରସ୍ତୁତ ବୋଲି ମଙ୍ଗଳବାର ଜଷ୍ଟିସ୍ କେ.ଏମ୍.ଜୋସେଫ୍ଙ୍କ ଅଧ୍ୟକ୍ଷତାରେ ଗଠିତ ୫ ଜଣିଆ ସାମ୍ବିଧାନିକ ପୀଠକୁ ଆଟର୍ନି ଜେନେରାଲ କହିଛନ୍ତି। ଉକ୍ତ ପୀଠରେ ଜଷ୍ଟିସ ଅଜୟ ରସ୍ତୋଗୀ, ଅନିରୁଦ୍ଧ ବୋଷ, ହୃଷୀକେଶ ରାୟ ଏବଂ ସି.ଟି. ରବିକୁମାର ରହିଛନ୍ତି। ଆଟର୍ନି ଜେନେରାଲ ରିପୋର୍ଟ ଦାଖଲ କରିବା ପରେ ମାମଲାର ପରବର୍ତ୍ତୀ ଶୁଣାଣି ଅଗଷ୍ଟରେ କରିବାକୁ ଧାର୍ଯ୍ୟ ହୋଇଛି।
