ରିଆମାଳ/ଦେବଗଡ଼,୮।୧୦ (ଡି.ଏନ୍.ଏ.): ଦେବଗଡ ଜିଲାର ଗୋହିରା ଡ୍ୟାମର ଜଳ ନିଷ୍କାସନ ବେଳେ ଭାସିଯାଇଥିବା ୯ଜଣ ଉଦ୍ଧାର ହୋଇଛନ୍ତି। ଶୁକ୍ରବାର ତଳମୁଣ୍ଡରେ ଗୋହିରା ନାଳରେ ଫଟୋ ଉଠାଇବାକୁ ଯାଇଥିବା ୫ଜଣ ଓ ଗାଧୋଇବାକୁ ଯାଇଥିବା ୪ଜଣ ଭାସିଯାଇଥିଲେ। ଭାସିଯାଇଥିବା ସମସ୍ତେ ରିଆମାଳ ଥାନା କଂସରଫାଣ୍ଡି ଦୁଧିଆନାଳୀ ପଞ୍ଚାୟତ ଅନ୍ତର୍ଗତ ଜାମ୍ବୁନାଳୀ ଗ୍ରାମର ବୋଲି ଜଣାପଡିଛି। ସୂଚନା ଅନୁସାରେ ଗୋହିରା ଡ୍ୟାମ କର୍ମଚାରୀ ସକାଳ ୭ଟା ବେଳେ ଜଳ ନିଷ୍କାସନ ପାଇଁ ସାଇରନ ସୂଚନା ପ୍ରଦାନ କରିଥିଲେ। ୮ଟା ସମୟରେ ୫ଟି ଗେଟ୍ରୁ ଗୋଟିଏ ଗେଟ୍ ଖୋଲିଥିଲେ। ସେହି ସମୟରେ ଗୋହିରାର ତଳ କେନାଲରେ ଜାମ୍ବୁନାଳୀ ଗ୍ରାମର ଗୋଟିଏ ସ୍ଥାନରେ ୫ଜଣ ଫଟୋ ଉଠାଉଥିଲେ। ସେହି ନିକଟରେ ଆଉ ଏକ ସ୍ଥାନରେ ୪ଜଣ ଗାଧୋଉଥିଲେ । ଏମାନେ ଜଳ ନିଷ୍କାସନ ସୂଚନା ଜାଣି ନ ଥିଲେ। ଗେଟ୍ ଖୋଲିବା ପରେ ପ୍ରଖର ସ୍ରୋତରେ ଜଳ କେନାଲ ଦେଇ ଆସିଥିଲା । ଫଳରେ ସମସ୍ତେ ଭାସି ଯାଇଥିଲେ। ସେମାନଙ୍କ ମଧ୍ୟରୁ ଦୁଇ ଜଣ କୌଶଳ କ୍ରମେ ଉପରକୁ ଉଠି ଆସି ଚିତ୍କାର କରିଥିଲେ। ଫଳରେ ସ୍ଥାନୀୟ ଲୋକ ଦୌଡି ଆସି ଜଣକୁ ଉଦ୍ଧାର କରିବାର ସକ୍ଷମ ହୋଇଥିଲେ। ସେମାନେ ଅଗ୍ନିଶମ ବାହିନୀ ଓ ଫାଣ୍ଡିକୁ ଫୋନ କରିଥିଲେ । ଖବରପାଇ ଗୋହିରା କର୍ମଚାରୀ ଗେଟ୍ ବନ୍ଦ କରିଥିଲେ। ଅଗ୍ନିଶମ ବାହିନୀ ପହଞ୍ଚି ଆଉ ୬ଜଣକୁ ଉଦ୍ଧାର କରିଥିଲେ ା ସମସ୍ତେ ସୁସ୍ଥଥିବା ସୂଚନା ମିଳିଛି ।
